ލިވަޕޫލުގެ ޝަގީރީ ކޮވިޑް-19 އަށް ޕޮޒިޓިވްވެއްޖެ

ލިވަޕޫލަށް ކުޅެމުން އަންނަ ސްވިޒަލެންޑުގެ ފޯވާޑް ޒެރްޑަން ޝަގީރީވެސް ކޮވިޑް-19 އަށް ޕޮޒިޓިވްވެއްޖެއެވެ.

ޝަގީރީ ކޮވިޑް-19 އަށް ޕޮޒިޓިވްވިކަން ސްވިސް އެފްއޭ އާއި ލިވަޕޫލުންވެސް ވަނީ ކަށަވަރުކޮށްދީފައެވެ. އެ އިދާރާއިން ނެރުނު ބަޔާނެއްގައި ބުނީ ޝަގީރީ ކޮވިޑް-19 އަށް ޕޮޒިޓިވްވުމާއެކު، ސިއްހީ އިދާރާތަކުގެ ލަފާގެ މަތިން އޭނާ މިހާރު އައިސޮލޭޝަނަށް ބަދަލުކޮށްފައިވާ ކަމަށެވެ. އަދި ސްވިޒަލެންޑުގެ ގައުމީ ފުޓްބޯޅަ ޓީމުގެ އެހެން ހުރިހާ ކުޅުންތެރިންގެ ކަންކަން އިދާރާތަކާ ގުޅިގެން ބަލަމުން އަންނަ ކަމަށްވެސް މި ބަޔާނުގައި ވަނީ ބުނެފައެވެ.

ޝަގީރީ ކޮވިޑް-19 އަށް ޕޮޒިޓިވްވިއިރު، އަންނަ ބުދަ ދުވަހު އެކުވެރިކަމުގެ މެޗެއްގައި ސްވިޒަލެންޑުން ކްރޮއޭޝިއާއާ ދެކޮޅަށް ނުކުންނާނެއެވެ. އަދި އަންނަ ހަފުތާގައި ޔުއެފާ ނޭޝަންސް ލީގުގައި ސްޕެއިނާއި ޖަރުމަނާ ދެކޮޅަށް ސްވިޒަލެންޑް ކުޅުމަށް އޮތީ ހަމަޖެހިފައެވެ.

ޝަގީރީ އަކީ ލިވަޕޫލުން ކޮވިޑް-19 އަށް ޕޮޒިޓިވްވި ތިންވަނަ ކުޅުންތެރިޔާއެވެ، ދާދި ފަހުން ލިވަޕޫލަށް ކުޅެމުން އަންނަ ސެނެގާލްގެ ފޯވާޑް ސަޑިއޯ މާނޭ އާއި ސްޕެއިނުގެ މިޑްފީލްޑަރު ތިއާގޯ އަލްކަންޓާރާވެސް ވަނީ ކޮވިޑް-19 އަށް ޕޮޒިޓިވްވެފައެވެ.

މީގެ ކުރިން ލިވަޕޫލުން ވަނީ މާނޭ އާއި ތިއާގޯވެސް ކަނޑައެޅިފައިވާ އުސޫލުތަކާ އެއްގޮތަށް ސެލްފް-އައިސޮލޭޝަނަށް ގޮސްފައިވާކަން ހާމަކޮށްފައެވެ. އަދި އެ ދެ ކުޅުންތެރިންގެ ހަށިގަނޑުންވެސް ވައިރަހުގެ ކޮންމެސް ވަރެއްގެ އަލާމާތްތަކެއް ފެނިފައިވާ ކަމަށާއި، އެކަމަކު ދެ ކުޅުންތެރިންގެ ހާލުވެސް ރަނގަޅު ކަމަށް ލިވަޕޫލުން ވަނީ ބުނެފައެވެ.

އިނގިރޭސި ޕްރިމިއާ ލީގުގައި ލިވަޕޫލުން ދެން މެޗެއް ކުޅޭނީ މި މަހުގެ 17 ވަނަ ދުވަހުއެވެ. އެ ދުވަހުގެ ހަވީރު ލިވަޕޫލް ނުކުންނާނީ ޑާބީ މެޗުގައި ވާދަވެރި އެވަޓަނާ ދެކޮޅަށެވެ.