މި އަހަރަކީ ކުޅިވަރަށް މީގެ ކުރިން ދުވަހަކުވެސް ނާންނާނެ ވަރުގެ ބޮޑެތި ބިޔަ މަޝްރޫއުތަކެއް ހިންގުމަށް ކަނޑައެޅުނު އަހަރެއް ކަމަށާއި، އެގޮތުން ކުޅިވަރުގެ އެކި މަޝްރޫއުތައް ހިންގުމަށް 500 މިލިޔަނުގެ ބަޖެޓެއް މި އަހަރު ކަނޑައެޅިގެން ދިޔަ ކަމަށް ކުޅިވަރާ ބެހޭ ވަޒީރު އަޙްމަދު މަޙްލޫފް ވިދާޅުވެއްޖެއެވެ.
ރާއްޖެޓީވީގެ "ކުޅިވަރު ފައިލް" ޕޮރޮގްރާމުގައި ވާހަކަ ދައްކަމުން ވަޒީރު ވިދާޅުވީ މުޅި ދުނިޔެއަށް ކުރިމަތިވި ކޮވިޑް-19 ގެ ހާލަތާއެކު 500 މިލިޔަނުގެ ބަޖެޓުން 200 މިލިޔަނަށް ވުރެންވެސް ބޮޑު އެއްޗެއް އުނިކުރަން ޖެހުނު ކަމަށެވެ.
މިހާރުވެސް ސަރުކާރުން ކުރިއަށްގެންދާ ބޮޑެތި ގިނަ މަޝްރޫއުތަކުގެ ތެރޭގައި ކުޅިވަރުގެ ދާއިރާގެ މަޝްރޫއުތައް ހިމެނޭއިރު، ވަޒީރު ވިދާޅުވީ މި ހާލަތު ނައިނަމަ ކުޅިވަރުގެ އާއިލާއަށް ފެނިގެންދާނީ މުޅިން އެހެން މަންޒަރެއް ކަމަށެވެ.
މި އަހަރަށް 500 މިލިޔަނުގެ ބަޖެޓެއްގެ ތެރެއިން މަސައްކަތްތައް ރާވާލާފައި ވާނީ. މި ދައްކަނީ ވަރަށް ގިނަ މަސައްކަތްތަކެއްގެ ވާހަކަ. މި އަހަރު ކޮވިޑް ކުރިމަތިނުވެ ކުރިއަށްދިޔަނަމަ އިންގިލާބީ ބަދަލެއްގެ ބިންގާ އެޅިގެންދާނެ. ކަންތައް މިދިމާކުރީ ވަރަށް ދެރަކޮށް. އެހެން ނަމަވެސް އުންމީދު ކަނޑައެއް ނުލަން. އިތުރު ގޮތްތަކެއް ހޯދައިގެން މަސައްކަތްތައް ކުރިއަށް ގެންދަން އަމާޒުހިފާފައި މި ތިބީ.ކުޅިވަރާ ބެހޭ ވަޒީރު އަޙްމަދު މަޙްލޫފް
ވަޒީރު އިތުރަށް ވިދާޅުވީ ރާއްޖޭގެ އެކި ކަންކޮޅުތަކުގައި ފެންވަރު ރަނގަޅު ޓާފް ފުޓްބޯޅަ ދަނޑާއި ފުޓްސަލް ދަނޑުތައް އަދި ތަފާތު އެކި އެރީނާތަކާއި އައުޓްޑޯ ޖިމްތައް މިހާރުވެސް ތަރައްގީ ކުރުމުގެ މަސައްކަތް ބާރަށް ކުރިޔަށްދާއިރު، ބަޖެޓް އުނިކުރަން ޖެހުމުން ޓާފް ފުޓްބޯޅަ ދަނޑުތަކާއި، ވޮލީބޯޅަ އަދި ބާސްކެޓްބޯޅައިގެ އިންޑޯގެ އިތުރުން ފުވައްމުލަކުގައި އެޅުމަށް ހަމަޖެހުނު ސިންތެޓިކް ޓްރެކް ނުފަށާ ފަސްކުރަން ޖެހުނު ކަމަށެވެ.
އެކަމަކުވެސް އުންމީދަކީ ވީހާވެސް އަވަހަށް އެކަންކަން ފެށިގެންދިޔުން ކަމަށާއި، މި މަސައްކަތްތައް ނުފެށުނު ނަމަވެސް، ބައިނަލްއަގުވާމީ ފެންވަރުގެ ބިލްއާޑް އެރީނާ އަކާއި، ނެޓްބޯޅަ ކުޅޭނެ އެންމެ ރަނގަޅު ފެންވަރުގެ ކޯޓެއް ލިބުމަކީވެސް ހިތްހަމަޖެހުމެއް ކަމަށް ވަޒީރު ވިދާޅުވިއެވެ.
އެންމެ އުނދަގޫވި ކަމަކީ އިންޑޯ ބާސްކެޓް އަދި އިންޑޯ ވޮލީ. ފުވައްމުލަކުގައި އަޅަން ނިންމައިގެން ތިބި ސިންތެޓިކް ޓްރެކް. ރަށްރަށުގައި އަޅަން ނިންމި އިންޑޯ ބެޑްމިންޓަން ހޯލުތައް އަދި ފުޓްބޯޅަ ދަނޑުތައް. މި ކަހަލަ ބައިވަރު މަސައްކަތްތައް ހުއްޓިގެން ގޮސްފައި ވަނީ.ކުޅިވަރާ ބެހޭ ވަޒީރު އަޙްމަދު މަޙްލޫފް
ވަޒީރު ވިދާޅުވީ ޒަމާނުއްސުރެން މާލޭގައި ކުޅިވަރުގެ ބޮޑެތި ވަސީލަތްތައް ގާއިމުކުރުމަށް ގެންގުޅެމުން އައި ވިސްނުން ބަދަލުކޮށް، އަތޮޅުތެރޭގައި ކުޅިވަރު ކުޅޭނެ ރަނގަޅު ފެންވަރުގެ ވަސީލަތް ގާއިމުކުރެވިގެން ދިޔުމަކީވެސް މި ވަގުތަށް އޮތް ހިތްހަމަޖެހުމެއް ކަމަށެވެ.
ކޮވިޑް-19 އާ ގުޅިގެން މުޅި ދުނިޔެ އާއި ރާއްޖެއަށްވެސް ބޮޑު އަސަރެއް ކޮށްފައިވާއިރު، ވަކިވަކި ކަންކަމުގެ ތެރެއިން އެންމެ ބޮޑު އަސަރެއް ކުރާނީ ކުޅިވަރުގެ ދާއިރާއަށް ކަމަށް ވަޒީރު ވިދާޅުވިއެވެ.
ކޮވިޑް-19 އާ ގުޅިގެން މާލޭގައި މާޗު މަހުން ފެށިގެން ކުޅިވަރު ކުޅޭ ތަންތަން ބަންދު ކުރެވިފައިވާއިރު، ވަޒީރު ވިދާޅުވީ މި ހާލަތާއެކު މި އަހަރު ކުރިއަށް ގެންދަން ނިންމާފައިވާ ކުޅިވަރުގެ ބޮޑެތި މަޝްރޫއުތައް ލަސްވެގެންދާނެ ކަމަށާއި، ކުޅިވަރަށް ބޮޑު ހޭދައެއް ކުރަން އެއީ އެންމެ ރަނގަޅު ގޮތަށް ނުވާނެ ކަމަށެވެ.
މި ސަރުކާރުން ކުޅިވަރު އެސޯސިއޭޝަންތަކަށް ބޮޑު ހޭދައެއް މިދިޔަ އަހަރު ކޮށްފައިވާއިރު، އެސޯސިއޭޝަންތަކުގެ ބަޖެޓުވެސް ވަނީ ވަރަށް ބޮޑުތަން އިތުރު ކޮށްދީފައެވެ. އެކަމަކު މިއަހަރު އެސޯސިއޭޝަންތަކަށް ދޭނެ ފައިސާގެ އަދަދުތައް އެއްބަސްވެފައިވީ ނަމަވެސް، އެ އަދަދުތައް ދެން ނުދެވޭނެ ކަމަށް ވަޒީރު ވަނީ ވިދާޅުވެފައެވެ.
