ހއ. އުލިގަމުގައި ޓުރިސްޓް ހޮޓަލަކާއި ޔޮޓު ބަނދަރެއް ތަރައްޤީކޮށް ހިންގާނެ ފަރާތެއް ހޯދުމަށް ޓުއަރިޒަމް މިނިސްޓްރީން އިއުލާންކޮށްފިއެވެ.

ޓުއަރިޒަމް މިނިސްޓްރީން ބުނީ އުލިގަމުގައި ފަތުރުވެރިކަން ތަރައްޤީކުރުމަށް ކަނޑައަޅާފައިވާ 30 ހެކްޓަރުގެ ބިމުގައި ޓޫރިސްޓް ހޮޓަލެއް ޔޮޓު ބަނދަރަކާއިއެކު ތަރައްޤީކޮށް ހިންގާނެ ފަރާތެއް ހޯދަމުން އަންނަ ކަމަށެވެ. އަދި މިކަމަށް ޝައުގުވެރިވެލައްވާ ފަރާތްތަކުން މި މަހުގެ 22 ވަނަ ދުވަހުގެ މެންދުރު 1:00ގެ ކުރިން ޓުއަރިޒަމް މިނިސްޓްރީއަށް އަށް ޙާޟިރުވެ މަޢުލޫމާތު ސާފުކުރުމަށް ފަހު ނޮވެމްބަރ މަހުގެ 5 ވަނަ ދުވަހުގެ ހެނދުނު 10:00ށް ބީލަށް ހުށަހެޅުމަށް އެ މިނިސްޓްރީން ވަނީ އެދިފައެވެ.

ހއ. އުލިގަމުގައި ތަރައްގީ ކުރުމަށް އެމްޓީޑީސީ އާ ހަވާލުކުރި 100 އެނދުގެ ޓޫރިސްޓް ހޮޓަލުގެ މަޝްރޫއަކީ، މި ސަރުކާރުން ހިންގާ މަޝްރޫއުތަކުގެ ތެރެއިން، ވަރަށް ބޮޑު އިސްކަމެއް ދެއްވައިގެން ހިންގާނެ އެއް މަޝްރޫއުކަމަށް ޓޫރިޒަމް މިނިސްޓަރ ޑރ. އަބްދުﷲ މައުސޫމް ވަނީ ވިދާޅުވެފައެވެ.

އުލިގަމުގައި އެޅުމަށް ހަމަޖެހިފައިވާ 100 އެނދުގެ ހޯޓާ އެޅުމުގެ މަޝްރޫއުގެ އިތުރުންވެސް، އުލިގަމަށް އަންނަ ޔޮޓު ފަދަ އުޅަނދުތަކަށް ބޭނުންވާ ހިދްމަތްތައް އިތުރަށް ތަރައްގީ ކުރުމާއި، ބޮޑު ތިލަދުއްމަތީގައި ހަދާފައިވާ އެއަރޕޯޓްތައް އިތުރަށް ތަރައްގީ ކުރުމާއި، އަދި ހަދަމުންދާ އެއަރޕޯޓްތައް ނިންމައި ހުޅުވުމުގެ މަސައްކަތްތައް ވަރަށް ބާރަށް މިސަރުކާރުން ކުރިއަށް ގެންދާ ކަމަށެވެ.

ހއ. އުލިގަމުގައި 100 އެނދުގެ ހޮޓަލެއް ތަރައްގީކުރުމަށް އެމްޓީޑީސީ އާއި ހަވާލުކުރިއިރު، ކޮށްފައިވާ އިންވެސްޓްމެންޓް ދެނެގަތުމަށް ކުއަންޓިޓީ ސަރވޭޔަރެއް ހޯދަން ބޭނުންވާ ކަމަށް ޓޫރިޒަމް މިނިސްޓްރީން މީގެ އަހަރެއްހާ ދުވަސްކުރިން އިއުލާންކޮށްފައި ވެއެވެ. އެ މަސައްކަތް ނިމި އެތައް ދުވަހެއް ވީއިރު ވެސް، އެ ހޮޓަލާ ގުޅޭ އިތުރު އެއްވެސް މަސައްކަތެއް ކުރަމުންނުދާ ކަމަށް އުލިގަމު ކައުންސިލުން ބުނެފައި ވެއެވެ.

ހއ. އުލިގަމުގައި 100 ކޮޓަރީގެ ޓޫރިސްޓު ހޮޓަލެއް ތަރައްގީ ކުރުމަށް 27 ފެބްރުއަރީ 2007 ގައި އެމްޓީޑީސީ އާއި ކުރެވުނު އެގްރީމަންޓު 21 ޖުލައި 2015 ގައި ބާތިލު ކުރެވިފައިވާއިރު، އެމްޓީޑީސީން ކޮށްފައިވާ ޚަރަދުތަކުގެ ތަފްސީލު ވަނީ ހޯދާފައެވެ.

މި މަސައްކަތް ކުރައްވާނެ ކަމަށް މިނިސްޓަރ ވިދާޅުވެފައިވާއިރު، ސިޓީ ހޮޓަލެއް ތަރައްޤީ ކުރުމަށް ކަނޑައެޅި 36 ހެކްޓަރުގެ ބިމުގައި އެމަސައްކަތް އަލުން ކުރިޔަށް ގެންދަވާނެ ކަމަށް ރައީސް އިބްރާހިމް މުހައްމަދު ސޯލިހު ވެސް ވަނީ ވިދާޅުވެފައެވެ. އެގޮތުން ރާއްޖެ ހުރަސްކޮށް ދަތުރު ކުރާ ގިނައަދަދެއްގެ ޔޮޓު ފަހަރު މީގެ ކުރިން އުލިގަމުގައި ބަނދަރު ކުރަމުން އައިސްފައިވާއިރު، އުލިގަމުގައި އެފަދަ ތަރައްޤީގެ މަޝްރޫއެއް ހިންގުމަކީ ރަށުގެ ލޯކަލް ޓޫރިޒަމް ފުޅާވެ، ރަށް ތަރައްޤީވާނެ ކަމެއް ކަމަށް ގިނަ ބަޔަކު ދެކެއެވެ.