ލިވަޕޫލުގެ މާނޭވެސް ކޮވިޑް-19 އަށް ޕޮޒިޓިވް

ލިވަޕޫލަށް ކުޅެމުން އަންނަ ސެނެގާލްގެ ފޯވާޑް ސަޑިއޯ މާނޭވެސް ކޮވިޑް-19 އަށް ޕޮޒިޓިވް ވެއްޖެއެވެ.

ހުކުރު ދުވަހުގެރޭ ލިވަޕޫލުން ވަނީ މާނޭ ކޮވިޑް-19 އަށް ޕޮޒިޓިވް ވިކަން ހާމަކޮށްފައެވެ. އެ ކުލަބުން ނެރުނު ބަޔާނެއްގައި ބުނީ މާނޭ ކޮވިޑް-19 އަށް ޕޮޒިޓިވް ވިއިރު، އޭނާގެ ހަށިގަނޑުންވެސް ކޮންމެސް ވަރެއްގެ އަލާމާތްތަކެއް ފެނިފައިވާ ކަމަށާއި، އެކަމަކު މާނޭގެ ހާލު ރަނގަޅު ކަމަށެވެ.

މާނޭ ކޮވިޑް-19 އަށް ޕޮޒިޓިވް ވިއިރު، ދާދި ފަހުން ލިވަޕޫލާ އަލަށް ގުޅުނު ސްޕެއިނުގެ މިޑްފީލްޑަރު ތިއާގޯ އަލްކަންޓާރާވެސް ވަނީ ކޮވިޑް-19 އަށް ޕޮޒިޓިވް ވެފައެވެ. ލިވަޕޫލުން ބުނީ ތިއާގޯ އެކޭ އެއްފަދައިން މާނޭވެސް ކަނޑައެޅިފައިވާ އުސޫލުތަކާ އެއްގޮތަށް ސެލްފް-އައިސޮލޭޝަނަށް ގޮސްފައިވާ ކަމަށެވެ.

މާނޭ ކޮވިޑް-19 އަށް ޕޮޒިޓިވް ވިއިރު، އޭނާ އަންނަނީ މި ސީޒަނުގައިވެސް މޮޅު ކުޅުމެއް ދައްކަމުންނެވެ. އެގޮތުން ލިވަޕޫލުން އިނގިރޭސި ޕްރިމިއާ ލީގުގައި މިހާތަނަށް ކުޅުނު ތިން މެޗުގައި މާނޭ ވަނީ ތިން ލަނޑު ޖަހާފައެވެ.

އުމުރުން މިހާރު 28 އަހަރުގެ މާނޭ ލިވަޕޫލާ ގުޅުނީ 2016 ވަނަ އަހަރުއެވެ. އެއަށްފަހު މިހާތަނަށް މާނޭ ވަނީ ލިވަޕޫލަށް ކުޅެދިން 174 މެޗުގައި 84 ލަނޑު ކާމިޔާބުކޮށްފައެވެ. އަދި ލިވަޕޫލުން މިދިޔަ ސީޒަނުގެ ޕްރިމިއާ ލީގާއި، ޔުއެފާ ޗެމްޕިއަންސް ލީގާއި، ޔުއެފާ ސުޕަ ކަޕްގެ އިތުރުން ފީފާ ކުލަބު ވޯލްޑް ކަޕް ކާމިޔާބުކުރިއިރު މާނޭ ވަނީ މުހިންމު ދައުރެއް އަދާކޮށްފައެވެ.

ލިވަޕޫލުގެ ދެ ކުޅުންތެރިއަކު ކޮވިޑް-19 އަށް ޕޮޒިޓިވް ވެފައިވާއިރު، ލީގުގައި އާދީއްތަ ދުވަހުގެރޭ ރަށުން ބޭރުގައި ލިވަޕޫލުން އެސްޓަން ވިލާއާ ދެކޮޅަށް ނުކުންނާނެއެވެ.