ޔޫރޮޕާ ލީގުގެ މޮޅު ކުޅުންތެރިއަކަށް ލުކާކޫ

މިދިޔަ ސީޒަނުގެ ޔުއެފާ ޔޫރޮޕާ ލީގުގެ އެންމެ މޮޅު ކުޅުންތެރިއާގެ މަގާމު އިންޓަ މިލާނަށް ކުޅެމުން އަންނަ ބެލްޖިއަމުގެ ފޯވާޑް ރޮމެލޫ ލުކާކޫ ހޯދައިފިއެވެ.

މިދިޔަ ސީޒަނުގެގެ ޔޫރޮޕާ ލީގުގެ އެންމެ މޮޅު ކުޅުންތެރިޔާގެ މަގާމު އިއުލާން ކޮށްފައިވަނީ ހުކުރު ދުވަހު ސްވިޒަލެންޑުގެ ނިޔޯނުގައި އޮތް ޔޫރޮޕާ ލީގުގެ ގުރު ނެގުމުގެ ރަސްމިއްޔާތުގައެވެ. ޔޫރޮޕާ ލީގުގެ މޮޅު ކުޅުންތެރިޔާގެ މަގާމު ލުކާކޫ ހޯދީ މެންޗެސްޓާ ޔުނައިޓެޑުގެ ބްރޫނޯ ފެނާމްޑޭސް އާއި ޔޫރޮޕާ ލީގުގެ ޗެމްޕިއަންކަން ހޯދި ސެވިއްޔާގެ އެވާ ބަނޭގާއާ ވާދަކޮށްގެންނެވެ.

ސެވިއްޔާއިން ހަވަނަ ފަހަރަށް ޔޫރޮޕާ ލީގުގެ ޗެމްޕިއަންކަން ހޯދީ ފައިނަލުގައި އިންޓަ އަތުން 3-2 ން މޮޅުވެގެންނެވެ. މުބާރާތުގެ ފައިނަލުން އިންޓަ ބަލިވި ނަމަވެސް، މިދިޔަ ސީޒަނަކީ އެ ޓީމަށް ކާމިޔާބު ސީޒަނެކެވެ. އަދި ޔުނައިޓެޑް ދޫކޮށް މިދިޔަ އަހަރު އިންޓައާ ގުޅުނު ލުކާކޫ ވަނީ މިދިޔަ ސީޒަނުގައި މޮޅު ކުޅުމެއް ދައްކާފައެވެ.

އެގޮތުން މިދިޔަ ސީޒަނުގެ ޔޫރޮޕާ ލީގުގައި ލުކާކޫ ވަނީ ނުވަ ލަނޑު ޖަހާފައެވެ. އަދި މިދިިޔަ ސީޒަނުގައި ޖުމްލަ 34 ލަނޑު ހަމަކޮށް، ބްރެޒިލުގެ ލެޖެންޑް ރޮނާލްޑޯ ނަޒާރިއޯ ހަދާފައިވާ ރިކޯޑަކާ ލުކާކޫ ވަނީ އެއްވަރުކޮށްފައެވެ. އެއީ އިންޓައަށް ކުޅެދިން ފުރަތަމަ ސީޒަނުގައި އެޓީމަށް އެންމެ ގިނަ ލަނޑު ޖަހައިގެން 1997-1998 ވަނަ އަހަރުގެ ސީޒަނުގައި ރޮނާލްޑޯ ހަދާފައިވާ ރިކޯޑެވެ.

މިދިޔަ ސީޒަނުގެ ޔޫރޮޕާ ލީގުގެ އެންމެ މޮޅު ކުޅުންތެރިއާގެ މަގާމު ލުކާކޫ ހޯދިއިރު، އޭނާ ވަނީ މިހާތަނަށް އިންޓައަށް ކުޅެދިން 53 މެޗުގައި 37 ލަނޑު ޖަހާފައެވެ.