އިންޓަރނެޓްގެ މައްސަލަ ބޮޑުވެ، ޓެރަރިޒަމް އަޑުއެހުން ކުރިއަށް ނުގެންދެވުނު!
ވީޑިއޯ ކޮންފަރެންސިންގ މެދުވެރިކޮށް ބައެއް އަޑުއެހުންތައް ކުރިއަށް ގެންދާއިރު އިންޓަރނެޓްގެ މައްސަލަތައް ބޮޑުކަން ފާހަގަ ކުރެވޭ
ލ. ގަމު ބަނދަރުގައި އަޅާފައި އޮތް ފުލުހުންގެ ލޯންޗުގައި ރޯކޮށްލާފައި
ލ. ގަން، ތުނޑި ބަނދަރު ސަރަހައްދުގައި އޮތް މޯލްޑިވްސް ޕޮލިސް ސަރވިސްގެ ލޯންޗެއްގައި ޤަޞްދުގައި ރޯކޮށްލި މައްސަލައިގައި ޓެރެރިޒަމް ދައުވާ އުފުލި ދެ މީހެއްގެ އަޑުއެހުން، ވީޑިއޯ ކޮންފަރެންސިންގ މެދުވެރިކޮށް، ކުރިއަށް ގެންދިއުމުގައި އިންޓަރނެޓް ކަނެކްޝަނުގެ މައްސަލަތަކެއް ދިމާވެގެން ކުރިއަށް ނުގެންދެވިގެން ކެންސަލް ކޮށްފިއެވެ.
ބުރާސްފަތި ދުވަހު ކްރިމިނަލް ކޯޓުގައި ބޭއްވި އަޑުއެހުން ކުރިއަށް ގެންދިއުމަށް ގާޒީ މަސައްކަތް ކުރެއްވި ނަމަވެސް، އަޑުއެހުން ކުރިއަށް ގެންދިއުމުގައި ދަތިތަކެއް ދިމާވީ، ދައުލަތުން ދައުވާ އުފުލާފައިވާ މޯލްޑިވްސް ކަރެކްޝަނަލް ސަރވިސްގެ ބަންދުގައި ހުރި، ލ. ގަން، ތުނޑި، ލަވްސައިޑް ޢަބްދުއްލަޠީފް އާއި ލ. ގަން މެޖިސްޓްރޭޓް ކޯޓުގައި ހުރި އެ ރަށު ކަޅައިދޫފިނިހިޔާގެ މޫސާ އިނާސްއަށް އަޑު ލިބުމުގައި ދިމާވި މައްސަލައަކާއި ގުޅިގެންނެވެ.
މި މައްސަލައިގައި، މޫސާ އިނާސްގެ މައްޗަށް ދައުވާ އުފުލާފައިވަނީ ޓެރަރިޒަމް މަނާކުރުމުގެ ޤާނޫނުގެ 6 ވަނަ މާއްދާގެ (ހ) ގެ 1 ވަނަ ނަންބަރާ ޙަވާލާދީ، އެ މާއްދާގެ (ށ) ގެ ދަށުން ޓެރަރިޒަމްގެ ޢަމަލެއް ހިންގުމުގެ ކުށުގެ ދަޢުވާ ކަމަށެވެ. މި ދަޢުވާ އިނާސްގެ މައްޗަށް ސާބިތު ވެއްޖެނަމަ 20 އަހަރާއި 25 އަހަރާ ދެމެދުގެ ޖަލު ޙުކުމެއް އަންނާނެ ކަމަށެވެ.
އޭގެއިތުރުން، ޓެރެރިސްޓް ޖަމާއަތަކަށް ތާއީދުކުރާ މީހެއް ކަމަށް ދޭހަވާ ފަދަ ލިޔުމެއް، ނުވަތަ ކުރެހުމެއް ނުވަތަ ފޮޓޯއެއް ގެންގުޅުމުގެ ކުށުގެ ދައުވާ އެއްވެސް އިނާސްގެ މައްޗަށް އުފުލާފައި ވެއެވެެ. މި ދައުވާ އުފުލާފައިވަނީ، ފުލުހުންގެ ލޯންޗެއް ރޯކޮށްލި މައްސަލައާ ގުޅިގެން، ކޯޓު އަމުރެއްގެ ދަށުން އިނާސް ދިރިއުޅޭ ގެ ބަލާ ފާސްކުރުއިރު، ފެނުނު ލެޕްޓޮޕެއްގެ ހާޑް ޑިސްކް ތަހުލީލު ކުރިއިރު، ޓެރެރިސްޓް ޖަމާއަތްތައް ކަމަށްވާ، އިސްލާމިކް ސްޓޭޓް އާއި އަލްގައިދާއަށް ތާއީދު ކުރާކަން ދޭހަކޮށްދޭ ލިޔުންތަކާއި ވީޑިއޯ ފެނިފައިވާތީއެވެ.
މޫސާ އިނާސްގެ އިތުރުން، ޢަބްދުއްލަޠީފް އިބްރާހީމްގެ މައްޗަށް ވެސް މި މައްސަލައިގައި ތުހުމަތުތަކެއް ކުރެވޭތީ، ޓެރަރިސްޓް ޖަމާޢަތަކަށް ތާޢީދު ކުރާ މީހެއްކަމަށް ދޭހަވާފަދަ ލިޔުމެއް ނުވަތަ ކުރެހުމެއް ނުވަތަ ފޮޓޯއެއް ގެންގުޅުމުގެ ކުށުގެ ދަޢުވާ އޭނާގެ މައްޗަށް ވަނީ އުފުލާފައެވެ.
އޭނާގެ މައްޗަށް ދައުވާކުރަން ނިންމީ، ކޯޓު އަމުރެއްގެ ދަށުން، އަބްދުއްލަތީފް ދިރިއުޅޭ ގެ ބަލާ ފާސްކުރިއިރު، ފެނުނު ހާޑް ޑިސްކެއް ތަހުލީލު ކުރިއިރު، ޓެރެރިސްޓް ޖަމާއަތްތައް ކަމަށްވާ ޖަބްޙަތުއްނުޞްރާ އާއި އަލްގައިދާއަށް ތާއީދު ކުރާކަން ދޭހަކޮށްދޭ ލިޔުންތައް ފެނިފައިވާތީ ކަމަށް ވެސް ޕްރޮސެކިއުޓަރ ޖެނެރަލްގެ އޮފީހުން ބުނެފައި ވެއެވެ.
ހަމަ މި މައްސަލައިގެ ހެކި ނައްތާލާފައިވާތީ ޢަބްދުއްލަޠީފް އިބްރާހީމްގެ މައްޗަށް ލ. ގަމު މެޖިސްޓްރޭޓް ކޯޓަށް ހުށަހެޅި ޢަދުލުއިންޞާފު ޤާއިމުކުރުމަށް ހުރަސްއެޅުމުގެ ކުށުގެ ދަޢުވާއަށް ޢަބްދުއްލަޠީފް އިބްރާހީމް އިޢުތިރާފްވެފައިވާކަން ފާހަގަކޮށް ޕީޖީ އޮފީހުން ބުނީ، ޢަބްދުއްލަޠީފް އިބްރާހީމް 1 އަހަރާއި 12 ދުވަހަށް ޖަލަށްލުމަށް 6 ޖުލައި 2020 ދުވަހު އެ ކޯޓުން ޙުކުމް ކޮށްފައިވާ ކަމަށެވެ.
ލ. ގަން، ތުނޑި ބަނދަރު ސަރަހައްދުގައި އޮތް ފުލުހުންގެ ލޯންޗުގައި އަލިފާން ރޯކޮށްލާފައިވަނީ 22 މާރިޗު 2020 ދުވަހުއެވެ. ލޯންޗުތަކުގައި ރޯކޮށްލުމުގެ ޒިންމާ އިސްލާމިކް ސްޓޭޓުން ނަގާފައިވާއިރު، މިއީ ބޭރުގެ ޓެރަރިސްޓު ޖަމާއަތަކުން ރާއްޖޭގައި ދިން މިފަދަ ފުރަތަމަ ހަމަލާއެވެ.
