ޗެމްޕިއަން ސިޓީ އާއި ލިވަޕޫލް ހަތަރުވަނަ ބުރަށް

އިނގިރޭސި ލީގު ކަޕުގެ ތިންވަނަ ބުރުގައި ބުރާސްފަތި ދުވަހުގެރޭ ކުޅުނު މެޗުތަކުން މޮޅުވެ ހަތަރުވަނަ ބުރުން އެންމެ ފަހުގެ ޗެމްޕިއަން މެންޗެސްޓާ ސިޓީ އާއި ލިވަޕޫލް ފުރުސަތު ހޯދައިފިއެވެ.

މި މުބާރާތުގެ އެންމެ ފަހުގެ ޗެމްޕިއަން ކަމަށްވާ ސިޓީން ހަތަރުވަނަ ބުރުގެ ޖާގައެއް ހޯދީ ތިންވަނަ ބުރުގައި ބުރާސްފަތި ދުވަހުގެރޭ ބޯންމަތު އަތުން ހަނިގޮތަކަށް މޮޅުވެގެންނެވެ. ސިޓީގެ ދަނޑުގައި ކުޅުނު މި މެޗުން އެ ޓީމު މޮޅުވީ 2-1 ގެ ނަތީޖާއަކުންނެވެ.

މި މެޗުގައި އެންމެ ފުރަތަމަ ލަނޑު ޖަހާ ލީޑު ނެގީ ސިޓީންނެވެ. މެޗުގެ 18 ވަނަ މިނެޓުގައި މި ލަނޑު ސިޓީއަށް ކާމިޔާބުކޮށްދިނީ އުމުރުން 17 އަހަރުގެ ލިއަމް ޑިލަޕެވެ. މިއީ ޑިލަޕް ސިޓީއަށް ކާމިޔާބުކޮށްދިން ފުރަތަމަ ލަނޑެވެ.

މެޗުގައި ސިޓީން ލީޑު ނެގި ނަމަވެސް، އޭގެ ހަތަރު މިނެޓު ފަހުން ބޯންމަތުން ވަނީ ނަތީޖާ އެއްވަރުކޮށްފައެވެ. މި ލަނޑު އެ ޓީމަށް ކާމިޔާބުކޮށްދިނީ ސޭމް ސަރިޖެވެ. މި މެޗުން ސިޓީ މޮޅުވީ މެޗުގެ 75 ވަނަ މިނެޓުގައި ޒުވާން މިޑްފީލްޑަރު ފިލް ފޯޑެން ކާމިޔާބުކުރި ލަނޑުންނެވެ.

ބޯންމަތު ބަލިކޮށް ސިޓީ ލީގު ކަޕްގެ ހަތަރުވަނަ ބުރުން ޖާގައެއް ހޯދިއިރު، ހަތަރުވަނަ ބުރުގައި ސިޓީ ބައްދަލުކުރަން ޖެހޭނީ ބާންލީއާއެވެ.

މީގެ އިތުރުން ލީގު ކަޕްގައި ބުރާސްފަތި ދުވަހުގެރޭ ކުޅުނު މެޗުން ލިވަޕޫލް މޮޅުވީ ލިންކަން ސިޓީ އަތުން 7-2 ގެ ތަފާތު ބޮޑު ނަތީޖާއަކުންނެވެ.

ލިންކަން ސިޓީގެ ދަނޑުގައި ކުޅުނު މި މެޗުގެ ފުރަތަމަ ހާފުގައި ލިވަޕޫލުން ވަނީ ހަތަރު ލަނޑުގެ ލީޑެއް ނަގާފައެވެ. އެގޮތުން މެޗު ފަށައިގެން ނުވަވަނަ މިނެޓުގައި ހިލޭ ޖެހުމަކުން ޒެރްޑަން ޝަގީރީ ލިވަޕޫލަށް ލީޑު ނަގައިދިންއިރު، އޭގެ ނުވަ މިނެޓު ފަހުން ޓަކޫމީ މިނަމީނޯ ވަނީ ލިވަޕޫލަށް ލީޑު ފުޅާކޮށްދީފައެވެ. އަދި މެޗުގެ 32 ވަނަ މިނެޓުގައި ޒުވާން މިޑްފީލްޑަރު ކާޓިސް ޖޯންސް ލިވަޕޫލްގެ ތިންވަނަ ލަނޑު ޖެހިއިރު، އޭގެ ހަތަރު މިނެޓު ފަހުން ޖޯންސް ވަނީ އިތުރު ލަނޑެއް ކާމިޔާބުކޮށްފައެވެ.

މެޗުގެ ދެވަނަ ހާފުގައި ލިވަޕޫލުން ރަނގަޅު ކުޅުމެއް ދެއްކިއިރު، މި ހާފު ފަށައިގެން ފުރަތަމަ މިނެޓުގައި މިނަމީނޯ ވަނީ ލިވަޕޫލުގެ ފަސްވަނަ ލަނޑު ޖަހާފައެވެ. މެޗުގެ 60 ވަނަ މިނެޓުގައިން ޓަޔޯ އެޑުން ލިންކަން ސިޓީގެ ފުރަތަމަ ލަނޑު ކާމިޔާބުކުރި ނަމަވެސް، އޭގެ ފަސް މިނެޓު ފަހުން މާކޯ ގުރުޖިޗް ވަނީ ލިވަޕޫލްގެ ހަވަނަ ލަނޑު ޖަހާފައެވެ.

އެކަމަކު އޭގެ ދެ މިނެޓު ފަހުން ލިންކަން ސިޓީން ވަނީ އެ ޓީމުގެ ދެވަނަ ލަނޑު ޖަހާފައެވެ. މި ލަނޑު އެޓީމަށް ކާމިޔާބުކޮށްދިނީ ލެވިސް މޮންޓްސްމާއެވެ. މި މެޗުގައި ލިވަޕޫލުން ކަމިޔާބުކުރި ހަތްވަނަ ލަނޑު މެޗު ނިމެން މިނެޓަކަށް ވެފައިވަނިކޮށް އެ ޓީމަށް ކާމިޔާބުކޮށްދިނީ ޑިވޮކް އޮރީގީއެވެ.

މި މެޗުން މޮޅުވެ ހަތަރުވަނަ ބުރުން ލިވަޕޫލް ޖާގައެއް ހޯދިއިރު، ހަތަރުވަނަ ބުރުގައި ލިވަޕޫލް ބައްދަލުކުރަން ޖެހޭނީ އާސެނަލާއެވެ.