މަސް ދުވަހަށްފަހު ކޮވިޑް ކޭސްތަކުގެ އަދަދު 50 އަށްވުރެ ދަށަށް ގޮސްފި އެވެ.

ހެލްތް ޕްރޮޓެކްޝަން އެޖެންސީ (އެޗްޕީއޭ)ގެ ތަފާސްހިސާބުތަކަށް ބަލާއިރު އާދިއްތަ ދުވަހުގެ އިރުއޮއްސި 6:00ން ހޯމަ ދުވަހުގެ އިރުއޮއްސި 6:00ށް ގެ ނިޔަލަށް ޕޮޒިޓިވްވީ 46 މީހުންނެވެ. މީގެ ތެރެއިން 44 މީހުން ޕޮޒިޓިވްވެފައިވަނީ މާލެ ސަރަހައްދުންނެވެ. ދެ މީހަކު ޕޮޒިޓިވްވެފައިވަނީ އަތޮޅު ތެރެއިންނެވެ.

ހޯމަ ދުވަހު 129 މީހަކު ބަލިން ރަނގަޅުވެފައިވެއެވެ.

1340 އެކްޓިވް ކޭސް ހިމެނޭއިރު، މިހާރު ވެސް 96 މީހަކަށް ހޮސްޕިޓަލްގައި ދަނީ ފަރުވާ ދެމުންނެވެ. އަދި މިވަގުތު ވެސް އައިސޮލޭޝަން ފެސިލިޓީގައި 692 މީހަކު އެބަތިބި ކަމަށް އެޗްޕީއޭއިން ބުނެއެވެ.

ރާއްޖެއިން މިހާތަނަށް ކޮވިޑް-19ގެ 9770 ކޭސް ރިޕޯޓު ކުރެވިފައިވެއެވެ. އަދި 8390 މީހަކު ބަލިން ވަނީ ފަސޭހަވެފައެވެ.

ކޮވިޑް-19 ކޮންޓްރޯލް ކުރުމަށް ކުރަމުންދާ މަސައްކަތުގެ ތެރެއިން ގިނަ ބަޔަކު ޓެސްޓު ކުރަމުންދާއިރު، މިހާތަނަށް ރިޕީޓެޑް ސާންޕަލްތަކާއެކު ޖުމްލަ 141،184 ސާންޕަލެއް ނަގާފައިވެއެވެ.

ކޮވިޑް-19ގައި މިހާތަނަށް މަރުވެފައިވަނީ 34 މީހުންނެވެ. މީގެ ތެރޭގައި ގިނައީ އުމުރުން ދުވަސްވީ މީހުންނެވެ.

މާލޭގެ އިތުރުން އަތޮޅު ތެރެއިން ވެސް ވަނީ ކޮވިޑް-19ގެ ކޭސްތައް ފެނިފައެވެ. އެގޮތުން މިހާތަނަށް 22 ރަށަކުން އެކްޓިވް ކޭސްތައް ފެނިފައިވެއެވެ. މިހާރު މޮނިޓަރިންގެ ހާލަތުގައި އޮތީ ގދ. ހޯނޑެއްދޫ އެވެ.

ކޮވިޑް-19ގެ ކޭސްތައް މަސްދުވަހަށްފަހު ފަންސާހަށް ވުރެ ދަށަށް ގޮސްފައިވާއިރު، ރައްކާތެރިވުމުގެ ގޮތުން އަޅާފައިވާ ފިޔަވަޅުތަކަށް ފަރުވާ ކުޑަ ނުކުރުމަށް ކަމާބެހޭ އެންމެހައި ފަރާތްތަކުން ދަނީ އިލްތިމާސް ކުރަމުންނެވެ.