ސުއަރޭޒްގެ ބަދަލުގައި ޔުވެންޓަސްއިން ޒެކޯ ގެންނަނީ

ބާސެލޯނާއަށް ކުޅެމުން އަންނަ އުރުގުއޭގެ ފޯވާޑް ލުއިސް ސުއަރޭޒްގެ ބަދަލުގައި ޔުވެންޓަސްއިން ރޯމާގެ ކެޕްޓަން އެޑިން ޒެކޯ ގެނައުމާ ގާތަށް ގޮސްފައިވާ ކަމަށް ރިޕޯޓުތައް ބުނެފިއެވެ.

މީގެ ކުރިން މީޑިއާތަކުން ވަނީ އުމުރުން 33 އަހަރުގެ ސުއަރޭޒް ޔުވެންޓަސްއާއެކު ތިން އަހަރުގެ އެއްބަސްވުމެއް ހަދަން ނިންމި ކަމަށް ރިޕޯޓުކޮށްފައެވެ. އެކަމަކު ސުއަރޭޒަށް އިޓަލީގެ ރަށްވެހިކަން ނުލިބުމާ ގުޅިގެން އެ ޑީލް ހުއްޓުމުކަށް އައިސްފައިވާ ކަމަށް ދާދި ފަހުން ވަނީ ރިޕޯޓުކޮށްފައެވެ.

އެހެންކަމުން ޔުވެންޓަސްއިން ރޯމާއަށް ކުޅެމުން އަންނަ ބޮސްނިއާގެ ފޯވާޑް ޒެކޯ ގެނައުމުގެ މަސައްކަތް ފެށިއިރު، މިހާރު ޒެކޯއާއެކު ޔުވެންޓަސްއިން އެއްބަސްވުމަކަށް އައިސްފައިވާ ކަމަށް ދާދި ފަހުން އިޓަލީގެ މީޑިއާތަކުން ވަނީ ރިޕޯޓުކޮށްފައެވެ. އަދި ވަރަށް އަވަހަށް ޒެކޯ ޔުވެންޓަސްގެ މެޑިކަލް ޓެސްޓް ހަދާނެ ކަމަށާއި، ކުރިއަށް އޮތް ދުވަސްތަކުގެ ތެރޭގައި ޔުވެންޓަސްގެ އެއްބަސްވުމުގައި ޒެކޯ ސޮއިކުރާނެ ކަމަށްވެސް ވަނީ ރިޕޯޓުކޮށްފައެވެ.

މެންޗެސްޓާ ސިޓީން ވިދާލި އުމުރުން 34 އަހަރުގެ ޒެކޯ ރޯމާއާ ގުޅުނީ 2015 ވަނަ އަހަރުއެވެ. ރޯމާގައި މިހާތަނަށް ހޭދަކުރި ފަސް ސީޒަނުގައި ޒެކޯ ވަނީ ރޯމާއަށް ކުޅެދިން 222 މެޗުގައި 106 ލަނޑު ކާމިޔާބުކޮށްފައެވެ. އަދި ބޮސްނިއާ ގައުމީ ފުޓްބޯޅަ ޓީމަށް މިހާތަނަށް ކުޅެދިން 109 މެޗުގައި ޒެކޯ ވަނީ 59 ލަނޑު ކާމިޔާބުކޮށްފައެވެ.

ޔުވެންޓަސްއިން ޒެކޯ ހޯދުމުގެ މަސައްކަތް ކުރަމުން އަންނައިރު، އެޓީމުން މިހާތަނަށް މި ޓްރާންސްފާ ބާޒާރުގައި ގެނައި ހަމައެކަނި ކުޅުންތެރިއަކީ ޝާލްކާއަށް ކުޅެމުން އައި އެމެރިކާގެ ޒުވާން މިޑްފީލްޑަރު ވެސްޓަން މެކެނީއެވެ.