99 މީހަކު ޕޮޒިޓިވްވެ 174 މީހަކު ބަލިން ރަނގަޅުވެއްޖެ
99 މީހަކު ޕޮޒިޓިވްވި އިރު މީގެ ތެރެއިން 7 މީހަކު ޕޮޒިޓިވްވީ އަތޮޅު ތެރެއިން
ރަށްރަށް ދާ މީހުން ޓެސްޓް ކުރުމަށް ހިންގި ޕްރޮގްރާމުގެ ތެރެއިން
ބުދަ ދުވަހު 99 މީހަކު ޕޮޒިޓިވްވެ 174 މީހަކު ބަލިން ރަނގަޅުވެފައިވާ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ހާމަކޮށްފިއެވެ.
އެޗްޕިއޭ އިން ހާމަކޮށްފައިވާ މައުލޫމާތަށް ބަލާ އިރު، އަންގާރަ ދުވަހުގެ އިރުއޮއްސި 6:00ން ބުދަ ދުވަހުގެ އިރު އޮއްސި 6:00އާ ހަމައަށް 99 މީހަކު ޕޮޒިޓިވްވި އިރު މީގެ ތެރެއިން 7 މީހަކު ޕޮޒިޓިވްވީ އަތޮޅު ތެރެއިންނެވެ. 92 މީހުން ޕޮޒިޓިވްވީ މާލެ ސަރަހައްދުންނެވެ. ބުދަ ދުވަހު ޕޮޒިޓިވްވި މީހުންގެ ތެރެއިން 65 މީހުންނަކީ ދިވެހިންނެވެ. އަދި 34 ބިދޭސީން ހިމެނެއެވެ.
ބުދަ ދުވަހު 174 މީހަކު ބަލިން ރަނގަޅުވެފައިވާ އިރު ބަލިން ރަނގަޅުވި މީހުންގެ އަދަދު ވަނީ 7093ށް އަރާފައެވެ. ރާއްޖޭގައި ކޮވިޑް-19ގެ އެކްޓިވް ކޭސްގެ އަދަދަކީ 1485އެވެ. އެޗްޕީއޭއިން ބުނީ 115 މީހަކަށް އެޑްމިޓްކޮށްގެން ފަރުވާ ދެމުން އަންނަ ކަމަށެވެ. އަދި 727 މީހަކު އައިސޮލޭޝަން ފެސިލިޓީތަކުގައި އެބަތިބި ކަމަށެވެ. ރާއްޖެއިން މިހާތަނަށް 33 މީހަކު ވަނީ ނިޔާވެފައެވެ. އަދި މިހާތަނަށް އައި އިރު، 134،520 ސާމްޕަލް ވަނީ ޓެސްޓް ކޮށްފައެވެ.
ރާއްޖޭގައި ޕޮޒިޓިވްވި މީހުންގެ ތަފާސް ހިސާބުތައް ދައްކާގޮތުން އެންމެ ގިނައިން ޕޮޒިޓިވްވެފައިވަނީ ދިވެހިންނެވެ. އެގޮތުން މިހާތަނަށް 5965 މީހަކު ވަނީ ޕޮޒިޓިވްވެފައެވެ. އެއީ ޕޮޒިޓިވްވި މީހުންގެ 63.28 އިންސައްތައެވެ. ދެން އެންމެ ގިނައީ ބަންގުލަދޭޝް މީހުންނެވެ. މިހާތަނަށް އެގައުމަށް ނިސްބަތްވާ 2633 މީހަކު ޕޮޒިޓިވްވެފައިވާ އިރު، މިއީ ޕޮޒިޓިވްވި މީހުންގެ 27.93 އިންސައްތައެވެ.
މިހާތަނަށް އިންޑިއާގެ 531 މީހަކު ވަނީ ޕޮޒިޓިވްވެފައެވެ. ލަންކާގެ 106 މީހަކު ޕޮޒިޓިވްވި އިރު ނޭޕާލްގެ 81 މީހަކާއި، ފިލިޕީންސްއަށް ނިސްބަތްވާ 16 މީހަކާއި، އިޓަލީއަށް ނިސްބަތްވާ 13 މީހެއްގެ އިތުރުން އެހެނިހެން ގައުމުތަކަށް ނިސްބަތްވާ 82 މީހަކު ވަނީ ރާއްޖޭގައި ޕޮޒިޓިވްވެފައެވެ.
