ދާދި ފަހުން ކޮވިޑް-19 އަށް ޕޮޒިޓިވްވި ޕީއެސްޖީގެ ގިނަ ކުޅުންތެރިންތަކެއް ބަލިން ރަނގަޅުވެ ފަރިތަކުރުންތަކުގައި ބައިވެރިވާން ފަށައިފިއެވެ.

މިދިޔަ ސީޒަން ނިމުމާއެކު ސްޕެއިންގެ ރަށެއް ކަމުގައިވާ އިބްޒާއަށް ޗުއްޓީ ހޭދަކުރަން ގޮސް އުޅެނިކޮށް މި މަހުގެ ދެވަނަ ދުވަހު ޕީއެސްޖީގެ ފޯވާޑް ނޭމާ އާއި، ފޯވާޑް އެންހެލް ޑި މަރިއާ އާއި، މިޑްފީލްޑަރު ލެއަންޑްރޯ ޕަރެޑެސް އާއި، ގޯލްކީޕަރު ކޭލޯ ނަވާސް އާއި، ފޯވާޑް މައުރޯ އިކާޑީީގެ އިތުރުން ޑިފެންޑަރު މާކީނިއޯސް ވަނީ ކޮވިޑް-19 އަށް ޕޮޒިޓިވް ވެފައެވެ. އަދި އޭގެ ފަހުން ޕީއެސްޖީގެ ކީލިއަން އެމްބާޕޭ ވަނީ ފްރާންސްގެ ގައުމީ ފުޓްބޯޅަ ޓީމަށް ނަގާފައިވަނިކޮށް ކޮވިޑް-19 އަށް ޕޮޒިޓިވް ވެފައެވެ.

ހުކުރު ދުވަހުގެ ވަގުތެއްގައި ނޭމާ، އޭނާ ކޮވިޑް-19 އިން ރަނގަޅުވިކަން ހާމަކުރިއިރު، ހޮނިހިރު ދުވަހުގެ ވަގުތެއްގައި ޕީއެސްޖީގެ ކޯޗު ތޯމަސް ޓުޗެލް ވަނީ ނޭމާގެ އިތުރުން ޑި މަރިއާ އާއި، ޕަރެޑެސް އަދި ނަވާސް ބަލިން ރަނގަޅުވެ ފަރިތަކުރުންތަކުގައި ބައިވެރިވިކަން ހާމަކޮށްފައެވެ.

ޕީއެސްޖީގެ ގިނަ ކުޅުންތެރިންތަކެއް ކޮވިޑް-19 އަށް ޕޮޒިޓިވް ވިއިރު، އެ ކުޅުންތެރިން ނުލައި މި ސީޒަނުގެ ފްރެންޗް ލީގުގައި ކުޅުނު ފުރަތަމަ މެޗުން އެންމެ ފަހުގެ ޗެމްޕިއަން ޕީއެސްޖީ ވަނީ ލީގަށް އަލަށް ޕްރޮމޯޓްވި ލެންސް އަތުން ބަލިވެފައެވެ. ބުރާސްފަތި ދުވަހުގެރޭ ކުޅުނު މެޗުން ލެންސް އަތުން ޕީއެސްޖީ ބަލިވީ 1-0 ގެ ނަތީޖާއަކުންނެވެ.

ލީގުގައި ކުޅުނު ފުރަތަމަ މެޗުން ޕީއެސްޖީ ބަލިވިއިރު، ލީގުގައި ދެން ޕީއެސްޖީން މެޗެއް ކުޅޭނީ އާދީއްތަ ދުވަހުގެރޭއެވެ. އެރޭ ޕީއެސްޖީ ނުކުންނާނީ މާސޭއާ ދެކޮޅަށެވެ.