ޓޭބަލް ޓެނިސް އެސޯސިއޭޝަން އޮފް މޯލްޑިވްސްގެ ރައީސްގެ މަގާމަށް ބޮޑު ތަފާތަކުން ހޮވިވަޑައިގެން އަލީ ރަޝީދު (އައްޔަ) ގެ ނުރުހުމާއި ފާޑުކިޔުން މީޑިއާއަށް އަމާޒުކުރައްވައިފިއެވެ.

އަންގާރަ ދުވަހު ކުރިއަށްދިޔަ ވާދަވެރިކަން ބޮޑުވި އިންތިޚާބު ކާމިޔާބުކުރެއްވުމަށް ފަހު މީޑީއާއަށް ދެއްވި އިންޓަވިއުއެއްގައި އައްޔަ ވަނީ އޭނާއާ ދެކޮޅަށް ނުކުތް ތޯހާ ސަލީމްގެ ޓީމުގެ ޚަބަރުތަކާއި، ކޯޓުގައި ކުރިއަށްދިޔަ ޓީޓީ އެސޯސިއޭޝަނުގެ މައްސަލައިގެ ޚަބަރުތައް ގެނެސްދިން މީޑިއާތަކަކީ ވަކިކޮޅަށް ޖެހި ވަކި ބަޔަކު ޕްރޮމޯޓްކުރި މިޑީއާތަކެއް ކަމަށް ތުހުމަތުކޮށް ވަރަށް ބޮޑަށް ނުހުރުން ފާޅުކޮށްފައެވެ.

އިންތިޚާބަށްފަހު ގައުމީ ފުޓްބޯޅަ ދަނޑުގައި ހުރެ ދެއްވި އިންޓަވިއުގައި މީޑިއާތަކުން ވަރަށް ބޮޑަށް އެއްކޮޅަކަށް ޖެހި މަސައްކަތް ކުރި ކަމަށް އައްޔަ ކުރި ތުހުމަތާ ގުޅިގެން، އެއީ ކޮން މީޑިއާތަކެއްތޯ ތަކުރާރުކޮށް އެހުމުން މީޑިއާތަކުގެ ނަމެއް ހާމަކޮށްފައެއް ނުވެއެވެ.

އިންތިޚާބާ ގުޅޭގޮތުން ރާއްޖެ ޓީވީގެ ޕްރޮގްރާމަށް އަރަން އައްޔައާއެކު އޭނާގެ ޓީމަށް ދިން ފުރުސަތުގެ ބޭނުން ހިފާފައިނުވާއިރު، އިންޓަވިއުއަށް ފަހު އައްޔަ ވަނީ ވަރަށް ބޮޑަށް ރާއްޖެޓީވީއަށް އަދި ރާއްޖެ.އެމްވީގައި ޝާއިރުކުރި ޓީޓީގެ ޚާބަރުތަކަށް ނުހުރުން އަމާޒުކޮށް ވާހަކަ ދައްކާފައެވެ.

ޓީޓީ އެސޯސިއޭޝަނުގެ އިންތިޚާބު އަންގާރަ ދުވަހު ބޭއްވިއިރު، އިންތިޚާބުގެ މައްސަލަތަކެއް ފެންމަތިވެ ކޯޓުގައިވެސް ވަނީ ޓީޓީ އެސޯސިއޭޝަނުގެ މައްސަލައެއް ކުރިއަށް ގެންގޮސްފައެވެ. ޓީޓީ އެސޯސިއޭޝަނާ ދެކޮޅަށް ސިވިލް ކޯޓަށް މައްސަލަ ހުށަހެޅީ ކުރީގެ މަޝްހޫރު ޓީޓީ ކުޅުންތެރިޔާ އަލީ އާދަމް މަނިކް (ތާޅަފިލި އަލިބެ) އެވެ.

ޓީޓީ އެސޯސިއޭޝަނުގެ އިންތިޚާބު ފަސްކޮށްދިނުމަށް ވަގުތީ އަމުރަކަށް ތާޅަފިލި އަލިބެ އެދުނު ނަމަވެސް، ހޯމަ ދުވަހު ސިވިލް ކޯޓުން ނެރުނު ހުކުމުގައި ބުނެފައިވަނީ ވަގުތީ އަމުރެއް ޝަރީއަތުން ނެރެންޖެހޭނެ ތަނެއް ނެތް ކަމަށެވެ. އެއާއެކު އަންގާރަ ދުވަހު އިންތިޚާބު ވަނީ ބާއްވާފައެވެ.

އަންގާރަ ދުވަހުގެރޭ ދެއްވި އިންޓަވިއުގައި އައްޔަ އިތުރަށް ވިދާޅުވީ އިންތިޚާބުގެ ނަތީޖާއިން އެނގިގެން ދިޔައީ މައްސަލަ ޖެއްސި ފަރާތުގެ ތާއީދު ޓީޓީގެ އާއިލާގެ ތެރޭގައި އޮތް މިންވަރު ކަމަށާއި، މި އިންތިޚާބަކީ ޓީޓީއަށް ޖުމްލަކޮށް ހުރިހާ ކުޅިވަރު އެސޯސިއޭޝަނަށް ލިބިގެންދިޔަ ކާމިޔާބެއް ކަމަށެވެ.

އަދި އިންތިޚާބާ ކުރިމަތިލީ ފުރިހަމަ މެނިފެސްޓޯއަކާއެކު ކަމަށާއި، އެހެން ކަމުން ހިންގާ ކޮމިޓީގެ ބައްދަލުވުމަށްފަހު މެނިފެސްޓޯގައި އިސްކަންދޭންވީ ތަރުތީބެއް އެކުލަވާލައި، މުޅި ރާއްޖެއަށް ޓީޓީ ފުޅާކުރުމަށް ކުރިއަށް އޮތް ހަތަރު އަހަރު މަސައްކަތް ކުރާނެ ކަމަށްވެސް އައްޔަ ވިދާޅުވިއެވެ.

ޓީޓީ އެސޯސިއޭޝަނުގެ އިންތިޚާބު އައްޔަ ކާމިޔާބުކުރެއްވީ ޣިޔާސުއްދީން ސްކޫލްގެ ކުރީގެ ޕްރިންސިޕަލް ތޯހާ ސަލީމާ ވާދަކުރައްވާ 75 ވޯޓުގެ ތަފާތަކުންނެވެ. އައްޔައަށް އިންތިޚާބުގައި 155 ވޯޓު ލިބިވަޑައިގެންނެވިއިރު، ތޯހާ ލިބިވަޑައިގެންނެވީ 80 ވޯޓެވެ. ޓީޓީ އެސޯސިއޭޝަނުގެ އިންތިޚާބު އަންގަރަ ދުވަހު ބޭއްވިއިރު، އައު ހިންގާ ކޮމިޓީއަށް ހޮވުވަޑައިގަތީ ހުސް އައްޔަގެ ޓީމުގައި ހިމެނުނު ބޭފުޅުންނެވެ.

ޓީޓީ އެސޯސިއޭޝަނުގެ އިންތިޚާބުގައި 15 ކުލަބަކާއި، 272 މެންބަރުން ވަނީ ވޯޓުލާފައެވެ.