ޔުނައިޓެޑުން ޗެލްސީ ބަލިކުރި މެޗުގައި ވީއޭއާރަށް ގިނަ ބަޔެއްގެ ފާޑުކިޔުން

އިނގިރޭސި ޕްރިމިއާ ލީގުގެ މެންޗެސްޓާ ޔުނައިޓެޑުން 2-0 އިން ޗެލްސީ ބަލިކުރި މެޗުގައި ވީޑިއޯ އެސިސްޓަންޓް ރެފްރީ (ވީއޭއާރް) ގެ އެހީގައި ނިންމި ނިންމުންތަކަށް ގިނަ ބަޔަކު ފާޑުކިޔައިފިއެވެ.

ޗެލްސީގެ ދަނޑުގައި ހޯމަ ދުވަހުގެރޭ ކުޅުނު މެޗުގެ ކުރީކޮޅު ޗެލްސީން ގިނަ ހަމަލާތަކެއް އުފެއްދި ނަމަވެސް، ގޯލާ އަމާޒުކޮށް ފޮނުވާލި ފުރަތަމަ ހަމަލާއިން ޔުނައިޓެޑުން ވަނީ ލީޑު ނަގާފައެވެ. މި ލަނޑު ފުރަތަމަ ހާފުގެ ފަހު މިނެޓުގައި ވަން ބިސާކާ ނަގައިދިން ހުރަހަކުން ކާމިޔާބުކޮށްދިނީ އެންތަނީ މާޝިއަލް އެވެ.

މި މެޗުގައި ވީއޭއާރްގެ ނިންމުމާ މެދު ފުރަތަމަ ޗެލްސީން ނުރުހުން ފާޅުކުރީ ބޯޅަ ބޭރަށް ދިޔަ ފަހުން އެޓީމުގެ މިޝީ ބަޓްޝުއާޔީ އަށް ޔުނައިޓެޑްގެ ކެޕްޓަން ހެރީ މެގުއާ ހަމަލާދިން ކަމަށް ބުނެ އެވެ. ދަނޑު ބޭރަށް ވެއްޓިފައި އޮތް މެގުއާ ނެގި ފައިން ބަޓްޝުއާޔީ ގައިގައި ޖެހުނު ނަމަވެސް، ރެފްރީ އޭނާއަށް ކާޑެއް ދައްކާފައެއް ނުވެއެވެ.

އަދި ދެވަނަ ހާފުގެ ކުރީކޮޅުގައި ކާޓް ޒޫމާ ލަނޑެއް ޖަހައި ޗެލްސީ އަށް އެއްވަރުކޮށްދިން ނަމަވެސް، ވީއޭއާރް ބެލުމަށްފަހު ރެފްރީ ވަނީ އެ ލަނޑު ބަލައިނުގަންނަށް ނިންމާފައެވެ. ސަބަބަކީ ޒޫމާ އެ ލަނޑު ކާމިޔާބުކުރުމުގެ ކުރިން އެޓީމުގެ ކެޕްޓަން ސެޒާ އަޒްޕިލިކުއޭޓާ، އޭރިއާތެރެއިން ޔުނައިޓެޑްގެ ބްރެންޑަން ވިލިއަމްސްއަށް ފައުލްކުރުމާއި ގުޅިގެންނެވެ.

އޭގެ ފަހުން މެޗުގެ 66 ވަނަ މިނެޓުގައި ޔުނައިޓެޑުން ވަނީ ލީޑު ފުޅާކޮށްފައެވެ. ބްރޫނޯ ފެނާންޑޭސް ނަގައިދިން ކޯނަރަކުން މި ލަނޑު އެޓީމަށް ކާމިޔާވބުކޮށްދިނީ މެގުއާ އެވެ.

އަދި އޭގެ ފަހުން ބަދަލު ކުޅުންތެރިއެއްގެ ގޮތުގައި ކުޅެންއެރި، އޮލިވިއޭ ޖިރޫޑްވެސް ޗެލްސީއަށް ލަނޑެއް ޖަހައިދިންއިރު، ވީއޭއާރް ބެލުމަށްފަހު ރެފްރީ ވަނީ އެ ލަނޑު އޮފްސައިޑު ކަމަށް ނިންމާފައެވެ.

ހޯމަ ދުވަހުގެރޭގެ މެޗުން މޮޅުވެ ޔުނައިޓެޑް ވަނީ ލީގު ތާވަލުގެ ހަތްވަނައަށް ޖެހިލާފައެވެ. ހަތްވަނައިގައި 26 މެޗުން 38 ޕޮއިންޓު ހޯދައިގެން ޔުނައިޓެޑް އޮތްއިރު، ހަތަރުވަނައިގައި އޮތް ޗެލްސީ އަށް 26 މެޗުން ލިބިފައިވަނީ 41 ޕޮއިންޓެވެ.