ޕީޖީ އޮފީހަށް 12 އަހަރު!

ޕްރޮސެކިއުޓަރ ޖެނެރަލް (ޕީޖީ) އޮފީހަށް 12 އަހަރު ފުރުމާ ގުޅިގެން ޕީޖީ ހުސައިން ޝަމީމް ޚާއްސަ މެސެޖެއް ދެއްވައިފިއެވެ.

ހުކުރު ދުވަހު ޕީޖީ އޮފީހުގެ އަހަރީ ދުވަހުގެ ތަހުނިޔާ އަރިސް ކުރައްވައި ޕީޖީ ވަނީ އަތު ލިޔުމުން ޚާއްސަ މެސެޖެއް ޓްވިޓަރގައި ހިއްސާ ކުރައްވާފައެވެ. އެގޮތުން ޕީޖީ ވަނީ 12 ވަނަ އަހަރީ ދުވަހުގެ ތަހުނިޔާ ޕީޖީ އޮފީހުގެ ކުރީގެ އަދި މިހާރުގެ މުވައްޒަފުންނަށް އަރިސް ކުރައްވައި، ޕީޖީ އޮފީހާމެދު ދެކިވަޑައިގަންނަވާ އަމާޒު ހިއްސާ ކުރައްވާފައެވެ.

ޕީޖީ ވިދާޅުވީ، އަމާޒަކީ ޕީޖީ އޮފީހަކީ ހުރިހާ ޙާލަތެއްގައި ވެސް ޤާނޫނާ އެއްގޮތަށް އަމަލު ކުރާ، އަދި އިތުބާރާއެކު ދުނިޔޭގެ ފެންވަރުގައި ފާހަގަކޮށްލެވޭ ޚިދުމަތެއް ފޯރުކޮށްދޭ މުއައްސަސާއަކަށް ހެއްދެވުން ކަމަށެވެ. ޕީޖީ ޝަމީމް ވަނީ ފުރަތަމަ ޕްރޮސިކިއުޓަރ ޖެނެރަލްގެ މަޤާމަށް އައްޔަނު ކުރެވުނު އަލްއުސްތާޛް އަޙްމަދު މުޢިއްޒުގެ މަސައްކަތް ފާހަގަ ކުރައްވައި، އެމަނިކުފާނު ދެއްވާ އިރުޝާދުތަކަށް ޝުކުރު އަދާ ކުރައްވާފައެވެ.

2008 ވަނަ އަހަރުގެ އޯގަސްޓު މަހުގެ 7 ވަނަ ދުވަހު ދިވެހިރާއްޖޭގައި ވަކި ފަރާތަކަށް ބުރަ ނުވާ މުސްތަޤިއްލު ޕްރޮސިކިއުޓަރ ޖެނެރަލެއް ހުންނަންވާނެ ކަމަށް ޤާނޫނުއަސާސީގައި ކަނޑައެޅުމާ ގުޅިގެން، އެ އަހަރުގެ ސެޕްޓެމްބަރު މަހުގެ 4 ވަނަ ދުވަހު ޕީޖީ އޮފީސް އުފެދިގެން ދިޔައެވެ. އަދި ފުރަތަމަ ޕްރޮސިކިއުޓަރ ޖެނެރަލްގެ މަޤާމަށް އަލްއުސްތާޛް އަޙްމަދު މުޢިއްޒު ޢައްޔަންކުރެވިގެން ދިޔައީ ވެސް ހަމަ އެ ދުވަހުއެވެ.

އޭގެ އިތުރުން، ޖެހިގެން އައި އަހަރުގެ ފެބްރުއަރީ މަހުގެ 4 ވަނަ ދުވަހު ޑެޕިއުޓީ ޕްރޮސިކިއުޓަރ ޖެނެރަލްގެ މަޤާމަށް މިހާރުގެ ޕީޖީ ހުސައިން ޝަމީމް އައްޔަނު ކުރެވިގެން ދިޔައެވެ.

ޕީޖީ އޮފީހަށް 12 އަހަރު ފުރުން ފާހަގަ ކުރަމުންދާއިރު، ޕީޖީ އޮފީހާމެދު ރައްޔިތުންގެ މެދުގައި އިތުބާރު އުފައްދައި، އެ މުއައްސަސާ ހަރުދަނާ ކުރުމަށް މިހާރުގެ ޕީޖީ ކުރައްވަމުން ގެންދަވާ މަސައްކަތްތައް ގިނަ ބަޔަކު ދަނީ ފާހަގަ ކުރަމުންނެވެ.