ޔޫއޭއީއާއެކު ރާއްޖެއިން އެކުވެރިކަމުގެ މެޗުތަކެއް ކުޅެނީ

ޔުނައިޓެޑް އަރަބި އެމިރޭޓްސް (ޔޫއޭއީ) އާއެކު ގައުމީ ފުޓްބޯޅަ ޓީމުން އެކުވެރިކަމުގެ މެޗުތަކެއް ކުޅެން އެއްބަސްވެފައިވާ ކަމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލް ވިދާޅުވެއްޖެއެވެ.

މިދިޔަ އޮގަސްޓް މަހުގެ ކުރީކޮޅު ބައްސާމް ޔޫއޭއީއަށް ވަޑައިގެންނެވިއިރު، ޔޫއޭއީ ފުޓްބޯޅަ އެސޯސިއޭޝަނުގެ ޗެއާމަން ރާޝިދު ބިން ހުމައިދު އަލް ނުއައިމީއާއެކު ބައްސާމް ވަނީ އޮގަސްޓް މަހުގެ 12 ވަނަ ދުވަހު ބައްދަލުވުމެއް ބާއްވާފައެވެ. މި ބައްދަލުވުމުގައި ވަނީ ޔޫއޭއީގެ އިތުރުން ރާއްޖޭގައި އަންހެން އަދި ފިރިހެން ގައުމީ ފުޓްބޯޅަ ޓީމުގެ އެކުވެރިކަމުގެ މެޗުތައް ކުޅޭ ގޮތަށް ނިންމާފައެވެ.

ރާއްޖެޓީވީގެ "ކުޅިވަރު ފައިލް" ޕްރޮގްރާމުގައި ވާހަކަދައްކަވަމުން ބައްސާމް ވިދާޅުވީ ޔޫއޭއީ އެފްއޭގެ ރައީސްއާއެކު ބޭއްވުނީ ވަރަށް ކާމިޔާބު ބައްދަލުވުމެއް ކަމަށެވެ. އަދި ރާއްޖޭގެ ގައުމީ ޓީމުން ވަރުގަދަ ޓީމުތަކާ ދެކޮޅަށް މެޗުތަކެއް ކުޅެން ޖެހޭ ކަމަށް ގަބޫލުކުރާ ކަމަށާއި، އެގޮތުން ޔޫއޭއީގެ ގައުމީ ފުޓްބޯޅަ ޓީމަކީ ވަރަށް ވަރުގަދަ ޓީމެއް ކަމަށެވެ. އަދި ވިދާޅުވީ މި މެޗުތަކުން އެދެވޭ އެންމެ ރަނގަޅު ނަތީޖާ ނުނެރެވުނެއް ކަމަކު، ބޭނުމަކީ ގައުމީ ޓީމުގެ ފެންވަރު އިތުރަށް ރަނގަޅު ކުރުން ކަމަށްވެސް ބައްސާމް ވިދާޅުވިއެވެ.

މި މެޗުތައް ކުޅޭނެ ސީދާ ތާރީޚެއް އަދި ކަނޑައަޅާފައެއް ނުވެއެވެ. ބައްސާމް ވިދާޅުވީ މެޗުތައް ކުޅޭނެ ތާރީޚު ކަނޑައެޅުމުގައި ދަތިތަކެއް އެބަހުރި ކަމަށާއި، ތާރީޚުތައް ކަނޑައެޅޭނީ މިހާރު ކުރިމަތިވެފައިވާ ކޮވިޑް-19 ގެ ހާލަތުން އަރައިގަނެވި، ދަތުރު ފަތުރު ކުރުމުގެ ހުއްދަތައް ފަސޭހައިން ލިބެން ފެށުމުން ކަމަށެވެ.

ބައްސާމް އިތުރަށް ވިދާޅުވީ މެޗުތައް ކުޅުމުގެ އިތުރުން ޔޫއޭއީ އެފްއޭގެ ރައީސްއާއެކު މަޝްވަރާކުރެވުނު އަނެއް ކަންތައްތަކަކީ ރާއްޖޭގެ އެކި ކަންކޮޅުތަކުގައި ފުޓްބޯޅައިގެ އިންފްރާސްޓްރަކްޗާ ތަރައްގީކުރަން ކުރެވޭނެ މަސައްކަތްތަކާ ބެހޭގޮތުންނާއި، ރެފުރީންނާއި ކޯޗުން ތަމްރީނުކުރަން އެހީ ހޯދޭނެ ގޮތްތަކާ ބެހޭގޮތުން ކަމަށެވެ.

ޔޫއޭއީ އެފްއޭގެ ރައީސްއާއެކު ބައްސާމް ކުރިއަށްގެންދެވި މަޝްވަރާތަކުގައި އެކުވެރިކަމުގެ މެޗުތަކެއް ކުޅުމަށް ނިންމިއިރު، ރާއްޖޭގެ ގައުމީ ފުޓްބޯޅަ ޓީމުން އެންމެ ފަހުން އެކުވެރިކަމުގެ މެޗެއް ކުޅުނީ މިދިޔަ އަހަރުގެ ނޮވެމްބަރު މަހު މެލޭޝިއާގައި އެ ގައުމާ ދެކޮޅަށެވެ. އަދި މާލޭގައި އެންމެ ފަހުން ގައުމީ ޓީމުން އެކުވެރިކަމުގެ މެޗެއް ކުޅުނީ 2016 ވަނަ އަހަރު ސެޕްޓެމްބަރު މަހު ބަންގްލަދޭޝްއާ ދެކޮޅަށެވެ.