އައްޑޫގައި އިންޑިއާގެ އެހީގައި ހަދާ މަރުކަޒުގެ އެއްބަސްވުމުގައި ސޮއިކުރީ ޑރ. ޖަމީލް ކަން ހާމަވެއްޖެ!
އެންމެ ފުރަތަމަ އިންޑިއާ ސަރުކާރާއި މި ސަރުކާރާއި ދެމެދު ސޮއި ކުރެވިފައިވަނީ 29 ސެޕްޓެމްބަރު 2012ގައި
އައްޑޫ އަތޮޅުގައި ގާއިމްކުރާ ފުލުހުންގެ މަރުކަޒު، އެއްބަސްވުމުގައި ސޮއި ކުރެއްވީ ޑރ. ޖަމީލް
އައްޑޫގައި އިންޑިއާގެ އެހީގައި ހަދާ މަރުކަޒުގެ އެއްބަސްވުމުގައި ސޮއިކުރީ ޑރ. ޖަމީލް ކަން ހާމަވެއްޖެއެވެ.
ދ. ވާނީގައި ގާއިމްކުރާ ފުލުހުންގެ މަރުކަޒުގެ ދެވަނަ ފިޔަވަހީގެ މަސައްކަތް ނިންމުމާއި ގުޅިގެން ބޭއްވި ރަސްމިއްޔާތުގައި ވާހަކަ ދައްކަވަމުން ހާރީޖީ ވަޒީރު އަބްދުﷲ ޝާހިދު ވިދާޅުވީ، ދ. ވާނީގެ އިތުރުން އައްޑު އަތޮޅުގައި ފުލުހުން ތަމްރީންކުރާ މަރުކަޒެއް ގާއިމްކުރިގެންދާކަމަށެވެ. އައްޑުއަތޮޅުގައި ގާއިމްކުރެވޭ މަރުކަޒުގެ މައުލޫމާތު ހިއްސާކުރައްވަމުން ހާރިޖީ ވަޒީރު ވިދާޅުވީ، އެއީވެސް އިންޑިއާ ސަރުކާރުގެ ވަރަށް ބޮޑު ހިލޭ އެހީއެއްގެ ދަށުން ކުރަމުން ގެންދާ ޕްރޮޖެކްޓެއްކަމަށެވެ.
ނަމަވެސް އެ މަރުކަޒު ގާއިމުކުރުމުގެ މަސައްކަތަކީ ހަމައެކަނި މި ސަރުކާރުން ފަށައިގެން ކުރިޔަށް ގެންދާ މަސައްކަތެއް ނޫންކަން ފާހަގަކުރައްވައި ހާރިޖީ ވަޒީރު ވިދާޅުވީ އެންމެ ފުރަތަމަ އިންޑިއާ ސަރުކާރާއި މި ސަރުކާރާއި ދެމެދު ސޮއި ކުރެވިފައިވަނީ 29 ސެޕްޓެމްބަރު 2012ގައި ކަމަށެވެ. ދިވެހި ސަރުކާރުގެ ފަރާތުން ސޮއިކުރެއްވީ އެއިރުގެ ހޯމް މިނިސްޓަރ އަދި ފަހުން ނައިބު ރައިސްކަން ކުރެއްވި ޑރ ޖަމީލްކަމަށް ހާރިޖީ ވަޒީރު ވަނީ ވިދާޅުވެފައެވެ.
ހާރިޖީ ވަޒީރު ވިދާޅުވީ އެ އެއްބަސްވުމުގައި އިންޑިއާގެ ފަރާތުން ސޮއިކުރެއްވީ އިންޑިއާގެ އެއިރުގެ ހޯމް މިނިސްޓަރ ކަމަށެވެ. އެންމެ ފުރަތަމަ ޕްރޮޖެކްޓްގައި ޑރ. ޖަމީލް ސޮއިކުރައްވައި އިންޑިއާ ސަރުކާރާއެކީ ކުރިޔަށް ގެންދިއުމަށް ސޮއިކުރެއްވިއިރު އެކަން ކުރަން ނިންމާފައި އޮތީ ޅ. އަތޮޅު ދިއްފުށިމާދޫގައި ކަމަށެވެ. އޭގެ ފަހުން އެކި ބަދަލުތައް ޕްރޮޖެކްޓައް ގެނެސް 2014 ވަނަ އަހަރު ޕްރޮޖެކްޓް ބަދަލުކުރެއްވީ ލ. އަތޮޅަށް ކަމަށާއި އަދި އެއަށްފަހު އައްޑު އަތޮޅަށް ކަމަށެވެ. އަދި އައްޑުއަތޮޅަށް ބަދަލުކުރުމުގައި ކައުންސިލާއި މަޝްވަރާ ކުރެވުނުކަން ފާހަގަކުރައްވައި ވަޒީރު ވިދާޅުވީ، އެ މަޝްވަރާތަކުގައި އިސްކޮށް ހުންނެވީ އެއިރުގެ ހޯމް މިނިސްޓަރ އުމަރު ނަސީރުކަމަށެވެ. ވަޒީރު ވިދާޅުވީ އައްޑުއަތޮޅުގައި ގާއިމްކުރާ ބިން ކަނޑައެޅުމުގައި އިސްކޮށް ހުންނަވައި މަސައްކަތް ފައްޓަވާފައިވާކަމަށެވެ.
ޝާހިދު އިތުރަށް ވިދާޅުވީ ރައީސް ސޯލިހުގެ ސަރުކާރު އެންމެ އިސްކަމެއް ދެނީ ފުލުހުންގެ ތަމްރީން ލިބޭނެ ވަސީލަތްތައް ގާއިމުކުރަންކަމަށާއި ކަންކަން ލަސްކޮށް ދިގުދަންމަން ބޭނުން ނުވާކަމަށެވެ. އެގޮތުން 2019 ވަނަ އަހަރުން ފެށިގެން ޕްރޮޖެކްޓަށް އިތުރު ހަލުވިކަމެއް ގެނެސް އެ މަސައްކަތް އަވަސް މުއްދަތެއްގައި ނިމި ދިވެހި ފުލުހުންނަށް ތަމްރީން ދެވޭނެ އިންތިޒާމް ފަހިވެގެންދާނެކަމަށް ހާރިޖީ ވަޒީރު ފާހަގަކުރެއްވިއެވެ.
ހާރިޖީ ވަޒީރު މި މައުލޫމާތުތައް ހާމަކުރައްވާފައިވާއިރު، މި ސަރުކާރުން ގައުމު އިންޑިއާއަށް ވިއްކާލާއި އިންޑިއާގެ ސިފައިން ގައުމަށް ގެނައުމަށް މަސައްކަތްކުރާ ކަމަށް ބުނެ އިދިކޮޅު ފަރާތްތަކުން ދަނީ ވަރަށް ބޮޑަށް ފާޑުކިޔަމުންނެވެ. އެގޮތުން، އައްޑޫގައި ގާއިމްކުރާ މަރުކަޒަކީ އިންޑިއާ ސިފައިން ބޭތިއްބުމަށް ތަރައްގީކުރާ ތަނެއްގެ ގޮތުގައިވެސް އިދިކޮޅުން ސިފަކުރެއެވެ. މި މައުލޫމާތުތައް ހާމަވުމާއި އެކު، މިއީ ރައީސް ވަހީދު ވެރިކަމުގައި އެއިރު ހޯމް މިނިސްޓަރަށް ހުންނަވައި ޑރ. ޖަމީލް ސޮއިކުރެއްވި އެއްބަސްވުމެއްކަން އެނގެއެވެ. ޑރ. ވަހީދަކީ މިއަދު އިދިކޮޅުގައި އެންމެ ހަރުއަޑުން ވާހަކަދައްކަވާ އަދި އިދިކޮޅު ޕީޕީއެމްގެ އެޑްވައިޒަރެކެވެ. އަދި ޑރ. ޖަމީލްއަކީވެސް އެ ޕާޓީގެ އެޑްވައިޒަރެކެވެ.
އައްޑޫއަށް ޕްރޮޖެކްޓް ބަދަލުކުރީވެސް ރައީސް ޔާމީންގެ ވެރިކަމުގައި އެއިރުގެ ހޯމް މިނިސްޓަރ އުމަރު ނަސީރުކަން މި މައުލޫމާތުތަކުން ވަނީ ހާމަވެފައެވެ.
