އިދިކޮޅު ޕީޕީއެމް-ޕީއެންސީ ކޯލިޝަންގެ ޕީއެންސީގެ ރައީސް އަބްދުއްރަހީމް އަބްދުﷲ (އަދުރޭ) 1000ރ އިން ޖޫރިމަނާ ކޮށްފިއެވެ.

އަބްދުއްރަހީމް ޖޫރިމަނާ ކޮށްފައިވަނީ ހޯމަ ދުވަހު ފުލުހުންގެ އިދާރާއަށް ހާޒިރު ކުރުމަށްފަހުގައެވެ. އަބްދުއްރަހީމް ފުލުހަށް ހާޒިރު ކުރަން އަންގާފައިވަނީ، "ރާއްޖެ ވިއްކާލުމާ ދެކޮޅަށް" މި ނަމުގައި މިދިޔަ ހުކުރު ދުވަހު އިދިކޮޅު ކޯލިޝަނުން މާލޭގައި ބޭއްވި ސައިކަލު ބުރާއެކު ބޭއްވި އެއްވުމާ ގުޅިގެންނެވެ.

ފުލުހުންގެ އިދާރާއަށް ހާޒިރުވުމަށްފަހު، ނޫސްވެރިނަށް މައުލޫމާތު ދެއްވަމުން އަބްދުއްރަހީމް ވިދާޅުވީ، ފުލުހުންގެ އިދާރާ އަށް ހާޒިރު ކުރީ، ޖިނާއީ ތަހުގީގަކަށް ނޫންކަމަށާއި ޖޫރިމަނާ ކުރުމަށް ކަމަށް ފުލުހުންގެ އިދާރާއަށް ވަޑައިގެންނެވުމުން ތަހުގީގު ޓީމުން ބުނި ކަމަށެވެ. ނަމަވެސް އަބްދުއްރަހީމް ވިދާޅުވީ، އޭނާ ޖޫރިމަނާ ކުރަންޖެހޭ ކުށެއް ކޮށްފައިނުވާނެ ކަމަށެވެ.

އަބްދުއްރަހީމް ވަނީ، ހުކުރު ދުވަހުގެ ރޭ އަލިފާނުގެ ހާދިސާ ހިނގި ސަރަހައްދަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވަޑައިގެން، އުޅުއްވިއިރު، އެތަނުގައި ގައި ދުރުކަން ނެތްކަމަށާއި ރައްޔިތުންގެ މަޖިލީހުގެ ނައިފަރު ދާއިރާގެ މެމްބަރު އަދި ޕީއެންސީގެ ނައިބު ރައީސް އަހުމަދު ޝިޔާމުއަށް އަނިޔާވާ ގޮތަށް ރައްޔިތުންގެ މަޖިލީހުގެ ޖަލްސާއިން ނެރެލެއްވި ޖަލްސާ، ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ކުރިއަށް ގެންދެވީ ގައިދުރުކަން ނުބަހައްޓަވާ ކަމަށެވެ. އަދި ރައީސް ނަޝީދު ލިޔުއްވާފައިވާ "ދެ ރަދުން" ގެ ފޮތް، އެމަނިކުފާނު ނެރެދެއްވުމަށް ބޭއްވި އިވެންޓްތަކުގައި ވެސް ގައިދުރުކަމާއި މާސްކު އަޅުއްވާފައިނުވާ ކަމަށެވެ.

އެހެންކަމުން ޖޫރިމަނާ ކުރުމުގައި ގާނޫނުއަސާސީގައި ބުނާ ހަމަހަމަކަން ވެސް ނެތް ކަމަށް އަބްދުއްރަހީމް ވިދާޅުވި އެވެ.

އެހެންކަމުން އަބްދުއްރަހީމް ޖޫރިމަނާ ކުރި މައްސަލަ ކޯޓަށް ހުށަހަޅުއްވާނެ ކަމަށް އޭނާގެ ގާނޫނީ ވަކީލުން ވިދާޅުވި އެވެ.

ޕީޕީއެމް-ޕީއެންސީ ކޯލިޝަނުން މީގެކުރިން މާލޭގެ މަގުތަކުގައި މުޒާހަރާކޮށް، ކަނޑުމަތީގައި އޮޑި ދޯނި ފަހަރުގައި ވެސް ވަނީ މުޒާހަރާ ކޮށްފަ އެވެ.

މާލެ ސަރަހައްދުގައި ފަސް މީހުންނަށް ވުރެ ގިނައިން އެއްވެ އުޅުމަކީ އާންމު ސިއްހަތުގެ ކުއްލި ނުރައްކަލުގެ ހާލަތުގައި ހެލްތް ޕްރޮޓެކްޝަން އެޖެންސީ (އެޗްޕީއޭ)އިން މަނާކޮށްފައިވާ ކަމެކެވެ.

ކޮވިޑް-19 ފެތުރުން ކޮންޓްރޯލް ކުރުމަށް އެޗްޕީއޭއިން އެކުލަވާލާފައިވާ ގައިޑްލައިންތަކާއި މިންގަނޑުތަކާއި ޚިލާފަށް އިދިކޮޅު ކޯލިޝަނުން ކުރިޔަށް ގެންދިޔަ އެއްވުމާއި ގުޅިގެން ކަމާބެހޭ ފަރާތްތަކުން ބުނެފައިވަނީ އެކަން ބަލަމުންދާ ކަމަށެވެ. އިދިކޮޅު އިސްފަރާތްތަކުން ފުލަހަށް ހާޒިރުވާން ޗިޓް ފޮނުވަމުންދާތީ އިދިކޮޅުން ބުނަމުން އަންނަނީ މިއީ ސަރުކާރު ބަލިކަށިވަމުންދާތީ ބާރުގެ ބޭނުންކޮށްގެން ކުރަމުންދާ ކަންތައްތަކެއް ކަމަށެވެ.

އަބްދުއްރަހީމް ފުލުސް އޮފީހަށް ހާޒިރު ހާޒިރުކޮށްފައިވާއިރު، މި މައްސަލާގައި، ޕީޕީއެމްގެ ނާއިބު ރައީސް އަހުމަދު ޝިޔާމް އާއި ކުރީގެ ރައީސް ޑރ. މުހައްމަދު ވަހީދު ހަސަން މަނިކާއި ޕީއެންސީގެ ނައިބު ރައީސް އަދި ބާރަށު ދާއިރާގެ ކުރީގެ މެންބަރު އިބްރާހިމް ޝުޖާއު ވެސް ފުލުހަށް ހާޒިރުކޮށްފައި ވެއެވެ. އެހުރިހާ ބޭފުޅުންވެސް 1000ރ އިން ޖޫރިމަނާ ކޮށްފައިވާއިރު، ވަހީދު ވަނީ ގާނޫނީ ވަކީލަކާއެކު ވަޑައިގެންނެވުމަށް އިތުރު ފުރުސަތެއް ދެއްވުމަށް އެދިވަޑައިގަންނަވާފަ އެވެ.