އަޔަކްސްއަށް ކުޅެމުން އަންނަ ނެދަލެންޑްސްގެ މިޑްފީލްޑަރު ޑޯނީ ވެން ޑަ ބީކް ހޯދުމަށް މެންޗެސްޓާ ޔުނައިޓެޑުން މަސައްކަތް ކުރަމުންދާ ކަމަށް ރިޕޯޓުތައް ބުނެފިއެވެ.

މީގެ ކުރިން ބާސެލޯނާގެ ކޯޗުގެ މަގާމާ ނެދަލެންޑްސްގެ ރޮނާލްޑް ކޫމަން ހަވާލުވުމާއެކު، އޭރު ބެލެވިފައި އޮތީ ވެން ޑަ ބީކް ބާސާއަށް ބަދަލުވާނެ ކަމަށެވެ. އެކަމަކު ބާސާއިން ވެން ޑަ ބީކް ހޯދުމަށް މަސައްކަތް ކުރަމުން ނުދާ ކަމަށް ރިޕޯޓުތައް ބުނެއެވެ.

އެއާއެކު އިނގިރޭސި މީޑިއާތަކުން ވަނީ އުމުރުން 23 އަހަރުގެ ވެން ޑަ ބީކަށް ބިޑް ކުރުމަށް ޔުނައިޓެޑުން ތައްޔާރުވަމުން އަންނަ ކަމަށް ރިޕޯޓުކޮށްފައެވެ.

ވެން ޑަ ބީކް ޔުނައިޓެޑާ ގުޅޭނެ ކަމަށް ބެލެވޭއިރު، އަޔަކްސްއިން ހޮނިހިރު ދުވަހު އެއިންޓްރެކްޓް ފްރެންކްފަޓާ ދެކޮޅަށް ކުޅުނު އެކުވެރިކަމުގެ މެޗަށް އެކުލަވާލި ސްކޮޑުގައި ވެން ޑަ ބީކް ހިމަނާފައެއް ނުވެއެވެ.

އަޔަކްސްގެ މެދުތެރޭގައި ޒުވާން މިޑްފީލްޑަރު މޮޅު ކުޅުމެއް ދައްކަމުން އަންނައިރު، އޭނާ ވަނީ މިހާތަނަށް އެޓީމަށް 175 މެޗު ކުޅެދީ 41 ލަނޑު ކާމިޔާބުކޮށްފައެވެ. އަދި ވަނީ އަޔަކްސްއާއެކު 2018-2019 ވަނަ އަހަރުގެ ނެދަލެންޑްސް ލީގު ކާމިޔާބުކޮށްފައެވެ.

ވެން ޑަ ބީކް ހޯދުމުގެ މަސައްކަތް ޔުނައިޓެޑުން ކުރަމުން އަންނައިރު، އަދި މިހާތަނަށް އެ ކުލަބުން މި ޓްރާންސްފާ ބާޒާރުގައި ޚަރަދެއް ކޮށްފައެއް ނުވެއެވެ. މި ޓްރާންސްފާ ބާޒާރުގައި ބޮޑު ޚަރަދެއް ނުކުރެވޭނެ ކަމަށް ޔުނައިޓެޑްގެ އެގްޒެކްޓިވް ވައިސް ޗެއާމަން އެޑް ވުޑްވާޑް މީގެ ކުރިން ވިދާޅުވެފައިވާއިރު، ބޮރޫޝިއާ ޑޯޓްމުންޑަށް ކުޅެމުން އަންނަ ފޯވާޑް ޖޭޑަން ސަންޗޯ ހޯދުމުގެ މަސައްކަތުގައިވެސް ޔުނައިޓެޑް ވަނީ ނާކާމިޔާބުވެފައެވެ.