ކާޑުގެ ބާވަތްތައް ހިލޭ ފޯރުކޮށްދިނުމަށް ހުށައެޅި ކުއްލި މައްސަލަ ބޭރުކޮށްލައިފި
ކޮވިޑް-19 ގެ ހާލަތު ރަނގަޅުވަންދެން ކާޑު ހިލޭ ފޯރުކޮށްދިނުމަށް ގޮވާލި
މަޑުއްވަރީ ދާއިރާގެ މެމްބަރު އާދަމް ޝަރީފް
ކޮވިޑް-19 ގެ ހާލަތާއި ގުޅިގެން ރާއްޖޭގެ ރައްޔިތުންނަށް ބޭނުންވާ ކާޑުގެ ބާވަތްތައް ހިލޭ ފޯރުކޮށްދިނުމަށް އެދި މަޑުއްވަރީ ދާއިރާގެ މެމްބަރު އާދަމް ޝަރީފް ހުށައެޅުއްވި ކުއްލި މައްސަލަ މަޖިލީހުގެ ތަޅުމުން ބޭރުކޮށްލައިފިއެވެ.
ބުދަ ދުވަހުގެ މަޖިލީހުގެ ޖަލްސާގައި ކުއްލި މައްސަލަ ހުށައަޅަމުން އާދަމް ޝަރީފް ވިދާޅުވީ، ކޮވިޑް-19 އާއި ގުޅިގެން ރާއްޖޭގައި ސިއްހީ ކުއްލި ނުރައްކަލުގެ ހާލަތު އިއުލާންކުރުމާ ގުޅިގެން, ރައްޔިތުން ގިނަ ދުވަސްތަކެއް ވަންދެން ރަށު ބަންދުގައި ތިބެން ޖެހުމުން ދިވެހިންގެ މައިއްސަތައްޓަކައި ކުރަމުން ދިޔަ ހުރިހާ މަސައްކަތްތަކެއް ހުއްޓާލަން ޖެހިފައިވާ ކަމަށެވެ.
ރައްޔިތުންގެ އާމްދަނީތައް އެއްކޮށް ހުއްޓި, ވަޒިފާތައް ގެއްލި، ދިރިއުޅުމުގެ ހާލަތު ވަރަށް ބޮޑަށް ދަށަށް ގޮސްފައިވާ ކަމަށް ޝަރީފް ވިދާޅުވިއެވެ. އަދި ރާއްޖޭގައި ކޮވިޑް-19 ކޮންޓްރޯލް ނުކުރެވި އިތުރު ލޮކްޑައުނަކަށް ދާންޖެހިދާނެ ކަމަށް ސިއްހީ މާހިރުން އިންޒާރުދެމުންދާ ކަމަށާއި ރައްޔިތުންނަށް އާމްދަނީ ލިބޭނެ ގޮތެއް ނެތި ގިނަ ދުވަސްތަކެއް ވަމުން ދާކަމަށް ޝަރީފް ފާހަގަކުރެއްވިއެވެ.
އެހެންކަމުން ރައްޔިތުންގެ ބަނޑުފުރައި މުއްތިކުރުމަށް ބޭނުންވާ ފުރާގު ރައްޔިތުންނަށް ލިބޭނެކަން ކަށަވަރުކުރުމަށް ރައްޔިތުންނަށް މަސައްކަތް ކުރެވޭނެ ހާލަތަކަށް ބަލިމަނޑުކަން ކޮންޓްރޯލް ކުރެވެންދެން ދައުލަތުގެ ވަޒީފާ އަދާކުރާ މީހުންނާއި ދައުލަތުގެ އިނާޔަތެއް ލިބޭ މީހުން ފިޔަވައި އެހެން ހުރިހާ ދިވެހިންނަށް ކާޑުގެ ބާވަތްތައް ހިލޭ ފޯރުކޮށްދިނުމަށް ގޮވާލާކަމަށް ޝަރީފް ވިދާޅުވިއެވެ.
އެހެންނަމަވެސް މި މައްސަލައަށް މަޖިލީހުގައި ބަހުސްކުރުމަށް ނެގި ވޯޓުން 24 މެމްބަރުންގެ އަގުލަބިއްޔަތުން މައްސަލަ ބަލައިނުގަނެ ބޭރުކޮށްލީއެވެ. މައްސަލަ ބަލައިގަންނަން ހަތް މެމްބަރުން ވޯޓުލާފައިވާއިރު، އެއްވެސް ގޮތަކަށް ވޯޓު ނުލައްވާ ދެ މެމްބަރުން ތިއްބެވިއެވެ. މިއަދުގެ މަޖިލީހަށް ހާޒިރުވެ ތިއްބެވި 39 މެމްބަރުންގެ ތެރެއިން 31 މެމްބަރުން ވަނީ ވޯޓުގައި ބައިވެރިވެފައެވެ.
ޝަރީފް މި ކުއްލި މައްސަލަ ހުށައަޅާފައިވާއިރު، މިދިޔަ ސަރުކާރުން ވަނީ 2016 ވަނަ އަހަރުގެ އޮކްޓޯބަރު މަހުގެ އެއް ވަނަ ދުވަހު ކާޑުގެ ބާވަތްތަކުގެ އަގު 100 އިންސައްތަ ބޮޑުކޮށް ސަބްސިޑީސް ކަނޑާލާފައެވެ.
