ރަށްގިރުމުގެ މައްސަލަ ދިމާވެފައިވާ ރަށްރަށުގެ އަމަލީ މަސައްކަތް އަވަހަށް ފެށުމަށް ސަރުކާރަށް މަޖިލީހުން ގޮވާލައިފި
25 އޯގަސްޓު 2020 | އަންގާރަ 10:57ރިޕޯޓް ފާސްކޮށްފައިވަނީ 65 މެމްބަރުންގެ ވޯޓުން
ރައްޔިތުންގެ މަޖިލީހުގެ ޖަލްސާގެ ތެރެއިން
ރަށްގިރުމުގެ މައްސަލަ ދިމާވެފައިވާ ވ ފުލިދު އާއި އެހެނިހެން ރަށްރަށަށް ދިމާވެފައިވާ މައްސަލަ ހައްލުކޮށްދެއްވުމުގެ އަމަލީ މަސައްކަތް އަވަހަށް ކުރިޔަށް ގެންދިޔުމަށް ގޮވާލާ ގަރާރު މަޖިލީހުން ފާސްކޮށްފި އެވެ.
މިއީ ވ. ފުލިދޫ އާދަޔާ ޚިލާފަށް ގިރަމުންދާތީ މިކަމުގެ ސަބަބުން ފުލިދޫގެ ތިމާވެއްޓަށް ދިމާވެފައިވާ ނާޒުކު ހާލަތުގެ ސަބަބުން ރައްޔިތުންނަށް ދިމާވެފައިވާ ދަތިތަކާ، ގިރަމުންދާ މައްސަލަ ހައްލުކުރުމަށް އަޅަންޖެހޭ ފިޔަވަޅުތައް އެޅުމަށް ސަރުކާރުގެ ކަމާބެހޭ ފަރާތްތަކަށް އިލްތިމާސް ކުރުމަށްޓަކައި ފެލިދޫ ދާއިރާގެ މެމްބަރ އިބްރާހީމް ފަޒުލް ރަޝީދު ހުށަހެޅުއްވި ގަރާރެކެވެ. މިގަރާރު ދިރާސާކުރި އެންވަޔަރަންމަންޓް އެންޑް ކްލައިމެޓް ޗޭންޖް ކޮމިޓީގެ ރިޕޯޓް ފާސްކުރުމަށް އަންގާރަ ދުވަހު ނެގުނު ވޯޓުގައި ބައިވެރިވެވަޑައިގެންނެވި 65 މެމްބަރުންގެ އިއްތިފާގުން ވަނީ މިގަރާރު ފާސްވެފައެވެ. އެހެންނަމަވެސް މިވޯޓަށް މި ޤަރާރު މަޖީހަށް ހުށަހެޅުއްވި ފަޒުލް ބައިވެރިވެ ވަޑައިގެންފައެއްނުވެއެވެ. މެމްބަރު އެވަގުތު ހުންނެވީ އިދިކޮޅު މެމްބަރުންނާއިއެކު ސިޔާސީ ހަރަކާތެއްގައެވެ.
މިބިލް ދިރާސާކުރެއްވި ރައްޔިތުންގެ މަޖިލީހުގެ އެންވަޔަރަމަންޓް އެންޑް ކްލައިމެޓް ކޮމިޓީގެ މުޤައްރިރު ހޯރަފުށީ ދާއިރާގެ މެމްބަރު އަހުމަދު ސަލީމް ވިދާޅުވީ، ރަށްގިރުގެ މައްސަލައަކީ ފުލިދުއެކޭ އެއްގޮތަށް މުޅި ރާއްޖެއަށް ކުރިމަތިވެފައިވާ ބޮޑު މައްސަލައެއްކަމަށެވެ. މިމައްސަލަ ވީހާވެސް އަވަހަށް ހައްލުކޮށް ފުލިދޫ ރައްޔިތުންގެ ސަލާމަތާއި ރައްކާތެރިކަމަށްޓަކައި ރަށްގިރުމުގެ މައްސަލަ ހައްލުކޮށް ދެއްވުމަށް ކޮމިޓީގެ މެމްބަރުން އިއްތިފާގުން ފާސްކޮށްފައިވާކަމަށް ސަލީމް ވިދާޅުވިއެވެ.
ގަރާރު ހުށަހަޅުއްވަމުން ފަޒުލް ވިދާޅުވީ ފުލިދޫ އާދަޔާ ޚިލާފަށް ގިރަމުން ދިޔުމުގެ ސަބަބުން ރަށުގެ ތިމާވެއްޓަށް ކުރިމަތިވެފައިވާ ނާޒުކު ހާލަތުގެ ސަބަބުން ފުލިދޫގެ ރައްޔިތުންނަށް ބިރުވެރިކަން ކުރިމަތިވެފައިވާ ކަމަށެވެ. އަދި ރައްޔިތުންގެ ގޯތިގެދޮރަށް ކުރިމަތިވެފައިވާ ނުރައްކަލުގެ ސަބަބުން އެފަރާތްތަކުގެ ދިރިއުޅުމަށް ކުރިމަތިވެފައިވާ ގޮންޖެހުންތައް ބޮޑުވެފައިވާ ކަމަށް ވެސް ފަޒުލް ވިދާޅުވިއެވެ. އެގޮތުން ފުލިދޫ މިސްކިތް ހުންނަ ސަރަހައްދު ގިރައިގެން ގޮސް މިސްކިތުގެ އިމާރާތަށް ގެއްލުންވުމުގެ ފުރުސަތު ބޮޑުވެފައިވާ ކަމަށާއި ޒުވާނުން ކުޅެން އޮންނަ ބޯޅަ ދަނޑުގެ ވަށާފާރާ ހަމައަށް އެ ސަރަހައްދު ގިރައި ގެންގޮސްފައިވާ ކަމަށް ފަޒުލް ވިދާޅުވިއެވެ.
