އެމްއެމްއޭގެ ޑެޕިއުޓީ ގަވަރުނަރު ކަމަށް އިމާދު އައްޔަނު ކުރުމާއި ގުޅޭ މައްސަލަ ކޮމިޓީއަށް

މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ޑެޕިއުޓީ ގަވަރުނަރުކަމުގެ މަގާމަށް އަހުމަދު އިމާދު އައްޔަނު ކުރުމާއި ގުޅޭ މައްސަލަ ކަމާ ގުޅޭ ދާއިމީ ކޮމިޓީއަށް ފޮނުވައިފިއެވެ.

ހޯމަ ދުވަހުގެ ޖަލްސާގައި މި މައްސަލަ ދިރާސާ ކުރުމަށް ފޮނުވާފައިވަނީ މަޖިލީހުގެ މާލިއްޔަތު ކޮމިޓީއަށެވެ.

Advertisement

އެމްއެމްއޭގެ މަނިޓަރީ ޕޮލިސީ ރިސާޗް އެންޑް ސްޓެޓިސްޓިކްސް ޑިވިޝަންގެ އެގްޒެކްޓިވް ޑިރެކްޓަރގެ މަގާމު އަދާ ކުރައްވަމުން ގެންދަވާ އިމާދަކީ އެސީއެމްޑީއޭގެ ބޯޑް މެމްބަރެއްގެ ގޮތުގައި މިހާރުވެސް މަސައްކަތްކުރައްވާ ބޭފުޅެކެވެ.

އޭނާ ގެންދަވަނީ 2000 ވަނަ އަހަރުން ފެށިގެން އެމްއެމްއޭގައި މަސައްކަތް ކުރައްވަމުންނެވެ. އަދި ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)ގައި ވެސް މަސައްކަތްކުރައްވާފައިވެއެވެ.

މީގެ އިތުރުން ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް) ގެ ހުސްވެފައިވާ މަގާމުތައް ކުރިމަތިލައްވާފައިވާ ބޭފުޅުންގެ ނަންތައް ދިރާސާ ކުރުމަށް ވަނީ މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމިޓީއަށް ފޮނުވާފައެވެ. މި މަގާމުތަކަށް ކުރިމަތިލެއްވި ބޭފުޅުންގެ ތެރެއިން 8 ބޭފުޅެއްގެ ނަން ދިރާސާ ކުރުމަށް ކޮމީޓިއަށް ވަނީ ފޮނުވާފައެވެ.

އެ ކޮމިޝަންގެ ހުސްވެފައިވާ މެންބަރުންގެ މަޤާމުތަކަށް ބޭފުޅުން ޢައްޔަންކުރެއްވުމަށްޓަކައި ރައްޔިތުންގެ މަޖިލީހަށް ނަންތައް ހުށަހަޅުއްވާފައި ވަނީ އެ ކޮމިޝަނުގެ 3 މެންބަރުން އިސްތިޢުފާ ދެއްވާފައިވާތީ އާއި އެއް މެމްބަރެއްގެ މަގާމުގެ މުއްދަތު ހަމަވާތީއެވެ. އަދި އެ ކޮމިޝަންގެ މެންބަރެއްގެ މެންބަރުކަމުގެ މުއްދަތު، 12 ސެޕްޓެންބަރު 2020 ގެ ނިޔަލަށް ހަމަވާތީ، އެ މަޤާމުތަކަށް މެންބަރުން ޢައްޔަންކުރެއްވުމަށްޓަކައެވެ.

ކޮމިޝަންގެ މެމްބަރުކަމުން އިސްތިއުފާ ދެއްވާފައިވަނީ ކޮމިޝަންގެ ރައީސްގެ މަޤާމުގައި ހުންނެވި އައިމިނަތު އީނާސްގެ އިތުރުން އައިޝަތު އަފްރީން އެވެ. އަދި ކޮމިޝަނުގެ މެންބަރު މޫސާ ޢަލީ ކަލޭފާނެ އެވެ. 3 މެމްބަރުންވެސް މަޤާމުން އިސްތިއުފާ ދެއްވާފައިވަނީ އިތުބާރު ނެތްކަމުގެ މައްސަލަ ރައްޔިތުންގެ މަޖިލީހުން ކުރިއަށްގެންދަން ފެށުމުންނެވެ.

އޭގެއިތުރުން ކޮމިޝަނުގެ ނާއިބު ރައީސް މުހައްމަދު ޒާހިދު މަޤާމުން ވަކިކުރުމަށް ފާސްކޮށްފައިވެއެވެ. އެގޮތަށް ފާސްކޮށްފައިވަނީ ޖުލައި މަހުގެ 22 ވަނަ ދުވަހު އެވެ.