"ޝާހިދަށް ފުރިހަމަ އިތުބާރު އެބައޮތް"
ރައީސް ނަޝީދު ވަނީ މިނިސްޓަރ ޝާހިދަށް ސާބަސް ރައްދު ކުރައްވައި ޓްވީޓު ކުރައްވާފަ
ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު އާއި ފޮރިން މިނިސްޓަރ އަބްދުﷲ ޝާހިދު
މިނިސްޓަރ އޮފް ފޮރިން އެފެއާޒް އަބްދުﷲ ޝާހިދަށް ފުރިހަމަ އިތުބާރު އެބައޮތް ކަމަށް ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވެއްޖެއެވެ.
މިނިސްޓަރ ޝާހިދުގެ އިތުބާރު ނެތް ކަމުގެ މައްސަލަ މަޖިލީހަށް ވެއްދުމަށް ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަބްދުﷲ ޖާބިރު ނިންމަވާފައިވާ ކަމަށް އަޑުފެތުރިފައިވާ މި ދަނޑިވަޅުގައި ރައީސް ނަޝީދު ކުރެއްވި ޓްވީޓެއްގައި ވިދާޅުވީ، ފޮރިން މިނިސްޓަރ ޝާހިދަށް އެމަނިކުފާނުގެ ފުރިހަމަ އިތުބާރު އެބައޮތް ކަމަށެވެ.
ރައީސް ނަޝީދުގެ ޓްވީޓުގައި ވަނީ މިނިސްޓަރ ޝާހިދަށް ސާބަސް ރައްދު ކުރައްވާފައެވެ.
މި މައްސަލައާއި ގުޅިގެން އާންމު ވެފައިވާ އޯޑިއޯ ކްލިޕްގައި ޖާބިރު ވިދާޅުވެފައިވަނީ މިނިސްޓަރ ޝާހިދުގެ އިތުބާރު ނެތްކަމުގެ މައްސަލަ ވެއްދުމުގެ މަސައްކަތް ކުރިއަށްދާ ކަމަށާއި އަންނަ ހޯމަ ދުވަހު އެ މައްސަލަ ވައްދާނެ ކަމަށެވެ. އެހެން ނަމަވެސް، އެ މައްސަލަ ކުރިއަށް ގެންދަނީ އިދިކޮޅު ފަރާތްތަކާއި ގުޅިގެން ނޫން ކަމަށް ޖާބިރު ވަނީ ވިދާޅުވެފައެވެ.
އަދި މައްސަލަ ވެއްދުމަށްޓަކައި 11 މެންބަރުންގެ ވޯޓު ހަމަވެފައިވާ ކަމަށް ވެސް ޖާބިރު ވިދާޅުވިއެވެ.
