އައްސަދުގެ މައްސަލަ ރިވިއުކޮށްދޭން އޭސީސީން ޕީޖީގަައި އެދިއްޖެ
20 އޯގަސްޓު 2020 | ބުރާސްފަތި 17:45އައްސަދު އަށް ތުހުމަތު ކުރެވެނީ ގުރުއާން ޗާޕްކުރުމުގައި ކޮރަޕްޝަންގެ އަމަލު ހިންގި މައްސަލައެއް
އެސެޓް ރިކަވަރީ ކޮމިޝަންގެ ރައީސް އައްސަދު
ކޮރަޕްޝަނާއި ހިޔާނާތުގެ މައްސަލަ ބަލަން ރައީސް އިބްރާހިމް މުހައްމަދު ސޯލިހު އެކުލަވާލީ އެސެޓް ރިކަވަރީ ކޮމިޝަންގެ ރައީސް އައްސަދުގެ މައްޗަށް މީގެ ކުރިން ކުރެވުނު ކޮރަޕްޝަންގެ ތުހުމަތުތައް އަލުން ރިވިއުކޮށް ދޭން އެންޓި ކޮރަޕްޝަން ކޮމިޝަން (އޭސީސީ) އިން ޕްރޮސެކިއުޓަރ ޖެނެރަލް (ޕީޖީ) ގައި އެދިއްޖެ އެވެ.
ކުރީގެ ރައީސް މުހައްމަދު ނަޝީދުގެ ވެރިކަމުގައި ފިނޭންސް މިނިސްޓްރީގެ ސްޓޭޓް މިނިސްޓަރު ކަމުގެ މަގާމުގައި އައްސަދު ހުންނެވިއިރު ކޮރަޕްޝަންގެ މައްސަލަތަކެއް އޭސީސީ އަށް ހުށައެޅި އެ މައްސަލަ ބެލިއެވެ. ނަމަވެސް އެ މައްސަލާގައި ކޮރަޕްޝަން ނެތް ކަމަށް އޭރު އޭސީސީން އޮތީ ނިންމާފައެވެ.
އެހެން އޮއްވާ އޭސީސީން ވަނީ އަލުން އެ މައްސަލަ ރިވިއުކޮށްދޭން ޕީޖީގައި އެދިފައެވެ. ޕީޖީގެ އޮފިޝަލަކު ރާއްޖެ.އެމްވީ އަށް ވިދާޅުވީ، އެ މައްސަލަ ރިވިއުކުރަން އެދުނީ ޖީނާއީ އިޖުރާތާ ހިލާފަށް ކަމަށެވެ. އެކަމާއި ގުޅޭ ގޮތުން ޕީޖީ އޮފީހުން ވަރަށް އަވަހަށް އޭސީސީއާ ބައްދަލުކުރަން ހަމަޖެހިފައިވާ ކަމުގެ މައުލޫމާތު ވަނީ ލިބިފައެވެ.
