ކޮވިޑް-19އަށް ޕޮޒިޓިވްވާ ގިނަ މީހުންގެ ތެރޭގައި ގިނައިން ހިމެނެނީ ވަޒީފާއެއްގައި ނޫޅޭ މީހުން ކަމަށް ހެލްތް އިމަރޖެންސީ އޮޕަރޭޝަންސް ސެންޓަރު (އެޗްއީއޯސީ)ން ބުނެފިއެވެ.

ބުދަ ދުވަހުގެ ރޭ އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި އެޗްޕީއޭގެ އެޕިޑަމޮލޮޖިސްޓް ޑރ. އިބްރާހިމް އަފްޒަލް ވިދާޅުވީ އެއްދުވަހުން އަނެއް ދުވަހަށް ކޭސްތައް އިތުރުވަމުން އަންނައިރު، އެކި ދާއިރާތަކުގައި މަސައްކަތް ކުރާ މީހުން ޕޮޒިޓިވްވަމުންދާ ކަމަށެވެ.

އެގޮތުން ކާބޯތަކެތީގެ ޚިދުމަތް ދޭ ތަންތަންތަނުގައި މަސައްކަތް ކުރާ މީހުންނާއި، ކޮންސްޓްރަކްޝަން ދާއިރާގައި އުޅޭ މީހުންނާއި، ޑެލިވަރީގެ ޚިދުމަތް ދޭ މީހުންނާއި، ޑްރައިވަރުންނާއި، ބޯޓު ފަހަރު ދުއްވާ މީހުންނާއި، މަސްވެރިންނާއި، ފްރޮންޓްލައިން ވޯކާސް، ގެސްޓް ހައުސްތަކުގައި އަދި ގެތަކުގައި އެކިއެކި މަސައްކަތް ކުރާ މީހުންގެ އިތުރުން ލޭބަރުން، މާރުކޭޓު، މިސްކިތްތަކުން، އެންޖީއޯތައް، ގޭގެއަށް ގޮސް ސަރވިސްތައް ދޭ މީހުންނާއި، ސްކޫލުތަކުން އަދި ފިހާރަތަކުގައި މަސައްކަތް ކުރާ މީހުން ޕޮޒިޓިވްމުން އަންނަ އަދަދު ވަކިން ބަލަމުން އަންނަ ކަމަށް ޑރ. އަފްޒަލް ވިދާޅުވިއެވެ.

މީގެ ތެރެއިން ވެސް ވަޒީފާއެއްގައި ނޫޅޭ މީހުން ބައްޔަށް ޕޮޒިޓިވްވާ މީހުން ވަރަށް ބޮޑަށް އިތުރުކަން ޑރ. އަފްޒަލް ފާހަގަކުރެއްވިއެވެ. ޑރ.އަފްޒަލް ވިދާޅުވީ ވަޒީފާއެއް ނެތި ޕޮޒިޓިވްވާ މީހުންގެ ތެރޭގައި ގިނައިން ހިމެނެނީ ވެސް ޒުވާނުން ކަމަށެވެ.

ވަޒީފާއެއް ނެތް ގިނަ އަދަދެއްގެ ޒުވާނުން ޕޮޒިޓިވްވާ ސަބަބުތަކަށް އަލިއަޅުއްވާލައްވާ ޑރ. އަފްޒަލް ވިދާޅުވީ މަސައްކަތެއް ނެތި ގޭގައި ހުންނަން ޖެހުމުން ގިނަ ވަގުތު ބޭރުގައި އުޅުމާއި، ގިނައިން ކެޕޭ ރެސްޓައުރެންޓްތަކަށް ދިޔުމުގެ އިތުރުން ދިރިއުޅޭ ގޭއަށް ބޭނުންވާ އެކިއެކި ސާމާނު ގަތުމުގައި އެމީހުން ހަރަކާތްތެރިވެ އުޅޭ މިންވަރު އިތުރު ކަމަށެވެ.

އެހެންކަމުން ޑރ. އަފްޒަލް ވަނީ ކޮންމެހެން ގެއިން ބޭރަށް ނުކުންނަން ޖެހިގެން މެނުވީ ނުނިކުތަމަށް އިލްތިމާސް ކުރައްވާފައެވެ.

މީގެ އިތުރުން ޑރ. އަފްޒަލް ވިދާޅުވީ ޕޮޒިޓިވްވާ ކޭސްތަކުގެ އުމުރު ފުރައަށް ބަލާއިރު އެންމެ ގިނައީ 18 އަހަރާއި 39 އަހަރުގެ ދެމެދުގެ މީހުން ކަމަށެވެ. ދެވަނަ އަށް އެންމެ ގިނައީ 40 އަހަރާއި 64 އަހަރުގެ ދެމެދުގެ އުމުރު ފުރާ މީހުން ކަމަށް ޑރ. އަފްޒަލް ވިދާޅުވިއެވެ.