ކަރެކްޝަނަލް ސަރވިސްގެ ޚިދުމަތަށް 49 އަހަރު!

މޯލްޑިވްސް ކަރެކްޝަނަލް ސަރވިސްގެ ޚިދުމަތަށް 49 އަހަރު ފުރިއްޖެއެވެ.

މޯލްޑިވްސް ކަރެކްޝަނަލް ސަރވިސްގެ 49 ވަނަ އަހަރީ ދުވަހުގެ މުނާސަބަތުގައި ހުކުރު ދުވަހު ކޮމިޝަނަރ އޮފް ޕްރިޒަންސް އަހުމަދު މުޙައްމަދު ފުޅު ނެރުއްވި މެސެޖެއްގައި ވިދާޅުވީ، ޖަލުތަކުގެ ހިންގުމުގެ ނިޒާމަށް ގެނެވުނު ބޮޑު ބަދަލާއިއެކު، މީހުން ރިހެބިލިޓޭޓް ކުރުމުގެ މައްސޫލިއްޔަތު ޤާނޫނަކުން މަތިކުރުމާއެކު މި ސަރވިސްއަކީ ބުރަ އަދި އަގުހުރި ޤައުމީ ޚިދުމަތެއް އަދާކުރަމުން ގެންދާ މުއައްސަސާއެއް ކަމަށެވެ.

އޭގެ އިތުރުން، ޖަލުތަކުގެ ހިންގުމުގެ ނިޒާމާއި، ޙުކުމް ތަންފީޒު ކުރުމަށްޓަކައި ޖަލަށް ގެނެވޭ މީހުންނަށް ހިންގާ ޕްރޮގްރާމްތަކަށް ބޮޑެތި ބަދަލުތަކެއް ގެނައުމުގެ މަސައްކަތްވެސް ފެށިފައިވާކަމަށް ކޮމިޝަނަރގެ މެސެޖުގައި ބަޔާން ކޮށްފައިވެއެވެ. އަދި ދިވެހިރާއްޖޭގެ ޖަލުތަކުގެ ހަޔާތުގެ ފާއިތުވި މާޒީގައި ތަފާތު އެކި ގޮންޖެހުންތަކާ އެކު ވެސް، އިސްލާހީ ހެޔޮބަދަލުތަކެއް ގިނަ ގޮތްގޮތުން ހޯދިފައިވާކަމަށް ބުނެފައިވެއެވެ.

ކޮމިޝަނަރ އިތުރަށް ވިދާޅުވީ، ޤައިދީން ބާކީނުކޮށް ގަދަރުވެރިކަމާއި އެކު އެނބުރި ރުޖޫއަ ކުރުމަކީ އެމް.ސީ.އެސްއިން ހާސިލު ކުރަންޖެހޭ ކަމެއް ކަމަށެވެ. އަދި އެކަން ހާސިލު ކުރުމަށްޓަކައި ގުޅުންހުރި ހުރިހާ ދާއިރާއެއްގެ އެއްބާރުލުމާއި އެހީތެރިކަން ބޭނުންވާ ކަމަށްވެސް މެސެޖުގައި ބަޔާން ކޮށްފައިވެއެވެ.