ޗެމްޕިއަންސް ލީގު ކާމިޔާބު ކުރަން ސިޓީ އޮތީ ކެތްމަދުވެފައި: ސްޓާލިން

ޔުއެފާ ޗެމްޕިއަންސް ލީގު ކާމިޔާބު ކުރުމަށް މެންޗެސްޓާ ސިޓީގެ ކުޅުންތެރިންނާއި އޮފިޝަލުން ތިބީ ކެތްމަދުވެފައި ކަމަށް އެ ޓީމުގެ ފޯވާޑް ރަހީމް ސްޓާލިން ބުނެފިއެވެ.

ދެވަނަ ބުރުގެ ދެވަނަ ލެގުގައި އަމިއްލަ ދަނޑުގައި 2-1 ން ސްޕެނިޝް ލީގުގެ ޗެމްޕިއަން ރެއާލް މެޑްރިޑްގެ މައްޗަށް ސިޓީން ކުރިހޯދިއިރު، ދެވަނަ ބުރުގެ ފުރަތަމަ ލެގުގައި ރެއާލްގެ ދަނޑުގައި ކުޅުނު މެޗުންވެސް ސިޓީ މޮޅުވީ 2-1 ންނެވެ. އެހެންކަމުން ސިޓީ ކުއާޓާއަށް ދަތުރުކުރީ 4-2 ގެ އެގްރިގޭޓް ނަތީޖާއަކުންނެވެ.

ސިޓީގެ ފޯވާޑް ލައިނުގައި މޮޅު ކުޅުމެއް ދައްކަމުން އަންނަ ސްޓާލިން ބުނީ މި ސީޒަނުގެ އިނގިރޭސި ޕްރިމިއާ ލީގު ސިޓީއަށް ގެއްލުނު ހިސާބުން، ސިޓީން އަމާޒު ހިފީ ޗެމްޕިއަންސް ލީގު ކާމިޔާބު ކުރުމަށް ކަމަށާއި، ސިޓީން ތައްޓަކާއި ނުލައި ސީޒަން ނިންމާލަން ބޭނުންނުވާ ކަމަށެވެ.

ޗެމްޕިއަންސް ލީގުގެ ދެވަނަ ބުރުގައި ރެއާލް މެޑްރިޑް އަތުން ލިބުނު ކާމިޔާބީއަކީ ޗެމްޕިއަންސް ލީގު ކާމިޔާބު ކުރުމަށް ލިބުނު ހިތްވަރެއް ކަމަށާއި، ޗެމްޕިއަންސް ލީގު ކާމިޔާބު ކުރުމަށް ސިޓީގެ ކުޅުންތެރިން ކުރެވެން ހުރި ހުރިހާ ކަމެއް ކުރާނެ ކަމަށްވެސް ސްޓާލިން ބުންޏެވެ.

ސްޓާލިން އިތުރަށް ބުނީ ޗެމްޕިއަންސް ލީގަކީ ކާމިޔާބު ކުރަން އުނދަގޫ މުބާރާތެއް ކަމަށާއި، އެކަމަކު މި މުބާރާތަކީ ކާމިޔާބު ނުކުރެވޭނެ މުބާރާތެއް ނޫން ކަމަށެވެ. އަދި ބުނީ ސިޓީން މިވަގުތު އޮތީ ވަރަށް ފޯމުގައި ކަމަށާއި، ރެއާލާއި ދެކޮޅަށް ސިޓީން ދެއްކި ކުޅުން މި މުބާރާތުގެ ބާކީ ހުރި މެޗުތަކުގައި ދައްކައިފިނަމަ، މި މުބާރާތް ސިޓީއަށް ކާމިޔާބުކުރެވޭނެ ކަމަށެވެ.

ސިޓީގެ ތާރީޚުގައި މިހާތަނަށް ޗެމްޕިއަންސް ލީގު ކާމިޔާބުކުރެވިފައި ނުވާއިރު، މި ފަހަރިގެ މުބާރާތުގެ ކުއާޓާ ފައިނަލުގައި ސިޓީ ބައްދަލުކުރަން ޖެހޭނީ އިޓާލިއަން ލީގުގެ ޗެމްޕިއަން ޔުވެންޓަސް ކަޓުވާލުމަށްފަހު ކުއާޓާއަށް ދަތުރުކުރި ލިޔޯން އާއެވެ. ޔުއެފާ އިން ވަނީ ކުއާޓާއިން ފަށައިގެން ޗެމްޕިއަންސް ލީގުގެ މެޗުތައް ޕޯޗުގަލްގެ ލިޒްބަންގައި ކުޅުމަށް ނިންމާފައެވެ.