ބަޔާން އަތުން ބަލިވުން އެއީ ޗެލްސީއަށް ލިބުނު ފިލާވަޅެއް: ލަމްޕާޑް

ޔުއެފާ ޗެމްޕިއަންސް ލީގުގެ ދެވަނަ ބުރުގައި ބަޔާން މިއުނިކް އަތުން ބަލިވުން އެއީ ޗެލްސީއަށް ލިބުނު ފިލާވަޅެއް ކަމަށް އެ ޓީމުގެ ކޯޗު ފްރޭންކް ލަމްޕާޑް ބުނެފިއެވެ.

ހޮނިހިރު ދުވަހުގެރޭ ކުޅުނު މެޗަށް ޗެލްސީން ނުކުތީ އަނިޔާގެ ސަބަބުން މުހިންމު ގިނަ ކުޅުންތެރިންތަކެއް ނުލައެވެ. އެގޮތުން މި މެޗުގައި ކްރިސްޓިއަން ޕުލިސިޗް އާއި ކެޕްޓަން ސެޒާ އެޒްޕަލިކުއެޓާ އާއި ފޯވާޑް ޕެޑްރޯ ރޮޑްރިގޭޒްގެ އިތުރުން ވިލިއަން އަނިޔާގެ ސަބަބުން ނުކުޅެއެވެ. މީގެ އިތުރުން ސަސްޕެންޝަނުގެ ސަބަބުން ޖޯޖީނިއޯ އާއި މާކޮސް އަލޮންސޯ ވެސް ނުކުޅެއެވެ.

ދެވަނަ ބުރުގެ ދެވަނަ ލެގުގައި ބަޔާނުން އަމިއްލަ ދަނޑުގައި 4-1 ން ޗެލްސީ ބަލިކުރިއިރު، ޗެލްސީގެ ދަނޑުގައި ކުޅުނު ފުރަތަމަ ލެގުގެ މެޗު 3-0 ން ބަޔާނުން ވަނީ ކާމިޔާބުކޮށްފައެވެ. އެހެންކަމުން އެގްރިގޭޓުން ބަޔާނަށް ކުރި ލިބުނީ 7-1 ގެ ތަފާތު ބޮޑު ނަތީޖާއަކުންނެވެ.

ޒުވާން ގިނަ ކުޅުންތެރިންތަކެއް ސްކޮޑުގައި ހިމަނައިގެން ޗެލްސީން ހޮނިހިރު ދުވަހުގެރޭގެ މެޗަށް ނުކުތްއިރު، މެޗުގައި ޗެލްސީ ކުޅުންތެރިން ދެއްކި ކުޅުމާ މެދު ފަޚުރުވެރިވާ ކަމަށް ލަމްޕާޑް ބުންޏެވެ. އޭނާ ބުނީ މެޗަށް ނުކުތްއިރު ހުރިހާ ގޮތަކުންވެސް ފައިދާ ބޮޑީ ބަޔާނަށް ކަމަށާއި، ބަޔާންގައި ތިބީ ތަޖުރިބާކާރު ކުޅުންތެރިން ކަމަށެވެ.

އެގޮތުން ޗެލްސީގެ ކުޅުންތެރިންނާއި ބަޔާންގެ ކުޅުންތެރިންގެ ތަޖުރިބާގެ ގޮތުން ބަލާނަމަ ޗެލްސީ ކުޅުންތެރިންނަކީ ތަޖުރިބާ މަދު ކުޅުންތެރިންތަކެއް ތިބި ކުލަބެއް ކަމަށާއި، އެކަމަކު މެޗުން ވަރަށް ރަނގަޅު ކަންތައްތަކެއް ފެނިގެންދިޔަ ކަމަށްވެސް ލަމްޕާޑް ބުންޏެވެ.

ލަމްޕާޑް އިތުރަށް ބުނީ މެޗުގެ ވަރަށް ކުރީކޮޅު ބަޔާނުން ދެ ލަނޑު ޖެހުން ވެގެންދިޔައީ ޗެލްސީއަށް އުނދަގޫވި ކަމެއް ކަމަށާއި، އެކަމަކު މި ނަތީޖާއަކީ ބަޔާނަށް ހައްގު ނަތީޖާއެއް ކަމަށެވެ. އަދި މި މުބާރާތުގެ މިވަގުތުގެ ފެވަރިޓުންނަކީވެސް ބަޔާން ކަމަށާއި، ބަޔާނަށް މި މުބާރާތް ކާމިޔާބުކުރެވޭނެ ކަމަށްވެސް ލަމްޕާޑް ވަނީ ބުނެފައެވެ.

ޗެލްސީގެ މައްޗަށް ކުރިހޯދާ ބަޔާން ކުއާޓާއިން ޖާގަ ހޯދިއިރު، ކުއާޓާގައި ބަޔާން ވާދަކުރަން ޖެހޭނީ ބާސެލޯނާއާއެވެ. ކުއާޓާގެ މެޗުތައް ކުޅުމަށް ޔުއެފާއިން ނިންމާފައިވަނީ ޕޯޗުގަލްގެ ވެރިރަށް ލިޒްބަންގައެވެ.