ބާސާ އާއި ބަޔާން ކުއާޓާއަށް

ޔުއެފާ ޗެމްޕިއަންސް ލީގުގެ ކުއާޓާ ފައިނަލްގެ ފަހު ދެ ޖާގަ ބާސެލޯނާ އާއި ބަޔާން މިއުނިކް ހޯދައިފިއެވެ.

މުބާރާތުގެ ކުއާޓާއަށް ބާސާ ދަތުރުކުރީ ހޮނިހިރު ދުވަހުގެރޭ އަމިއްލަ ދަނޑުގައި ކުޅުނު ދެވަނަ ބުރުގެ ދެވަނަ ލެގުގެ މެޗުން ނާޕޮލީ އަތުން 3-1 ން މޮޅުވެގެންނެވެ. ނާޕޮލީގެ ދަނޑުގައި ކުޅުނު ފުރަތަމަ ލެގުގެ މެޗު 1-1 ން އެއްވަރުވިއިރު، އެގްރިގޭޓުން ބާސާއަށް ކުރި ލިބުނީ 4-2 ގެ ނަތީޖާއަކުންނެވެ.

ބާސާގެ ދަނޑުގައި ހޮނިހިރު ދުވަހުގެރޭ ކުޅުނު މެޗުގެ ފުރަތަމަ ހާފުގައި އެޓީމުން މޮޅު ކުޅުމެއް ދެއްކިއިރު، މެޗުގެ 10 ވަނަ މިނެޓުގައި ބާސާއިން ވަނީ ލީޑު ނަގާފައެވެ. އިވާން ރަކިޓިޗް ނަގައިދިން ކޯނަރަކުން މި ލަނޑު ބާސާއަށް ކާމިޔާބުކޮށްދިނީ ޑިފެންޑަރު ކްލެމެންޓް ލޯންގްލޭއެވެ.

މެޗުގެ 23 ވަނަ މިނެޓުގައި ބާސާގެ ކެޕްޓަން ލިއޮނެލް މެސީ ވަނީ ރީތި ލަނޑެއް ކާމިޔާބުކޮށް އެޓީމަށް ލީޑު ފުޅާކޮށްދީފައެވެ. އަދި މެޗުގެ 30 ވަނަ މިނެޓުގައި މެސީ އިތުރު ލަނޑެއް ކާމިޔާބުކުރި ނަމަވެސް، އެ ލަނޑު ޖެހުމުގެ ކުރިން މެސީގެ އަތުގައި ބޯޅަ ޖެހުނު ކަމަށް ނިންމާ ވީޑީއޯ އެސިސްޓަންޓް ރެފުރީ (ވީއޭއާރް) އިން ވަނީ އެ ލަނޑު ބާތިލުކޮށްފައެވެ.

މި މެޗުގައި ބާސާއިން ކާމިޔާބުކުރި ތިންވަނަ ލަނޑު ފުރަތަމަ ހާފުގެ އިތުރު ވަގުތުގައި ލިބުނު ޕެނަލްޓީއަކުން ކާމިޔާބުކޮށްދިނީ ފޯވާޑް ލުއިސް ސުއަރޭޒްއެވެ. މިއީ މެސީއަށް އޭރިއާ ތެރެއިން ނާޕޮލީގެ ޑިފެންޑަރު ކަލިދޫ ކޫލިބަލީ ކުރި ފައުލަކަށް ރެފުރީ ދިން ޕެނަލްޓީއެކެވެ.

އެކަމަކު އޭގެ ހަތަރު މިނެޓު ފަހުން ލިބުނު ޕެނަލްޓީއަކުން ލޮރެންޒޯ އިންސީނިއޭ ވަނީ ނާޕޮލީގެ ހަމައެކަނި ލަނޑު ކާމިޔާބުކޮށްފައެވެ. ނާޕޮލީއަށް ރެފުރީ މި ޕެނަލްޓީ ދިނީ އޭރިއާ ތެރެއިން އެ ޓީމުގެ ފޯވާޑް ޑްރީސް މާޓެންސްއަށް ބާސާގެ މިޑްފީލްޑަރު އިވާން ރަކިޓިޗް ފައުލް ކުރުމުންނެވެ.

މީގެ އިތުރުން މި މިބާރާތުގެ ކުއާޓާއަށް ބަޔާން ދަތުރުކުރީ ދެވަނަ ބުރުގެ ދެވަނަ ލެގުގައި އަމިއްލަ ދަނޑުގައި 4-1 ން ޗެލްސީގެ މައްޗަށް ކުރި ހޯދައިގެންނެވެ. ޗެލްސީގެ ދަނޑުގައި ކުޅުނު ފުރަތަމަ ލެގުގެ މެޗު 3-0 ން ބަޔާނުން ކާމިޔާބުކުރިއިރު، އެގްރިގޭޓުން ބަޔާނަށް ކުރި ލިބުނީ 7-1 ގެ ތަފާތު ބޮޑު ނަތީޖާއަކުންނެވެ.

ބަޔާންގެ ދަނޑުގައި ހޮނިހިރު ދުވަހުގެރޭ ކުޅުނު މެޗުގެ 10 ވަނަ މިނެޓުގައި ފޯވާޑް ރޮބަޓް ލެވަންޑޯސްކީ ވަނީ ޕެނަލްޓީއަކުން އެޓީމަށް ލީޑު ނަގައިދީފައެވެ. އަދި މެޗުގެ 24 ވަނަ މިނެޓުގައި އިވާން ޕެރިސިޗް ވަނީ ބަޔާނަށް ލީޑު ފުޅާކޮށްދީފައެވެ.

އޭގެ ހަތަރު މިނެޓު ފަހުން ޗެލްސީގެ ފޯވާޑް ކަލުމް ހަޑްސަން-އޮޑޯއި ލަނޑެއް ކާމިޔާބުކުރި ނަމަވެސް، އެޓީމުގެ ފޯވާޑް ޓެމީ އަބްރަހަމް އޮފްސައިޑްގައި ހުރުމުން ވީއޭއާރުން ވަނީ އެ ލަނޑު ބާތިލުކޮށްފައެވެ. އެކަމަކު ފުރަތަމަ ހާފު ނިމެން މިނެޓަކަށް ވެފައިވަނިކޮށް ޓެމީ އަބްރަހަމް ވަނީ ޗެލްސީއަށް ފަރަގު ކުޑަކޮށްދީފައެވެ.

މި މެޗުގައި ބަޔާނުން ދެވަނަ ފަހަރަށް ލީޑު ފުޅާކުރީ މެޗުގެ 76 ވަނަ މިނެޓުގައެވެ. މި ލަނޑު އެޓީމަށް ކާމިޔާބުކޮށްދިނީ ކޮރެންޓިން ޓޮލީސޯއެވެ. އަދި މެޗުގެ 84 ވަނަ މިނެޓުގައި ލެވަންޑޯސްކީ ވަނީ ބަޔާންގެ ހަތަރުވަނަ ލަނޑު ކާމިޔާބުކޮށްދީފައެވެ.

ހޮނިހިރު ދުވަހުގެރޭގެ މެޗުތަކުން މޮޅުވެ ބާސާ އާއި ބަޔާން ޗެމްޕިއަންސް ލީގުގެ ކުއާޓާއަށް ދަތުރުކުރިއިރު، ކުއާޓާގެ މެޗުތައް އަންނަ ބުދަ ދުވަހުގެރޭ ފެށުމަށް ވަނީ ނިންމާފައެވެ. ކުއާޓާއިން ފެށިގެން އެއް ލެގު ކުޅުމަށް ނިންމާފައިވާއިރު، މެޗުތައް ކުރިއަށްދާނީ ޕޯޗުގަލްގެ ވެރިރަށް ލިޒްބަންގައެވެ.