ކުރެންދުއަށް ބޯކޮށް ވާރޭވެހި 6 ގެޔަކަށް އެކިވަރުގެ ގެއްލުން

ޅ ކުރެންދުއަށް ބޯކޮށް ވާރޭވެހި ފެން ބޮޑުވެ 6 ގެޔަކަށް ފެންވަދެ އެކިވަރުގެ ގެލުންވެއްޖެއެވެ.

މިކަމާ ގުޅިގެން ފެން ހިންދުމަށްޓަކައި އެމްއެންޑީއެފް ނޮދަން އޭރިއާގެ ސިފައިން ދަނީ މަސައްކަތް ކުރަމުންނެވެ. ފެން ބޮޑުވެ ގެތަކަށް ފެންވަންނަން ފެށިކަން އެމްއެންޑީއެފަށް ރިޕޯޓްކޮށްފައިވަނީ ހުކުރު ދުވަހުގެ ހަވީރު 16:15 ހާއިރުއެވެ. ސިފައިން ވަނީ ގެތަކަށް ފެން ވަނުން ހުއްޓުވުމަށް ވެލި ބަސްތާ ޖަހައި ޕަމްޕް ބޭނުންކޮށްގެން ފެން ހިންދުމުގެ މަސައްކަތް ކުރަމުންނެވެ.

Advertisement

މީގެ އިތުރުން އުތުރުގެ ރަށްތަކަށް ކުރަމުންދާ ވިއްސާރާގައި ހުކުރު ދުވަހު ހެނދުނު 10:00ގައި ހދ. ކުޅުދުއްފުށީ ގެއެއްގެ ފުރާޅުން ބައެއް ނެއްޓި އެމްއެންޑީއެފުން ވަނީ އެހީތެރިވެފައެވެ.

މީގެ އިތުރުން ޅ. ނައިފަރަށް ބޯކޮށް ވާރޭވެހި 4 ގެއަކަށް ފެންވަނުމާއި ގުޅިގެން ޕަމްޕް ބޭނުންކޮށްގެން ފެން ހިންދުމުގެ މަސައްކަތް އެމްއެންޑީއެފުން ކުރަމުން އަންނަކަމަށް ވަނީ ބުނެފައެވެ. މިހާދިސާގެ މައުލޫމާތު އެމްއެންޑީއެފަށް ލިބިފައިވަނީ ހުކުރު ދުވަހުގެ އިރުއޮއްސި 18:35 ހާއިރުކަމަށް އެމްއެންޑީއެފުން ބުނެއެވެ.

ހުކުރު ދުވަހު ރާއްޖޭގެ ހުރިހާ ސަރަޙައްދުތަކަކަށްވެސް ވިއްސާރަކުރާނެކަމަށް މޫސުމާ ބެހޭ ޤައުމީ އިދާރާއިން ވަނީ ލަފާކޮށްފައެވެ. އެގޮތުން މެދުރާއްޖެތެރެއާއި އުތުރުގެ ރަށްތަކަށް ބޯކޮށް ވާރޭ ވެހޭނެ ކަމަށް ބެލެވޭއިރު، އެވަރެޖްކޮށް ވައިޖެހޭނެކަމަށް ލަފާކުރައްވާފައިވަނީ 5 މޭލާއި 20 މޭލާ ދެމެދުގެ ބާރުމިނުގައެވެ. ނަމަވެސް ވިލާގަނޑުގައި 45މޭލަށް ވައިގަދަވުން އެކަށީގެންވާކަމަށް މޫސުމާއިބެހޭ ޤައުމީ އިދާރާއިން ބުނެއެވެ.

ދެކުނުުގެ ކަނޑުތަށް އާދައިގެވަރަކަށް މަޑުވިނަމަވެސް، ވިލާގަނޑުގައި ގަދަވާނެކަމަށް ލަފާކުރެވޭއިރު ރާއްޖޭގެ އެހެން ހިސާބުތަކުގެ ކަނޑުތައް ގަދަވާނެކަމަށް ލަފާކުރެވޭކަމަށްވެސް މޫސުމާއިބެހޭ ޤައުމީ އިދާރާއިން ބުނެއެވެ. އެހެންކަމުން ހުރިހާ ފަރާތްތަކުންވެސް މޫސުމަށް ސަމާލުވުމަށް މޫސުމާބެހޭ ޤައުމީ އިދާރާއިން ވަނީ އިލްތިމާސްކޮށްފައެވެ. ޚާއްސަކޮށް ކަނޑުތަކުން ދަތުރުކުރާ ފަރާތްތަކުން، ޚާއްސަ ސަމާލުކަމެއް ދިނުމަށްވެސް ވަނީ އިލްތިމާސް ކޮށްފައެވެ. މިހާރު ރާއްޖެއަށް ކުރަމުންދާ ވިއްސާރައަކީ ހުޅަނގު މޫސުމުގެ ވިއްސާރަމަށް މޫސުމާއިބެހޭ ޤައުމީ އިދާރާއިން ބުނެއެވެ.