ހެލްތް މިނިސްޓަރު އަބްދުﷲ އަމީން އިންނަވާ އޮފީސް ކޮޓަރި ކަމަށް ބުނެ ދައުރުކުރާ ފޮޓޯތަކުން ފެންނަނީ އެކޮޓަރި ނޫންކަމަށް ހެލްތު މިނިސްޓްރީން ބުނެފިއެވެ.
ކޮވިޑް-19ގެ މިފަދަ ދަނޑިވަޅެއްގައި ހެލްތް މިނިސްޓަރު އަމީން އިންނަވާ އޮފީސް ކޮޓަރި ވަރަށް ފެންވަރުގައި ހަދާފައިވާ ކަމަށް ބުނެ ސޯޝަލް މީޑއާއަށް ވަނީ ފޮޓޯތަކެއް އާންމުވެފައެވެ. މިކޮޓަރި ހަދާފައިވަނީ ބިޑް ކުރުމެއް ނެތި ކަމަށާއި، ހަދަން ދިޔަ ހަރަދު ވެސް މިނިސްޓްރީން އާންމުކޮށްފައި ނުވާ ކަމަށް ފާޑު ކިޔާ ފަރާތްތަކުން ދަނީ ބުނަމުންނެވެ.
މިކަމާ ގުޅިގެން ހެލްތް މިނިސްޓްރީން ބުނީ، މިނިސްޓަރު އިންނަވާ ކޮޓަރީގެ ފޮޓޯތަކެއް ކަމަށް ބުނެ ދައުރުވަމުން ދަނީ ރަނގަޅު ފޮޓޯތަކެއް ނޫން ކަމަށެވެ. ހެލްތު މިނިސްޓްރީން އެހެން ބުނި ނަމަވެސް، އިތުރު ބައެއް ފޮޓޯތަކާއި ގުޅިގެން ތަކުރާރުކޮށް ސުވާލުކުރުމުން ހެލްތު މިނިސްޓްރީގެ މީޑިއާ އޮފިޝަލުން ވަނީ ނޫސްވެރިންގެ އެ ސުވާލުތަކަށް ޖަވާބު ދިނުމަށް އިންކާރުކޮށްފަ އެވެ.
ނޫސްވެރިންގެ ސުވާލުތަކަށް ސީދާ ޖަވާބެއް ދިނުމުގެ ބަދަލުގައި ހެލްތު މިނިސްޓްރީގެ މީޑިއާ އޮފިޝަލުން ތަކުރާރުކޮށް ބުނީ ދައުރުވަމުން ދަނީ ހެލްތް މިނިސްޓްރީގައި ހަދާފައިވާ ކޮންފަރެންސް ރޫމްގެ ފޮޓޯތައް ކަމަށާއި، މިނިސްޓްރީގެ އިވެންޓްތައް ބޭއްވުމުގެ އިތުރުން އެހެނިހެން ފަރާތްތަކުގެ އިވެންޓްތައް ބޭއްވުމަށް މިކޮންފަރެންސް ރޫމް ކުއްޔަށް ދޫކުރާނެކަމަށެވެ. މިގޮތަށް ކުއްޔަށް ދީގެން ލިބޭ ފައިސާ ޕަބްލިކް ހެލްތްގެ މަސައްކަތް ކުރުމަށް ހެލްތް ފަންޑަށް ޖަމާކުރާނެ ކަމަށް ވެސް މިނިސްޓްރީން ބުނެއެވެ.
މީގެ އިތުރުން ހެލްތް މިނިސްޓްރީން ބުނީ، މިނިސްޓްރީ ހިނގާ އިމާރާތުގެ 9 ވަނަ ފަންގިފިލާގެ ކޮންފަރެންސް ރޫމްގެ ނަމަކީ "މޫމިނާ ހަލީމް މާލަން'' ކަމަށެވެ. އަދި އެއީ ރާއްޖޭގެ ފުރަތަމަ އަންހެން ހެލްތް މިނިސްޓަރަށް ނިސްބަތްކޮށް ދެވިފައިވާ ނަމެއް ކަމަށް މިނިސްޓްރީން ބުންޏެވެ.
ހެލްތް މިނިސްޓްރީން ބުނީ މިކޮންފަރެންސް ރޫމް ހެދުމުގެ ބޭނުމަކީ ހަރަދު ކުޑަ ކުރުމުގެ އިތުރުން ހެލްތް މިނިސްޓްރީ އަކީ ގިނަ އިވެންޓްތަކެއް ބާއްވާ ތަނަކަށްވެފައި މިފަދަ އިވެންޓްތައް މިނިސްޓްރީން ބޭރުގައި ބޭއްވުމަށް ބޮޑެތި ހަރަދުތަކެއް ކުރަންޖެހޭތީ ކަމަށެވެ. މިކޮންފަރެންސް ރޫމް ހެދުމަށްޓަކައި ދިޔަ ހަރަދުގެ އިތުރުން ތަފްސީލްތައް ފަހުން ހާމަކުރާނެ ކަމަށް ހެލްތް މިނިސްޓްރީން ބުނެއެވެ.
ހެލްތު މިނިސްޓަރުގެ ކޮޓަރިކޮޅު ހުންނަނީ ރޯޝަނީ ބިލްޑިންގގެ 8 ވަނަ ފަންގިފިލާ ގައެވެ. ކޮންފަރެންސް ރޫމް ހަދާފައިވަނީ 9 ވަނަ ފަންގިފިލާގަ އެވެ.
