ސަވާރީ ކްލަސްޓަރ: ނޮޅިވަރަންފަރާއި ވަށަފަރު އަދި ދިއްދޫ ލޮކްޑައުންކޮށްފި

މި މަހުގެ 28 ވަނަ ދުވަހު ހއ. ކެލާ ސަވާރީ ބޯޓުގައި މަސައްކަތް ކުރި މީހަކު ކޮވިޑް-19 އަށް ޕޮޒިޓިވްވެ، ހދ. ނޮޅިވަރަންފަރާއި، ހއ. ވަށަފަރު އަދި ދިއްދޫގެ ކޮންޓެކްޓް ޓޭރޭސިން ހެދުމަށް އެ ރަށްތައް ލޮކްޑައުންކޮށްފިއެވެ.

މި ތިން ރަށް ލޮކްޑައުންކުރީ ސަވާރީ ބޯޓު މި 3 ރަށަށް ވެސް ބަނދަރުކޮށްފައިވާތީއާއި އެ ބޯޓުން މީހުން ދަތުރުކޮށްފައިވާތީ ކަމަށް ހެލްތް އެމަރޖެންސީ އޮޕަރޭޝަން ސެންޓަރު (އެޗްއީއޯސީ) އިން ބުނެއެވެ. ސަވާރީ ބޯޓުން ދަތުރުކުރި މީހަކު މި މަހުގެ 28 ވަނަ ދުވަހު ޕޮޒިޓިވްވެފައިވާ އިރު އޭނާއި ކޮންޓެކްޓްވި އިތުރު 9 މީހަކު ވަނީ ކެލައިން ޕޮޒިޓިވްވެފައެވެ.

މި ބޯޓް ހއ. ކެލާއަށް ގޮސްފައިވަނީ މާލޭގައި ދެ ހަފްތާގައި މަޑުކުރުމަށްފަހު މިމަހުގެ 24 ވަނަ ދުވަހުއެވެ. ބޯޓުން ފުރަތަމަ ޕޮޒިޓިވްވެފައިވަނީ ބޯޓްގެ ކެޕްޓަންއެވެ. އަދި އޭނާ މާލެއިން ފުރި އިރުވެސް ބަލީގެ އަލާމާތްތައް ހުރިކަމަށް އެޗްއީއޯސީން ބުނެއެވެ.

މި ކޭސްތަކާއި ގުޅިގެން އިތުރު މީހުން ޓެސްޓް ކުރުމުގެ މަސައްކަތް ކުރިއަށްދާ އިރު، ކޮންޓެކްޓް ޓްރޭސިންގެ މަސައްކަތް ދަނީ ކުރަމުންނެވެ. ކެލައަކީ ށ. ނަރުދޫ ފިޔަވައި ރާއްޖޭގެ ރަށަކުން އެންމެ ގިނަ އަދަދަ މީހުން ޕޮޒިޓިވްވި ރަށެވެ. ނަރުދޫއިން 11 މީހަކު އަމާޒު ބޯޓު ކްލަސްޓާއާއި ގުޅިގެން ޕޮޒިޓިވްވިއެވެ.

މީގެ އިތުރުން ބ. ކަމަދޫގައި ކަރަންޓީންގައި ހުރި މީހަކު ކަރަންޓީނުން ދޫކޮށްލުމުގެ ކުރިން ހެދި ޓެސްޓް ވަނީ ޕޮޒިޓިވްވެފައެވެ. މި ވަގުތު މޮނިޓަރިންގެ ހާލަތުގައި ހުރި ރަށްތަކަކީ ހއ. ކެލާ، ރ. އިނގުރައިދޫ، ބ. އޭދަފުށި، ޅ. ކުރެންދޫ، ލ. މާފުށި އަދި ބ. ކަމަދޫ ހިމެނެއެވެ. އަދި ބ. ސީސައިޑް ފިނޮޅު ވެސް މޮނިޓަރިންގެ ހާލަތަށް ގެނެސްފައެވެ.

ބުރާސްފަތި ދުވަހަކީ މިހާތަނަށް ރާއްޖޭގައި އެންމެ ގިނަ އަދަދަކަށް މީހުން ޕޮޒިޓިވްވި ދުވަހެވެ. މީގެ އިތުރުން އެންމެ ގިނަ ދިވެހިން ޕޮޒިޓިވްވިވީ ވެސް މި ދުވަހުއެވެ. ބުރާސްފަތި ދުވަހު ރާއްޖެއިން 152 މީހަކު ޕޮޒިޓިވްވި އިރު މީގެ ތެރެއިން 89 މީހުންނަކީ ދިވެހިންނެވެ. ބަންގުލަދޭޝްގެ 54 މީހަކު ޕޮޒިޓިވްވި އިރު އިންޑިއާގެ 5 މީހަކާއި ލަންކާގެ 4 މީހަކު ހިމެނެއެވެ.

152 މީހުންގެ ތެރެއިން 10 މީހުން ޕޮޒިޓިވްވެފައިވަނީ އަތޮޅު ތެރެއިންނެވެ. އޭގެ ތެރޭގައި ކެލައިން ޕޮޒިޓިވްވި 9 މީހުންނާއި ބ. ކަމަދޫގައި ކަރަންޓީންގައި ހުރި މީހަކު ކަރަންޓީނުން ދޫކޮށްލުމުގެ ކުރިން ހެދި ޓެސްޓް ވަނީ ޕޮޒިޓިވްވެފައެވެ.