ހިންމަފުށި ފުޓްސަލް ދަނޑުގެ މަސައްކަތް ނިންމާލައިފި
30 ޖުލައި 2020 | ބުރާސްފަތި 09:26މި ދަނޑުގެ މަސައްކަތް ކޮށްފައިވަނީ މައިނާ ސްޕޯޓްސް ފީލްޑް ޕްރައިވެޓް ލިމިޓެޑުން
ކ. ހިންމަފުށީގައި ކުޅިވަރާ ބެހޭ ވުޒާރާގެ ފަރާތުން އެޅި ފުޓްސަލް ދަނޑު
ކ. ހިންމަފުށީގައި ކުޅިވަރާ ބެހޭ ވުޒާރާގެ ފަރާތުން އެޅި ފުޓްސަލް ދަނޑުގެ މަސައްކަތް ނިންމާލައިފިއެވެ.
ހިންމަފުށީގައި ކުޅިވަރާ ބެހޭ ވުޒާރާގެ ފަރާތުން އެޅި ފުޓްސަލް ދަނޑުގެ މަސައްކަތް ކޮށްފައިވަނީ މައިނާ ސްޕޯޓްސް ފީލްޑް ޕްރައިވެޓް ލިމިޓެޑުންނެވެ. މި މަސައްކަތަށް ކުޅިވަރާ ބެހޭ ވުޒާރާއިން ވަނީ 1.39 މިލިޔަން ރުފިޔާ ޚަރަދުކޮށްފައެވެ. މި މަސައްކަތް މައިނާ ސްޕޯޓްސް ފީލްޑް ޕްރައިވެޓް ލިމިޓެޑާ ހަވާލުކޮށްފައިވަނީ މިއަހަރުގެ ޖެނުއަރީ މަހުގެ ފަސްވަނަ ދުވަހުއެވެ.
ކުޅިވަރާ ބެހޭ ވަޒީރު އަޙްމަދު މަޙްލޫފް ކުރެއްވި ޓްވީޓެއްގައި ވިދާޅުވީ ހިންމަފުށީގައި ފުޓްސަލް ދަނޑު އެޅުމަށް އެދުނީ އެރަށުގެ ޑްރަގު ޑިޓޮކްސް ސެންޓަރުން ކަމަށާއި، އެ ވުޒާރާއިން ޑްރަގުގެ ވަބާއާ ދެކޮޅަށް ކުރަމުންދާ މަސައްކަތަށް އަބަދުވެސް އެއްބާރުލުން ދޭނެ ކަމަށެވެ.
ހިންމަފުށީގައި އެޅި ފުޓްސަލް ދަނޑުގައި ވަނީ ރޭގަނޑު ކުޅެވޭ ގޮތަށް ލައިޓުވެސް ހަރުކޮށްފައެވެ.
ހިންމަފުށި ފުޓްސަލް ދަނޑުގެ މަސައްކަތް ނިންމާލިއިރު، ކުޅިވަރާ ބެހޭ ވުޒާރާގެ ފަރާތުން ރާއްޖޭގެ އެކި ކަންކޮޅުތަކުގައި މިހާރު ކުރިއަށްގެންދާ ގިނަ މަޝްރޫއުތައް ވަނީ ނިމުމަކާ ހަމަޔަށް އައިސްފައެވެ. އެގޮތުން ގިނަ ރަށްތަކެއްގައި އެޅު ފުޓްސަލް ދަނޑުގެ މަސައްކަތްތައް ނިންމާލާފައިވާއިރު، ކުރިއަށް އޮތް ދުވަސްތަކުގައި ވެސް ގިނަ މަޝްރޫއުތަކެއް ނިމިގެންދާނެ ކަމަށް އެ ވުޒާރާއިން މައުލޫމާތުދެއެވެ.
