15 އަހަރުގެ ކުއްޖަކު ރޭޕްކޮށް، ބަލިވެއިން މައްސަލައިގައި ހައްޔަރުކުރި މީހާއަށް ދައުވާކޮށްފި
ކޯޓު އަމުރެއްގެ ދަށުން އޭނާ ހައްޔަރުކުރީ 2020 ޖުލައި 2 ވަނަ ދުވަހު
މި މައްސަލައާ ގުޅިގެން ހައްޔަރު ކޮށްފައިވާ ފ. ފީއަލީ/ފީރޯޒްގެ، އިބްރާހިމް ޝާފިއު (37އ)
ނުކުޅެދުންތެރިކަން ހުރި 15 އަހަރުގެ ކުއްޖަކު ރޭޕްކޮށް، އެ ކުއްޖާ ބަލިވެއިން މައްސަލައިގައި ހައްޔަރުކުރި މީހާގެ މައްޗަށް ދައުވާ އުފުލައިފިއެވެ.
ޕްރޮސެކިއުޓަރ ޖެނެރަލް (ޕީޖީ) އޮފީހުން ބުނީ، މި މައްސަލައިގައި ތުހުމަތު ކުރެވޭ ފ. ފީއަލީ/ފީރޯޒްގެ، އިބްރާހިމް ޝާފިއު (37އ) ގެ މައްޗަށް އިތުބާރު ކުރެވޭ މަޤާމެއްގައި ހުރެ، ކުޑަކުއްޖަކާމެދު ޖިންސީ ޢަމަލެއް ހިންގުމުގެ ކުށުގެ ދައުވާ" ބުދަ ދުވަހު ކްރިމިނަލް ކޯޓަށް ހުށައަޅާފައިވާ ކަމަށެވެ.
ޕީޖީ އޮފީހުން ބުނީ ދައުވާ ސާބިތުވެއްޖެނަމަ 15 އަހަރާއި، 18 އަހަރުގެ ޖަލު ހުކުމެއް އޭނާގެ މައްޗަށް އަންނާނެ ކަމަށެވެ.
މި މައްސަލައިގައި ކޯޓު އަމުރެއްގެ ދަށުން އޭނާ ހައްޔަރުކުރީ 2020 ޖުލައި 2 ވަނަ ދުވަހުއެވެ. އަދި ޖުލައި މަހުގެ 4 ވަނަ ދުވަހު އޭނާ ޝަރީއަތް ނިމެންދެން ބަންދުގައި ބެހެއްޓުމަށް ފ. ނިލަންދޫ މެޖިސްޓްރޭޓް ކޯޓުން ވަނީ އަމުރުވެސް ކޮށްފައެވެ. އެގޮތުން މައްސަލައިގެ ޝަރީއަތުން ހުކުމެއް ނުވަތަ ޝަރީއަތުން ވަކިގޮތެއް ކަނޑައެޅެންދެން ރިމާންޑް ޖަލެއްގައި ބަންދުގައި ބެހެއްޓުމަށް އޭރު އަމުރުކޮށްފައިވެއެވެ.
މިފަހަކަށް އައިސް ޖިންސީ ގޯނާގެ މައްސަލަތައް ރިޕޯޓް ކުރެވޭ މިންވަރު ވަނީ އިތުރުވެފައެވެ. އެގޮތުން މިއަހަރުގެ ކުރީ ކޮޅު، ގއ ކަނޑުހުޅުދޫގައި ތުއްތު ކުއްޖަކު ރޭޕް ކުރި މައްސަލައެއް ފެންމަތިވުމާއެކު، ރޭޕާ ދެކޮޅަށް ފާޅުގައި އަޑުއުފުލާ މީހުންގެ އަދަދުވެސް ވަނީ އިތުރުވެފައެވެ. އަދި ފާއިތުވި ދުވަސްތަކުގައި ވެސް އެފަދަ ބޮޑެތި މައްސަލަތަކެއް ފެންމަތިވެފައިވާއިރު، ރޭޕްއާއި، ޖިންސީ އެކިއެކި ގޯނާތަކާއި ދެކޮޅަށް ސިލްސިލާ މުޒާހަރާތަކެއް ވަނީ ކޮށްފައެވެ.
