ނަގޯޔާގެ ދެ ކުޅުންތެރިއަކު ޕޮޒިޓިވްވެ މެޗު ފަސްކޮށްފި

ނަގޯޔާ ގްރެމްޕަސްގެ ދެ ކުޅުންތެރިއަކު ކޮވިޑް-19ށް ޕޮޒިޓިވްވެ، އެ ކްލަބުން އާދީއްތަ ދުވަހު ޖޭ-ލީގުގައި ކުޅެން ތާވަލުކޮށްފައި އޮތް މެޗު ފަސްކޮށްފިއެވެ.

ކޮވިޑް-19 ގެ ބްރޭކަށްފަހު ޖޭ-ލީގުގެ މެޗުތައް ފަށާފައިވަނީ މިދިޔަ ޖޫން މަހުއެވެ. އަދި މި މަހުގެ ތެރޭގައި ވަނީ ސަޕޯޓަރުންނައް ދަނޑުތައް ހުޅުވާލާފައެވެ.

އާދީއްތަ ދުވަހު ސަންފްރެކޭ ހިރޯޝިމާގެ ދަނޑުގައި މެޗު ކުޅެން ތާވަލުކޮށްފައި އޮތް ނަމަވެސް، ނަގޯޔާގެ ދެ ކުޅުންތެރިއަކު ކޮވިޑް-19ށް ޕޮޒިޓިވްވުމާއެކު، އެ މެޗު މިހާރު ވަނީ ފަސްކޮށްފައެވެ.

ހުކުރު ދުވަހުގެ ވަގުތެއްގައި ނަގޯޔާގެ ޑިފެންޑަރު ކަޒުޔާ މިޔަހަރާ ވަނީ ކޮވިޑް-19ށް ޕޮޒިޓިވް ވެފައެވެ. އެއާއެކު އެ ޓީމުގެ 60 ކުޅުންތެރިންނާއި ހުރިހާ އޮފިޝަލުން ކޮވިޑް-19ށް ޓެސްޓް ކުރިއިރު، އިތުރު ކުޅުންތެރިއަކާއި އޮފިޝަލަކު ކޮވިޑް-19ށް ޕޮޒިޓިވް ވިކަން އެ ކްލަބުން ވަނީ ހާމަކޮށްފައެވެ. އެކަމަކު ކޮވިޑް-19ށް ޕޮޒިޓިވްވި ކުޅުންތެރިއާ އާއި އޮފިޝަލްގެ ހަށިގަނޑުންވެސް ވައިރަހުގެ އެއްވެސް އަލާމާތެއް ފެނިފައިނުވާ ކަމަށް އެ ކްލަބުން ވަނީ ބުނެފައެވެ.

ޖޭ-ލީގުގެ ޗެއާމަން މިޓްސުރޫ މުރާއި ވިދާޅުވީ ނަގޯޔާގެ ދެ ކުޅުންތެރިއަކު ކޮވިޑް-19ށް ޕޮޒިޓިވް ވުމާއެކު، އާދީއްތަ ދުވަހުގެ ހެނދުނު ބޭއްވި ކުއްލި ބައްދަލުވުމުގައި ސަންފްރެކޭ ހިރޯޝިމާ އާއި ނަގޯޔާ ކުޅެން އޮތް މެޗު ފަސްކުރަން ނިންމާފައިވާ ކަމަށެވެ. އެކަމަކު މި މެޗު ފަސްކުރި ނަމަވެސް، އާދީއްތަ ދުވަހު ކުޅެން ތާވަލުކޮށްފައި ހުރި އަނެއް އަށް މެޗު ކުރިއަށްދާނެ ކަމަށްވެސް ވިދާޅުވިއެވެ.

ޖޫން މަހުގެ ތެރޭގައި ޖޭ-ލީގުގެ ކުޅުން އަލުން ފެށިއިރު، މިއީ ބްރޭކަށްފަހު ކޮވިޑް-19އާ ގުޅިގެން ފަސްކުރި ފުރަތަމަ މެޗެވެ.

ކޮވިޑް-19ގެ އަސަރު ޖަޕާނަށްވެސް ކޮށްފައިވާއިރު، މިހާތަނަށް އެ ގައުމުން 28،700 ށްވުރެ ގިނަ މީހުން ވަނީ ކޮވިޑް-19ށް ޕޮޒިޓިވް ވެފައެވެ. އަދި އެ ގައުމުން މި ވައިރަސް ޖެހިގެން މިހާތަނަށް 990 ށްވުރެ ގިނަ މީހުން ވަނީ މަރުވެފައެވެ.