އެމެރިކާގެ މޭޖާ ލީގު ސޮކާ (އެމްއެލްއެސް) ގެ ކުޅުން އަންނަ އޮގަސްޓް މަހު އަލުން ފެށުމަށް މަސައްކަތް ކުރަމުންދާ ކަމަށް ރިޕޯޓުތައް ބުނެފިއެވެ.

ކޮވިޑް-19 އާ ގުޅިގެން މާޗު މަހުގެ އަށްވަނަ ދުވަހުން ފެށިގެން އެމެރިކާގެ މޭޖާ ލީގުގެ ކުޅުން މެދުކަނޑާލީ ކޮންމެ ޓީމަކުން ދެ މެޗު ކުޅުމަށްފަހުއެވެ. އެކަމަކު ޖުލައި މަހުގެ ތެރޭގައި އެމެރިކާގައި އަލުން ފުޓްބޯޅަ ފެށުމުގެ ގޮތުން ކްލަބުތަކުގެ މެދުގައި ވަނީ "އެމްއެލްއެސް އިޒް ބެކް" ގެ ނަމުގައި ހާއްސަ މުބާރާތެއް ފަށާފައެވެ.

26 ޓީމުގެ މެދުގައި ކުރިއަށްދާ މި މުބާރާތުގައި ކުޅެން އެއްވެސް ޓީމަކަށް އަދި ކުޅުންތެރިއަކަށްވެސް މަޖުބޫރު ކޮށްފައިނުވާއިރު، ފްލޮރިޑާގެ ސިޓީއެއް ކަމަށްވާ އޯލަންޑޯގައި ހުންނަ ޑިޒްނީ ވޯލްޑް ރިސޯޓުގައި ކުރިއަށްދާ މި މުބާރާތުގެ ފައިނަލް މެޗު ވަނީ އޮގްސްޓް މަހުގެ 11 ވަނަ ދުވަހަށް ތާވަލުކޮށްފައެވެ.

އެހެންކަމުން އެ މުބާރާތަށްފަހު އޮގަސްޓް މަހުގެ ފަހުކޮޅު އެމެރިކާގެ މޭޖާ ލީގުގެ ކުޅުން އަލުން ފެށުމަށް އަންނަނީ މަސައްކަތް ކުރަމުންނެވެ. އަދި ކްލަބުތަކުގެ އަމިއްލަ ދަނޑުގައި މެޗުތައް ކުޅޭއިރު، ސަޕޯޓަރުން ނުވައްދައި މެޗުތައް ކުރިއަށް ގެންދިޔުމަށް އެމްއެލްއެސްއިން މިހާރު މަޝްވަރާ ކުރަމުން އަންނަ ކަމަށާއި، ލީގުގެ ކުޅުން ޑިސެމްބަރު މަހުގެ ތެރޭގައި އެއްކޮށް ނިންމާލަންވެސް މަޝްވަރާ ކުރަމުން އަންނަ ކަމަށް ރިޕޯޓުތައް ބުނެއެވެ.

އެމެރިކާގެ މޭޖާ ލީގުގެ ކުޅުން އަލުން ފެށުމަށް މަސައްކަތް ކުރަމުން އަންނައިރު، މީގެ ކުރިން މޭޖާ ލީގުން ވަނީ މިއަހަރު ބޭއްވުމަށް ތާވަލުކޮށްފައި އޮތް ތިން އިވެންޓެއް ކެންސަލް ކޮށްފައެވެ. މޭޖާ ލީގުން ކެންސަލް ކޮށްފައިވަނީ މިއަހަރުގެ އޯލް-ސްޓާ މެޗާއި، ލީގްސް ކަޕްގެ އިތުރުން ޗެމްޕިއަންސް ކަޕެވެ. މޭޖާ ލީގުން ބުނީ މިއަހަރުގެ އިވެންޓުތައް ކެންސަލް ކުރި ނަމަވެސް، އަންނަ އަހަރު މި އިވެންޓުތައް ބާއްވާނެ ކަމަށެވެ.