މާފަންނު ޒުވާނުންގެ މަރުކަޒުގައި އައިސް ބާތު ފެސިލިޓީއެއް ގާއިމުކޮށްފިއެވެ.
ޒުވާނުންގެ މަރުކަޒުގައި އައިސް ބާތު ފެސިލިޓީއެއް ގާއިމުކުރުމުގެ މަސައްކަތް ކުޅިވަރާ ބެހޭ ވުޒާރާއިން ފަށާފައި ވަނީ މިދިޔަ އަހަރުގެ ތެރޭގައެވެ. މިމަސައްކަތް ކޮށްފައި ވަނީ އީލިންކް ކުންފުންޏާ ހަވާލުކޮށްގެންނެވެ. މި މަޝްރޫއަށް 650،000 (ހަ ލައްކަ ފަންސާސް ހާސް) ރުފިޔާ ޚަރަދުކޮށްފައިވާ ކަމަށް ކުޅިވަރާ ބެހޭ ވުޒާރާއިން މައުލޫމާތުދެއެވެ.
މި ފެސިލިޓީގައި އެއްފަހަރާ ހަ މީހުންނަށް ވަކިވަކިން އައިސް ބާތު ރިކަވަރީ ނެގޭނެ އިންތިޒާމު ވަނީ ހަމަޖައްސާފައެވެ.
އައިސް ބާތު ފެސިލިޓީގެ މަސައްކަތް ނިމުންކަން އިއުލާން ކުރައްވަމުން ކުޅިވަރާ ބެހޭ ވަޒީރު އަޙްމަދު މަޙްލޫފް ކުރެއްވި ޓްވީޓެއްގައި ވިދާޅުވީ މިއީ ވަރަށް ގިނަ އެތުލީޓުންގެ ދިގު އިންތިޒާރެއްގެ ނިމުން ކަމަށާއި، އެކަމަށް ނިމުމެއް ގެނެވުމަކީ ވަރަށް އުފާވާ ކަމެއް ކަމަށެވެ. އަދި މިއީ އެތުލީޓުންގެ ރިކަވަރީއަށް ނެގުނު ވަރަށް ރަނގަޅު ފިޔަވަޅެއް ކަމަށް މަޙްލޫފް ވަނީ ފާހަގަކުރައްވާފައެވެ.
އައިސް ބާތަކީ ދުނިޔޭގެ ގިނަ ގައުމުތަކުގައި ތަމްރީންތަކަށް ފަހު ހަށިގަނޑުގެ ރިކަވަރީއަށް އެތުލީޓުން ކުރާ ކަމެކެވެ. އެކަމަކު މީގެ ކުރިން ދިވެހި އެތުލީޓުން އައިސް ބާތު ނަގަމުން އައީ ކަންނެލި ފޮއްޓާއި، ކުޑަކުދިންގެ އިންފްލޭޓަބަލް ޕޫލް ފަދަ ތަކެތީގެ ތެރެއަށް އައިސް އަޅައިގެންނެވެ.
