ޔުއެފާ ޔޫރޮޕާ ލީގު: ސަންޗޭޒް އެނބުރި އައިސް އާސެނަލް މޮޅުކޮށްދީފި

ޔުއެފާ ޔޫރޮޕާ ލީގުގައި އެލެކްސަސް ސަންޗޭޒް އެނބުރި އައިސް އާސެނަލް މޮޅުކޮށްދީފި އެވެ.

ބުރާސްފަތި ދުވަހުގެ ރޭ ކޮލޯންއާ ދެކޮޅަށް ކުޅުނު މެޗު އާސެނަލް އިން ކާމިޔާބުކުރީ 1-3 ގެ ނަތީޖާއަކުންނެވެ.

އާސެނަލް ދަނޑުގައި ކުޅުނު މި މެޗު ފެށިގެން ނުވަ ވަނަ މިނެޓުގައި ކޮލޯން އިން ވަނީ މެޗުގެ ލީޑު ނަގާފަ އެވެ. މި ލަނޑު އެޓީމަށް ކާމިޔާބުކޮށްދިނީ ކޮޑޯބާ އެވެ.

މި ލަނޑަށްފަހުވެސް ކޮލޯން އިން ދިޔައީ އާސެނަލްގެ ހާފަށް ބާރުބޮޑުކުރަމުންނެވެ. އެހެންނަމަވެސް އާސެނަލް އިން ވަނީ ފުރަތަމަ ހާފްގެ ވަކި ހިސާބަކުން މެޗުގެ ކޮންޓްރޯލް ހޯދާ ކޮލޯންގެ ގޯލަށް ނުރައްކާކުރަން ފަށާފައެވެ.

ފުރަތަމަ ހާފް ނިމުނީ 0-1 ގެ ނަތީޖާއިން އާސެނަލްގެ މައްޗަށް ކޮލޯން ކުރީގައި އޮވެގެންނެވެ.

ދެވަނަ ހާފް ފެށިގެން މާގިނައިރުތަކެއް ނުވަނީސް އާސެނަލް އިން ވަނީ މެޗުގެ ނަތީޖާ ހަމަހަމަކޮށްފައެވެ. މި ލަނޑު 49 ވަނަ މިނެޓުގައި އެޓީމަށް ކާމިޔާބުކޮށްދިނީ ކޮލަސިނަކް އެވެ. މި ލަނޑަށްފަހުވެސް އާސެނަލް އިން ދިޔައީ ފުލުފުލުގައި ލަނޑު ޖެހުމަށް ފުރުސަތު ހޯދަމުންނެވެ.

އެގޮތުން 67 ވަނަ މިނެޓުގައި ބަދަލު ކުޅުންތެރިޔެއްގެ ގޮތުގައި ކުޅެން އެރި އެލެކްސަސް ސަންޗޭޒް ވަނީ އާސެނަލް އަށް ފުރަތަމަ ފަހަރަށް މެޗުގެ ލީޑު ނަގައިދީފައެވެ.

މެޗު ނިމުމުގެ ކުރިން އާސެނަލް އަށް ލީޑު ފުޅާކޮށްދިނީ ހެކްޓާ ބެލެރިން އެވެ. މެޗުގެ ފަހު 10 މިނެޓު އާސެނަލް އިން ކުޅުނީ ވަރަށް ބޮޑަށް ފަހަތަށް ފައިބައިގެންނެވެ.