ފަޒީލަށް ތުހުމަތުކުރެވޭ ޖިންސީ ގޯނާގެ މައްސަލަ ބަލައިދިނުމަށް ކަމާބެހޭ ފަރާތްތަކަށް ހުށަހަޅައިފި
23 ޖުލައި 2020 | ބުރާސްފަތި 03:32އޭނާ ވަނީ ޕާޓީގެ ހަރަކާތްތަކުން އެކަހެރިކޮށްފައި
ފިޝަރީޒް މިނިސްޓްރީގެ ކޮމިއުނިކޭޝަން ޑިރެކްޓަރ އަހުމަދު ފަޒީލް | ޓްވިޓަރ
ފިޝަރީޒް މިނިސްޓްރީގެ ކޮމިއުނިކޭޝަން ޑިރެކްޓަރު ކަމުގެ މަގާމުގައި ހުރި އަހުމަދު ފަޒީލުގެ މައްޗަށް ކުރެވެނު ޖިންސީ ގޯނާގެ ތުހުމަތުތަކާ ގުޅިގެން، އެ މައްސަލަ ކަމާއިބެހޭ ފަރާތްތަކަށް ހުށަހަޅައިފިއެވެ.
މޯލްޑިވްސް ރީފޯމް މޫވްމަންޓް (އެމްއާރުއެމް) އިން ކޮށްފައިވާ ޓްވީޓެއްގައި ބުނެފައިވަނީ ފަޒީލުގެ މައްޗަށް ތުހުމަތު ކުރަމުންދާ މައްސަލަތައް ބަލައިދިނުމަށްއެދި އެ ޕާޓީގެ ޕަރާތުން މޯލްޑިވްސް ޕޮލިސް ސާރވިސްއަށާއި މިނިސްޓްރީ އޮފް ޖެންޑަރ ފެމެލީ އެންޑް ސޯޝަލް ސާރވިސަސް އަށް ހުށަހަޅާފައިވާ ކަމަށެވެ.
މި ތުހުމަތުތަކާ ގުޅިގެން ތަހުގީގު ނިމެންދެން، ޕާޓީގެ ހަރަކާތްތަކުން ފަޒީލުގެ އެކަހެރިކުރެވިފައިވާ ކަމަށް ވެސް އެމްއާރިއެމްއިން ވަނީ މީގެ ކުރިން ހާމަކޮށްފައެވެ.
ޖިންސީ ގޯނާ އަދި ފުރައްސާރައިގެ ކުށްތަކަކީ އެ ޕާޓީން އެއްވެސް ވަރަކަށް ބަލައިގަންނާނެ ކަންކަމެއް ނޫން ކަމަށް ވެސް ވަނީ ބުނެފައެވެ.
ފަޒީލަށް ކުރެވޭ ތުހުމަތު ތަކާއި ގުޅިގެން ވަޒީފާއިން އެކަހެރިކޮށްފައިވާ ކަމަށާއި މައްސަލަތައް ތަހުޤީގުކުރަމުންދާ ކަމަށް މީގެ ކުރިން ރައީސް އޮފީހުގެ ތަރުޖަމާނު އިބްރާހިމް ހޫދު ވެސް ވަނީ ވިދާޅުވެފައެވެ.
ޖިންސީގޯނާގެ މައްސަލަތަކާއި ޖިންސީ ފުރައްސާރައިގެ މައްސަލަތައް ރިޕޯޓް ކުރެވޭ މިންވަރު އިތުރުވެފައިވާއިރު، މި ފަހުން ރިޕޯޓްކުރެވުނު ކޭސްތަކުގެ ތެރޭގައި ސަރުކާރުގެ މަގާމުތަކުގައި ތިއްބެވި އިސް ފަރާތްތަކެއް ހިމެނެއެވެ.
