މާލޭގެ 3 މިސްކިތަކުން ޕޮޒިޓިވްވި ކޭސްއެއް ފެނިއްޖެ
މިސްކިތްތައް ވަގުތީގޮތުން ބަންދުކޮށް ޑިސްއިންފެކްޓް ކުރުމުގެ މަސައްކަތް ދަނީ ކުރަމުން
މާލޭގެ މިސްކިތެއްގައި މީހުންތަކެއް ނަމާދު ކުރަނީ؛ ލޮކްޑައުންގެ ފަހުން މިސްކިތް ހުޅުވާލި ފަހުން މިސްކިތަކުން ޕޮޒިޓިވް ކޭސްއެއް ފެނުނު މިއީ ފުރަތަމަ ފަހަރު
މާލޭގެ 3 މިސްކިތަކުން ޕޮޒިޓިވް ކޭސްއެއް ފެނިއްޖެއެވެ.
ޕޮޒިޓިވް ކޭސް ފެނިފައިވަނީ މަސްޖިދުލް ސުލްތާން ހަސަން އިއްޒުއްދީން މިސްކިތް (ތޮއިބާ މިސްކިތް) އާއި، މަސްޖިދުލް ސުލްތާން މުހައްމަދު އިމާދުއްދީން (މަޖިލިސް އިދާރާ ކައިރި ހުންނަ މިސްކިތް) އަދި މަސްޖިދުލް އަފީފުއްދީން (ދިއްލީ މިސްކިތް) ނެވެ.
މިސްކިތްތަކުން ކޮވިޑަށް ޕޮޒިޓިވް ކޭސްއެއް ފެނުމާއި ގުޅިގެން މި ތިން މިސްކިތް ވެސް ވަގުތީގޮތުން ބަންދުކޮށް ޑިސްއިންފެކްޓް ކުރުމުގެ މަސައްކަތް ކުރަމުން އަންނަ ކަމަށް ސިޓީ ކައުންސިލުން ވަނީ ބުނެފައެވެ.
މިކަމާއި ގުޅިގެން ރާއްޖެއެމްވީ އަށް މައުލޫމާތުދެއްވަމުން ހެލްތް އެމަރޖެންސީ އޮޕަރޭޝަން ސެންޓަރ (އެޗްއީއޯސީ) ގެ ތަރުޖަމާނު ޑރ. ނަޒްލާ ރަފީގު ވިދާޅުވީ މިސްކިތްތައް ޑިސްއިންފެކްޓް ކުރުމަށްޓަކައި ބަންދު ކުރެވިފައިވާ ކަމަށާއި، ޑިސްއިންފެކްޓް ކުރުމުގެ މަސައްކަތް ނިމުމުން އަލުން މިސްކިތް ހުޅުވިގެންދާނެ ކަމަށެވެ.
ކޮވިޑް-19 އާއި ގުޅިގެން މާލޭގެ މިސްކިތްތަކުގައި ޖަމާއަތުގައި ނަމާދުކުރުން މެދުކަނޑާލުމަށްފަހު އަލުން ހުއްދަ ދީފައިވަނީ މި މަހުގެ 1ން ފެށިގެންނެވެ. އަދި އެފަހުން މިސްކިތަކުން ޕޮޒިޓިވް ކޭސްއެއް ފެނުނު މިއީ ފުރަތަމަ ފަހަރެވެ.
