ވީއޭއާރްގެ ސަބަބުން ފައިދާ ވަނީ ޔުނައިޓެޑަށް: ލަމްޕާޑް

ވީޑީއޯ އެސިސްޓަންޓް ރެފުރީ (ވީއޭއާރް) ގެ ސަބަބުން ފައިދާ ވަނީ މެންޗެސްޓާ ޔުނައިޓެޑަށް ކަމަށް ޗެލްސީގެ ކޯޗު ފްރޭންކް ލަމްޕާޑް ބުނެފިއެވެ.

އިނގިރޭސި އެފްއޭ ކަޕްގެ ސެމީފައިނަލް މެޗުގައި ޔުނައިޓެޑާ ދެކޮޅަށް ނުކުތުމުގެ ކުރިން ލަމްޕާޑް ބުނީ ޔުނައިޓެޑާ ދެކޮޅަށް ދާ ބައެއް ކަހަލަ ކަންތައްތައް ވީއޭއާރްއިން ރިވިއުވެސް ނުކުރާ ކަމަށާއި، ވީއޭއާރްގެ ފައިދާ ކުރަނީ ޔުނައިޓެޑަށް ކަމަށެވެ.

އެގޮތުން ފެބްރުއަރީ މަހު ޗެލްސީ އަތުން 2-0 ން ޔުނައިޓެޑް މޮޅުވި މެޗުގައި ޔުނައިޓެޑްގެ ކެޕްޓަން ހެރީ މެގުއާ ބޯޅަ ނެތިސް ޗެލްސީގެ މިޝީ ބަޓްޝުއާޔީ ފައިގައި ޖެހިއިރު އޭނާ ރަތް ކާޑަކުން ސަލާމަތްވުމާއި، އެ މެޗުގައި ޗެލްސީގެ އޮލިވިއޭ ޖިރޫޑާއި ކާޓް ޒޫމާ ޖެހި ލަނޑުތައް ބަލައިނުގަންނަން ނިންމުމުގައި ވީއޭއާރްއިން އެއް ހަމަޔަކުން ބަލާފައިނުވާ ކަމަށްވެސް ލަމްޕާޑް ބުންޏެވެ. އަދި ބުނީ އޭނާގެ އުންމީދަކީ މި ފަހަރު ޗެލްސީ ކޮޅަށް ވީއޭއާރްގެ ސަބަބުން ފައިދާތަކެއް ވުން ކަމަށްވެސް ލަމްޕާޑް ވަނީ ބުނެފައެވެ.

ލަމްޕާޑްގެ މި ވާހަކަތަކަށް ރައްދު ދެމުން ޔުނައިޓެޑްގެ ކޯޗު އޮލެ ގުނަ ސޯލްޝެއާ ބުނީ ވާދަވެރި ޓީމުތަކުން ދައްކާ ވާހަކަތަކަކީ ފަހަރުގައި ޔުނައިޓެޑާ ދެކޮޅަށް ހިންގާ ވަކި ކަހަލަ ކެމްޕެއިނަކަށް ވެސް ވެދާނެ ކަމަށާއި ވީއޭއާރްގެ ސަބަބުން ޔުނައިޓެޑަށް ވީ ފައިދާއެއްގެ ވާހަކަ ދައްކާއިރު ޔުނައިޓެޑަށް އޭގެ ސަބަބުން ލިބިފައިވާ ގެއްލުންތަކަށް އަލި އަޅުވާލުން ވެސް މުހިއްމު ކަމަށެވެ.

އެގޮތުން އިނގިރޭސި ޕްރިމިއާ ލީގުގައި ޓޮޓެންހަމް ހޮޓްސްޕާއާ ދެކޮޅަށް ކުޅުނު މެޗުގެ ފަހު ވަގުތުގައި ޔުނައިޓެޑަށް ލިބުނު ޕެނަލްޓީ ގެއްލުމާއި، ސައުތެމްޓަނާ ދެކޮޅަށް ކުޅުނު މެޗުގައި ޔުނައިޓެޑްގެ މޭސަން ގްރީންވުޑަށް އެޓީމުގެ ރޮމެއޫ ކުރި ފައުލަށް ރަތް ކާޑު ނުދައްކާކަންވެސް ސޯލްޝެއާ ވަނީ ފާހަގަކޮށްފައެވެ.

މީގެ ކުރިން ސޯލްޝެއާ ވަނީ ސެމީގެ މެޗަށް ތައްޔާރުވާން ޗެލްސީއަށް އިތުރު ދެ ދުވަސް ލިބޭތީ ޔުނައިޓެޑަށް އިންސާފުވެރިކޮށް އެފްއޭ ކަޕްގެ ޝެޑިއުލް ހަދާފައިނުވާ ކަމަށް ބުނެފައެވެ. އެކަމާ ގުޅިގެން ލަމްޕާޑް ބުނީ އެފްއޭ ކަޕް ސެމީއަށް ތައްޔާރުވާން ޔުނައިޓެޑަށް ވުރެން ޗެލްސީއަށް އިތުރު ދެ ދުވަސް ލިބުމަކީ އެކަމެއްގެ ޝަކުވާ މާ ބޮޑަށް ކުރަން ޖެހޭ ކަމެއް ގޮތުގައި ނުދެކޭ ކަމަށެވެ.

އެފްއޭ ކަޕްގެ ސެމީގެ ދެވަނަ މެޗުގައި އާދީއްތަ ދުވަހުގެރޭ ރާއްޖެ ގަޑިން 22:00 ގައި ޔުނައިޓެޑާއި ޗެލްސީ ބައްދަލުކުރާއިރު، މި މެޗުން މޮޅުވާ ޓީމެއް ފައިނަލްގައި ވާދަކުރަން ޖެހޭނީ އާސެނަލާ ދެކޮޅަށެވެ.