އިނގިރޭސި ޕްރިމިއާ ލީގުގައި ނޯވިޗް ސިޓީ ބަލިކޮށް ޗެލްސީން ތާވަލުގެ ތިންވަނައިގައި ހަތަރު ޕޮއިންޓުގެ ލީޑެއް ނަގައިފިއެވެ.

ލީގުގައި އަންގާރަ ދުވަހުގެރޭ އަމިއްލަ ދަނޑުގައި ކުޅުނު މެޗުން ޗެލްސީ މޮޅުވީ ރެލިގޭޓްވެފައި އޮތް ނޯވިޗް އަތުން 1-0 ގެ ނަތީޖާއަކުންނެވެ.

ޗެލްސީގެ ދަނޑުގައި ކުޅުނު މެޗުގައި ދެ ޓީމުގެ ފަރާތުންވެސް ފެނިގެންދިޔައީ ހަމަހަމ ކުޅުމެކެވެ. މި މެޗުގައި ޗެލްސީން ގިނަ ހަމަލާތަކެއް އުފެއްދިއިރު، ނޯވިޗްގެ ގޯލްކީޕަރު ޓިމް ކްރުލް ވަނީ މޮޅު ކުޅުމެއް ދައްކާ ގިނަ ހަމަލާތަކެއް ދިފާއުކޮށްފައެވެ.

މެޗުގައި ޗެލްސީން ޖެހި ހަމައެކަނި ލަނޑު އެޓީމުން ކާމިޔާބުކޮށްފައިވަނީ ފުރަތަމަ ހާފުގެ އިތުރު ވަގުތުގެ ތެރޭގައެވެ. ކްރިސްޓިއަން ޕުލިސިޗް ނަގައިދިން ހުރަހަކުން މި ލަނޑު އެޓީމަށް ކާމިޔާބުކޮށްދިނީ ފޯވާޑް އޮލިވިއޭ ޖިރޫޑްއެވެ. މިއީ މި ސީޒަނުގެ ޕްރިމިއާ ލީގުގައި ޖިރޫޑް ކާމިޔާބުކުރި 16 ވަނަ ލަނޑެވެ.

މި މޮޅާއެކު ޗެލްސީ ތިންވަނައިގައި އޮތީ 36 މެޗުން 63 ޕޮއިންޓާއެކުއެވެ. ހަތަރުވަނައިގައި އޮތް ލެސްޓާ ސިޓީ އާއި ފަސްވަނައިގައި އޮތް މެންޗެސްޓާ ޔުނައިޓެޑަށް 35 މެޗުން ލިބިފައިވަނީ 59 ޕޮއިންޓެވެ.

ލީގުގައި ދެން ޗެލްސީ ކުޅެން އޮތް ދެ މެޗަކީ ރަށުންބޭރުގައި ޗެމްޕިއަން ލިވަޕޫލާ ދެކޮޅަށް ކުޅޭ މެޗާއި އަމިއްލަ ދަނޑުގައި ވުލްވްސްއާ ބައްދަލުކުރާ މެޗެވެ. ލީގުގެ ގަދަ ހަތަރެއްގެ ފޯރި ގަދަވެފައިވާއިރު، މިހާތަނަށް އަންނަ ސީޒަނުގެ ޗެމްޕިއަންސް ލީގުގެ ޖާގަތައް ކަށަވަރުކޮށްފައިވަނީ ލިވަޕޫލްގެ އިތުރުން މެންޗެސްޓާ ސިޓީއެވެ.