އިނގިރޭސި ޕްރިމިއާ ލީގުން އިތުރު މީހަކު ކޮރޯނާވައިރަސް (ކޮވިޑް-19) ށް ޕޮޒިޓިވް ވެއްޖެއެވެ.

ކޮވިޑް-19 ގެ ބްރޭކަށްފަހު ޕްރިމިއާ ލީގު އަލުން ފަށާފައިވަނީ މިދިޔަ ޖޫން މަހުގެ 17 ވަނަ ދުވަހެވެ. ޕްރިމިއާ ލީގު އަލުން ފެށި ނަމަވެސް، ލީގުން އަންނަނީ ކްލަބުތަކުގެ ކުޅުންތެރިންނާއި އޮފިޝަލުން ކޮވިޑް-19ށް ޓެސްޓު ކުރަމުންނެވެ.

އެގޮތުން މިހާތަނަށް 13 ބުރެއްގެ މަތިން ކުޅުންތެރިންނާއި އޮފިޝަލުން ކޮވިޑް-19ށް ޓެސްޓު ކޮށްފައިވާއިރު، ފަހުން ކުރިއަށް ގެންދިޔަ ޓެސްޓު ކުރުމުގެ ބުރުގައި 2،071 މީހަކު ވަނީ ޓެސްޓު ކޮށްފައެވެ. މި ބުރުން އިތުރު އެއް މީހަކު ވައިރަހަށް ޕޮޒިޓިވް ވިކަން ޕްރިމިއާ ލީގުން ވަނީ ހާމަކޮށްފައެވެ. އެކަމަކު އެ މީހާގެ އެއްވެސް މައުލޫމާތެއް ހާމަކޮށްފައެއް ނުވެއެވެ. އެއާއެކު މިހާތަނަށް ޖުމްލަ 20 މީހަކު ވަނީ ޕްރިމިއާ ލީގުން ކޮވިޑް-19ށް ޕޮޒިޓިވް ވެފައެވެ.

ޕްރިމިއާ ލީގު އަލުން ފަށައިގެން ކުރިއަށްދާއިރު، ލިވަޕޫލުން ވަނީ މި ސީޒަނުގެ ޕްރިމިއާ ލީގުގެ ޗެމްޕިއަންކަން ކަށަވަރުކޮށްފައެވެ. މިއީ އެޓީމުން 1989-1990 ގެ ސީޒަނުގެ ފަހުން އިނގިރޭސި ޗެމްޕިއަންކަން ހޯދި ފުރަތަމަ ފަހަރެވެ. އަދި އެ ޓީމުން އިނގިރޭސި ޗެމްޕިއަންކަން ހޯދި ޖުމްލަ 19 ވަނަ ފަހަރެވެ. އެކަމަކު މިއީ 1992 ވަނަ އަހަރު އިނގިރޭސި ފުރަތަމަ ޑިވިޝަން، ޕްރިމިއާ ލީގަށް ރިބްރޭންޑްކުރި ފަހުން އެ ޓީމުން ޗެމްޕިއަންކަން ހޯދި ފުރަތަމަ ފަހަރެވެ.

ލީގު ޗެމްޕިއަންކަން ލިވަޕޫލުން ކަށަވަރުކުރިއިރު، އެޓީމު އެއްވަނައިގައި އޮތީ 21 ޕޮއިންޓުގެ ލީޑަކާއެކުއެވެ. ލިވަޕޫލަށް 35 މެޗުން 93 ޕޮއިންޓު ލިބިފައިވާއިރު، ދެވަނައިގައި އޮތް މެންޗެސްޓާ ސިޓީއަށް 35 މެޗުން ލިބިފައިވަނީ 72 ޕޮއިންޓެވެ.