އާސެނަލް އަތުން ޓޮޓެންހަމް މޮޅުވިއިރު، ލެސްޓާއިން ފުރުސަތު ނަގާލައިފި

އިނގިރޭސި ޕްރިމިއާ ލީގުގައި އާދީއްތަ ދުވަހުގެރޭ އާސެނަލް އަތުން ޓޮޓެންހަމް ހޮޓްސްޕާ މޮޅުވިއިރު، ބޯންމަތު އަތުން ބަލިވެ ތިންވަނައަށް އަރަން ލިބުނު ފުރުސަތު ލެސްޓާ ސިޓީން ނަގާލައިފިއެވެ.

ޓޮޓެންހަމްގެ ދަނޑުގައި ކުޅުނު މެޗުން އާސެނަލްގެ މައްޗަށް އެޓީމު ކުރިހޯދީ 2-1 ގެ ނަތީޖާއަކުންނެވެ.

މި މޮޅާ އެކު ޓޮޓެންހަމް ވަނީ އާސެނަލް ފަހަތަށް ޖައްސާލައި ތާވަލުގެ އަށްވަނައަށް އަރާއެވެ. ކުޅުނު 35 މެޗުން 52 ޕޮއިންޓު ހޯދައިގެން ޓޮޓެންހަމް އަށްވަނައަށް ޖެހިލިއިރު، އާސެނަލް ނުވަވަނައިގައި އޮތީ ކުޅުނު 35 މެޗުން ލިބުނު 50 ޕޮއިންޓާއެކުއެވެ.

އާދީއްތަ ދުވަހުގެރޭ ކުޅުނު މެޗުގައި އެންމެ ފުރަތަމަ ލަނޑު ޖަހާ ލީޑު ނެގީ އާސެނަލުންނެވެ. މެޗުގެ 16 ވަނަ މިނެޓުގައި މި ލަނޑު އާސެނަލަށް ކާމިޔާބުކޮށްދިނީ އަލެކްސަންޑަ ލަކަޒޭޓްއެވެ.

އެކަމަކު އޭގެ ތިން މިނެޓު ފަހުން ސޮން ހެއުން-މިން ވަނީ ޓޮޓެންހަމަށް ނަތީޖާ އެއްވަރުކޮށްދީފައެވެ. މި މެޗުން ޓޮޓެންހަމް މޮޅުވީ މެޗު ނިމެން ނުވަ މިނެޓަށް ވެފައިވަނިކޮށް ޑިފެންޑަރު ޓޯބީ އަލްޑަވެއިރަލްޑް ކާމިޔާބުކުރި ލަނޑުންނެވެ.

މީގެ އިތުރުން ލީގުގައި އާދީއްތަ ދުވަހުގެރޭ ރަށުން ބޭރުގައި ބޯންމަތު އަތުން ލެސްޓާ ބަލިވީ 4-1 ގެ ނަތީޖާއަކުންނެވެ.

މި މެޗުގައި އެންމެ ފުރަތަމަ ލަނޑު ޖަހާ ލީޑު ނެގީ ލެސްޓާއިންނެވެ. މެޗުގެ 23 ވަނަ މިނެޓުގައި ލެސްޓާއަށް ލީޑު ނަގއިދިނީ މި ސީޒަނުގެ ޕްރިމިއާ ލީގުގެ ލަނޑު ލިސްޓުގެ އެއްވަނައިގައި އޮތް ޖެމީ ވާޑީއެވެ.

ބޯންމަތުން އެޓީމު ކޮޅަށް ނަތީޖާ އަނބުރާލީ ދެވަނަ ހާފުގައެވެ. މެޗުގެ 66 ވަނަ މިނެޓުގައި ޕެނަލްޓީއަކުން ޖޫނިއާ ސްޓަނިސްލާސް ބޯންމަތަށް ނަތީޖާ އެއްވަރުކޮށްދިންއިރު، އޭގެ މިނެޓެއް ފަހުން ބޯންމަތަށް ލީޑު ނަގައިދިނީ ޑޮމިނިކް ސޮލާންކޭއެވެ.

މި މެޗުގައި ލެސްޓާއަށް މައްސަލަތައް ދިމާވީ ޑިފެންޑަރު ޝަލްގާ ސޮޔުންޗޫއަށް ސީދާ ރަތް ކާޑެއް ދެއްކުމުންނެވެ. އޭގެ ފައިދާ ބޯންމަތުން ނެގިއިރު، މެޗުގައި ބޯންމަތުން ލީޑު ފުޅާކުރި ލަނޑަކީ މެޗުގެ 83 ވަނަ މިނެޓުގައި ލެސްޓާގެ ޑިފެންޑަރު ޖޯނީ އެވަންސް އަތުން ބައިކޮޅަށް ވަން ލަނޑެކެވެ. ބޯންމަތުގެ ހަތަރުވަނަ ލަނޑު މެޗު ނިމެން ތިން މިނެޓަށް ވެފައިވަނިކޮށް ކާމިޔާބުކޮށްދިނީ ސޮލާންކޭއެވެ.

މި މެޗުން މޮޅުވެގެން ލެސްޓާއަށް ތިންވަނައަށް އެރުމުގެ ފުރުސަތު އޮތް ނަމަވެސް، މެޗުން ބަލިވުމުން އެ ޓީމު އޮތީ ހަތަރު ވަނައިގައި 35 މެޗުން 59 ޕޮއިންޓާއެކުއެވެ. ފަސްވަނައިގައި މި ވަގުތު އޮތް މެންޗެސްޓާ ޔުނައިޓެޑް ހޯމަ ދުވަހުގެރޭ ސައުތެމްޓަން އަތުން މޮޅުވެއްޖެނަމަ، އެ ޓީމަށް ތާވަލުގެ ތިންވަނައަށް އެރޭނެއެވެ. ޔުނައިޓެޑް މި ވަގުތު ފަސްވަނައިގައި އޮތީ 34 މެޗުން 58 ޕޮއިންޓު ހޯދައިގެންނެވެ.