ޓޫރިޒަމް މިނިސްޓްރީގެ ސިޔާސީ މަގާމުތަކުގައި ތިބި އެންމެން ބަދަލުކުރަން ޖެހޭ: ޝިޔާން

ޓޫރިޒަމް މިނިސްޓްރީގެ ސިޔާސީ މަގާމުތަކުގައި ތިބި އެންމެން ބަދަލުކޮށް އެހެން ބަޔަކު އެ މަގާމަށް އައްޔަން ކޮށްގެން ނޫނީ އެ މިނިސްޓްރީ ރަނގަޅުވާނެ ތަން ނުދެކޭ ކަމަށް ރައްޔިތުންގެ މަޖިލީހުގެ ތޮއްޑޫ ދާއިރާގެ މެމްބަރު ހަސަން ޝިޔާން (ގިޓާ) ވިދާޅުވެއްޖެއެވެ.

ޓޫރިޒަމް މިނިސްޓްރީގެ ސިޔާސީ މަގާމުގައި ތިއްބެވި ފަރާތްތަކުން ނުފޫޒު ފޯރުވާ ކަމަށް ބުނެ އެ ތަނުގެ މުވައްޒަފަކު ވަޒީފާއިން ވަކިވި ހަބަރު ޓްވީޓް ކުރައްވަމުން ޝިޔާން ވިދާޅުވީ، ބައެއްގެ އަމަލުތަކުގެ ސަބަބުން އެ ވުޒާރާ އޮތީ ވަރަށް ބޮޑަށް ކިލަނބުވެފައި ކަމަށެވެ. ޝިޔާންގެ ނަޒަރުގައި ޓޫރިޒަމް މިނިސްޓްރީ ރިޕޯމް ކުރެވޭނީ މަގާމުތަކަށް ބަދަލު ގެނެސްގެންނެވެ.

ޓޫރިޒަމް މިނިސްޓްރީގެ ވާހަކަ ދެކެވެން ފަށާފައިމިވަނީ، މުވައްޒަފުންނަށް ޖިންސީ ގޯނާކުރި ކަމުގެ ސީރިއަސް ތުހުމަތު ތަކެއް ކުރެވި ޓޫރިޒަމް މިނިސްޓަރު ކަމުން އަލީ ވަހީދު ވަކިކުރުމާއި ގުޅިގެންނެވެ. އަލީ ވަހީދުގެ މައްޗަށް ކުރެވުނު ހުރިހާ ތުހުމަތެއް އޭނާ ވަނީ އިންކާރު ކުރައްވާފައެވެ.

އެއާއި އެކު ލޮކްޑައުންގެ ހާލަތުގައި މިނިސްޓްރީގެ މުވައްޒަފުން ތިބި މާގިރި ހޮޓެލުގެ ތެރޭގައި، އާންމު އިޖުތިމާއީ މިންގަނޑުތަކާއި ހިލާފު ބައެއް ކަންކަމުގައި މުވައްޒަފުންގެ ބައިވެރިވުން އޮތް ކަމުގެ އަޑުތައް ވަނީ ގަދަވެފައެވެ. އަދި މިކަމުގައި ސިޔާސީ އިސް ފަރާތްތައް ބައިވެރިވި ކަމުގެ ތުހުމަތުތަކެއް ދަނީ ކުރެވެމުންނެވެ.