ބްރައިޓަން އަތުން މޮޅުވެ ލިވަޕޫލަށް އިތުރު ރިކޯޑެއް

އިނގިރޭސި ޕްރިމިއާ ލީގުގައި ބްރައިޓަން ބަލިކޮށް ލީގުގެ ތާރީޚުގައި އެއް ސީޒަނެއްގައި އެންމެ އަވަހަށް 30 މޮޅު ހަމަކުރި ޓީމުގެ ރިކޯޑު ލިވަޕޫލުން ގާއިމުކޮށްފިއެވެ.

އެއް ސީޒަނެއްގައި އެންމެ އަވަހަށް 30 މޮޅު ހަމަކުރި ޓީމުގެ ރިކޯޑު ލިވަޕޫލުން ގާއިމުކުރީ ބުދަ ދުވަހުގެރޭ ރަށުން ބޭރުގައި ބްރައިޓަން އަތުން 3-1 ން ހޯދި މޮޅާއެކުއެވެ.

ބްރައިޓަންގެ ދަނޑުގައި ކުޅުނު މެޗުގެ ކުރީކޮޅު ލިވަޕޫލުން ވަނީ ދެ ލަނޑުގެ ލީޑެއް ނަގާފައެވެ. އެގޮތުން މެޗުގެ ހަވަނަ މިނެޓުގައި ނަބީ ކެއިޓާ ދިން ބޯޅައަކުން މުހައްމަދު ސަލާހު ލިވަޕޫލަށް ލީޑު ނަގައިދިންއިރު، އޭގެ ދެ މިނެޓު ފަހުން ސަލާހު ދިން ބޯޅައަކުން ލިވަޕޫލަށް ލީޑު ފުޅާކޮށްދިނީ ކެޕްޓަން ޖޯޑަން ހެންޑަސަންއެވެ.

އެކަމަކު ފުރަތަމަ ހާފު ނިމުމުގެ ކުރިން ބްރައިޓަންއިން ވަނީ ފަރަގު ކުޑަކޮށްފައެވެ. ފުރަތަމަ ހާފުގެ ފަހު މިނެޓުގައި މި ލަނޑު ކާމިޔާބުކޮށްދިނީ ލެއަންޑްރޯ ޓްރޮސާޑްއެވެ. އެކަމަކު މެޗުގެ އެންޑީ ރޮބަޓްސަން ނަގައިދިން ބޯޅައަކުން މެޗުގެ 76 ވަނަ މިނެޓުގައި ސަލާހު ވަނީ ލިވަޕޫލަށް އަލުން ލީޑު ފުޅާކޮށްދީފައެވެ.

މީގެ އިތުރުން ލީގުގައި ބުދަ ދުވަހުގެރޭ މެންޗެސްޓާ ސިޓީން ވަނީ 5-0 އިން ނިއުކާސަލް ޔުނައިޓެޑް އަތުން ބޮޑު މޮޅެއް ހޯދާފައެވެ.

އަމިއްލަ ދަނޑުގައި ކުޅުނު މި މެޗުގައި ސިޓީން ލީޑު ނެގީ މެޗުގެ 10 ވަނަ މިނެޓުގައި ގަބްރިއެލް ޖީސޫސް ކާމިޔާބުކުރި ލަނޑުންނެވެ. އަދި މެޗުގެ 21 ވަނަ މިނެޓުގައި ރިޔާދު މާރޭޒް ވަނީ ސިޓީއަށް ލީޑު ފުޅާކޮށްދީފައެވެ.

ދެވަނަ ހާފުގައި ސިޓީން ތިން ލަނޑު ކާމިޔާބުކުރިއިރު، އެޓީމުގެ ތިންވަނަ ލަނޑަކީ ނިއުކާސަލްގެ ޑިފެންޑަރު ފެޑެރީކޯ ފެނާންޑޭސް އަތުން ބައިކޮޅަށް ވަން ލަނޑެކެވެ. އަނެއް ދެ ލަނޑު ޖަހައިދިނީ ޑޭވިޑް ސިލްވާ އާއި ރަހީމް ސްޓާލިންއެވެ.

މި ނަތީޖާތަކާއެކު ލިވަޕޫލް އެއްވަނައިގައި އޮތީ 34 މެޗުން 92 ޕޮއިންޓާއެކުއެވެ. ދެވަނައިގައި އޮތް ސިޓީއަށް 34 މެޗުން ލިބިފައިވަނީ 69 ޕޮއިންޓެވެ.