ބޮޑުފިނޮޅު މައްސަލައިގައި ޒިންމާވާ ފަރާތްތަކާމެދު ގާނޫނީ ފިޔަވަޅުއެޅުމަށް ޓްރާންސްޕޭރަންސީން ގޮވާލައިފި
އެކަމުގައި ޒިންމާވާ ފަރާތްތައް ހޯދުން މުހިއްމު
ޓްރާންޕޭރެންސީ މޯލްޑިވްސްއިން ކުރިއަށް ގެންދިޔަ ނޫސްވެރިންގެ ބައްދަލުވުމެއްގެ ތެރެއިން
ބޮޑުފިނޮޅުގައި ހަމަނުޖެހުން ހިނގަން މެދުވެރިވުމުގައި ޒިންމާވާ ފަރާތްތަކާމެދު ގާނޫނީ ފިޔަވަޅުއެޅުމަށް ޓްރާންސްޕޭރެންސީ މޯލްޑިވްސްއިން ގޮވާލައިފިއެވެ.
ބޮޑުފިނޮޅުގައި މަސައްކަތް ކުރަމުންދިޔަ ބިދޭސީންތަކަކަށް މުސާރަ ނުލިބިގެން ހިންގި ހަމަނުޖެހުންތަކުގައި ދިވެހިންތަކެއް ރަހީނުކޮށް، ފުލުހުންނާވެސް ކުރިމަތިލާފައިވާއިރު، އެކަން ހިނގަން މެދުވެރިވި ސަބަބުން ދެނެގަނެ، އެކަމުގައި ޒިންމާވާ ފަރާތްތައް ހޯދުން މުހިއްމު ކަމަށް ޓްރާންސްޕޭރެންސީން ނެރުނު ބަޔާނެއްގައި ބުނެފައިވެއެވެ. އެގޮތުން ބޮޑުފިނޮޅުގެ މައްސަލައިގައި ލާއިންސާނީ ހާލަތަށް ހުށަހެޅުނު މަސައްކަތްތެރިންނަށް އިތުރު އަދަބުތަކެއް ދިނުމުގެ ވިސްނުން ދޫކޮށް، އެ މައްސަލަ ބޮޑުވާން މެދުވެރިވި ސަބަބުތަކާއި، ވަށައިގެންވާ އެންމެހާ ކަންކަން ރަނގަޅަށް ތަހުގީގު ކުރުމަށް ބަޔާނުގައި ގޮވާލާފައިވެއެވެ.
ބޮޑުފިނޮޅުގައި ހިނގާދިޔަ ކަމަކީ، ރާއްޖޭގައި ގިނަ ބިދޭސީ މަސައްކަތްތެރިން ކޮންމެ ދުވަހަކުހެން ތަހައްމަލު ކުރަން ޖެހިފައިވާ ބޭއިންސާފުގެ ނަތީޖާކަން ފާހަގަކޮށް ބަޔާނުގައި ބުނީ، އެކަންކަން ހައްލު ކޮށްދިނުމަށް އެދި ސުލްހަވެރިކަމާއެކު 2019 ވަނަ އަހަރުން ފެށިގެންވެސް އިހުތިޖާޖު ކޮށްފައިވާކަންވެސް ފާހަގަކުރެވޭ ކަމަށެވެ.
ޓްރާންސްޕޭރެންސީން ބުނީ، މި ހާދިސާއަކީ ރާއްޖޭގެ އެންމެހާ ނިޒާމުތައް ބައްޓަން ކުރެވިފައިވާ ގޮތުން މަސައްކަތްތެރިންނަށް ނިޒާމުގެ ތެރެއިން ކަންކަން ހައްލުކުރުމަށް ހަގީގީ ފުރުސަތު ނެތުމުން ހިނގަން މެދުވެރިވި ހާދިސާއެއް ކަމަށެވެ. އެގޮތުން އިންސާނީ ވަގުފާރި ރާއްޖޭގައި ފުޅާ ދާއިރާއެއްގައި ހިންގަމުންދާއިރު، މިއަދާ ހަމައަށްވެސް މި އަނިޔާގައި ބައިވެރިވާ އެއްވެސް ފަރާތެއް ޖަވާބުދާރީ ނުކުރެވުމަކީ އިންސާނީ ވަގުފާރިއަށް ދެވޭ ހިތްވަރެއްކަމަށް ބަޔާނުގައި ބުނެފައިވެއެވެ.
