ލިވަޕޫލުން ރިކޯޑު ދެމެހެއްޓިއިރު، ސިޓީ ބަލިވެއްޖެ

އިނގިރޭސި ޕްރިމިއާ ލީގުގައި އެސްޓަން ވިލާ ބަލިކޮށް އަމިއްލަ ދަނޑުގައި މޮޅުވުމުގެ ރިކޯޑު ޗެމްޕިއަން ލިވަޕޫލުން ދެމެހެއްޓިއިރު، ސައުތެމްޓަން އަތުން މެންޗެސްޓާ ސިޓީ ބަލިވެއްޖެއެވެ.

ޗެމްޕިއަންކަން ކަށަވަރުކޮސްފައިވާ ލިވަޕޫލް ވަނީ އާދީއްތަ ދުވަހުގެރޭ އަމިއްލަ ދަނޑުގައި އެސްޓަން ވިލާ އަތުން 2-0 ން މޮޅުވެފައެވެ. މި މެޗުން މޮޅުވެ ލިވަޕޫލުން ވަނީ މި ފަހަރު ލީގުގައި އަމިއްލަ ދަނޑުގައި ކުޅޭ މެޗުތަކުން މޮޅުވެ ސައްތަ އިން ސައްތަ ރިކޯޑު ދަމަހައްޓާފައެވެ.

މި މެޗުގެ ފުރަތަމަ ހާފުގައި ދެ ޓީމުގެ ފަރާތުންވެސް ހަމަހަމަ ކުޅުމެއް ފެނިގެންދިޔައިރު، މި ހާފުގައި ލަނޑެއް ފެނިފައެއް ނުވެއެވެ. ލިވަޕޫލުން މެޗުގައި ލީޑު ނެގީ 71 ވަނަ މިނެޓުގައެވެ. ނަބީ ކެއިޓާ ދިން ބޯޅައަކުން ލިވަޕޫލަށް ލީޑު ނަގައިދިނީ ސަޑިއޯ މާނޭއެވެ. އަދި މެޗު ނިމެން މިނެޓަކަށް ވެފައި ވަނިކޮށް ލިވަޕޫލަށް ލީޑު ފުޅާކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި ޒުވާން ކުޅުންތެރިޔާ ކާޓިސް ޖޯންސްއެވެ.

ލީގުގައި އާދީއްތަ ދުވަހުގެރޭ ރަށުން ބޭރުގައި ކުޅުނު މެޗުން ސިޓީ ބަލިވީ 1-0 ގެ ނަތީޖާއަކުންނެވެ.

މި މެޗަކީ މި ފަހަރު ލީގުގައި ސިޓީ ބަލިވި ނުވަވަނަ މެޗެވެ. އަދި މިއީ ގާޑިއޯލާގެ ކޯޗިން ކެރިއަރުގައި އެއް ސީޒަނެއްގައި ލީގުގައި މި އަދަދަށް ބަލިވި ފުރަތަމަ ފަހަރެވެ.

މި މެޗުގައި ސިޓީގެ ފަރާތުން އާދައިގެ ކުޅުމެއް ފެނިގެންދިޔައިރު، ސައުތެމްޓަން މި މެޗުން މޮޅުކޮށްދޭން ޖެހި ހަމައެކަނި ލަނޑު މެޗުގެ 16 ވަނަ މިނެޓުގައި ކާމިޔާބުކޮށްދިނީ ޗޭ އެޑަމްސްއެވެ. މިއީ އުމުރުން 23 އަހަރުގެ އެޑަމްސް ލީގުގައި ކާމިޔާބުކުރި ފުރަތަމަ ލަނޑެވެ.

މި މެޗުގައި ސިޓީއަށްވެސް ވަނީ ލަނޑު ޖަހާނެ ފުރުސަތުތަކެއް ލިބި ބޭކާރުވެފައެވެ. އެގޮތުން ސިޓީގެ ހަމަލާތަށް ދިފާއުކުރުމުގައި ސައުތެމްޓަންގެ ގޯލްކީޕަރު އަލެކްސް މެކާތީ ވަނީ މޮޅު ކުޅުމެއް ދައްކާއެވެ.

މި ނަތީޖާތަކާއެކު ލިވަޕޫލް އެއްވަނައިގައި އޮތީ 33 މެޗުން 89 ޕޮއިންޓާއެކުއެވެ. ސިޓީ ދެވަނައިގައި އޮތީ 33 މެޗުން 66 ޕޮއިންޓާއެކުއެވެ.