ފުލުހުންނަށް ހުށަހެޅޭ މައްސަލަތަކުގެ ތެދު މައުލޫމާތު އޭގެ ވަގުތުގައި ހިއްސާ ކުރުމަށް ރައީސް އެދިވަޑައިގެންފި
5 ޖުލައި 2020 | އާދީއްތަ 14:33ހިޔާލުފާޅު ކުރުމުގެ މިނިވަންކަމަށް މިހާރު އެއްވެސް ހުރަހެއް ނެތް
އިސްކަދަރު ކޮށްޓަށް ވަޑައިގަންނަވާ ރައީސް ސޯލިހު ވާހަކަފުޅު ދައްކަވަނީ
ފުލުހުންނަށް ހުށަހެޅޭ ހައްސާސީ މައްސަލަތަކުގެ ތެދު މައުލޫމާތު އޭގެ ވަގުތުގައި ރައްޔިތުންނާ ހިއްސާ ކުރުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު އެދިވަޑައިގެންފިއެވެ.
އާދިއްތަ ދުވަހު އިސްކަދަރުކޮށީގައި އޮތް ރަސްމިއްޔާތުގައި ފުލުހުންނާއި ބައްދަލުކުރައްވާ ވާހަކަ ދައްކަވަމުން ރައީސް ސޯލިހު ވިދާޅުވީ މި ސަރުކާރުގައި ނޫސްވެރިކަމުގެ މިނިވަންކަމާއި ހިޔާލު ފާޅުކުރުމުގެ މިނިވަންކަމަށް މިހާރު އެއްވެސް ހުރަހެއް ނެތް ކަމަށާއި، ބައެއް މީޑިއާތަކުން ބައެއް ފަހަރު މައުލޫމާތު އާންމު ކުރާ ގޮތުން ރައްޔިތުންނަށް ކަމުގެ ހަގީގަތް ވަރަށް ބޮޑަށް އޮޅިގެންދާ ކަމަށެވެ. މިކަން މިގޮތަށް މެދުވެރިވާ އެންމެ ބޮޑު ސަބަބަކީ އެފަދަ މައްސަލަތަކުގެ ތެދު މައުލޫމާތު ރައްޔިތުންނަށް އެނގެން ބޭނުންވާ ވަގުތުގައި ހާމަ ނުކުރުން ކަމަށް އެމަނިކުފާނު ވިދާޅުވިއެވެ.
ރައީސް ސޯލިހު ވިދާޅުވީ ފުލުހުންނަށް ހުށަހެޅޭ ހައްސާސީ މައްސަލަތަކުގެ ތެދު މައުލޫމާތު އޭގެ ވަގުތުގައި ރައްޔިތުންނާ ހިއްސާ ކުރުން ވަރަށް މުހިންމު ކަމަށެވެ.
ފުލުހުންގެ ތެރެއިން ވެސް ކަންކަން އިސްލާހު ކުރުމަށް ގިނަ މަސައްކަތްތަކެއް ކުރާކަން ފާހަގަކުރައްވައި ރައީސް ސޯލިހު ވިދާޅުވީ ރައްޔިތުންގެ އިތުބާރު ގެއްލި، ބޮލުގައި ބަދުނާމެ އެޅޭކަށް އެއްވެސް ފުލުހަކު ބޭނުން ނުވާނެ ކަމަށެވެ.
އެގޮތުން މިހާރަށް ވުރެ އަވަހަށް މުއައްސަސާތަކުން އޭގެ ވަގުތުގައި މައުލޫމާތުތައް ސިއްރު ނުކޮށް ހާމަކޮށްދިނުމަށް އެމަނިކުފާނު އެދިވަޑައިގެންނެވިއެވެ.
