އިޓާލިއަން ލީގުގައި އެންމެ ގިނަ މެޗު ކުޅުމުގެ ރިކޯޑު ގޯލްކީޕަރު ޖިއަންލުއިޖީ ބުފޮން ގާއިމުކުރި މެޗުން މޮޅު، ޔުވެންޓަސްއިން އެއްވަނައިގައި ލީޑު ފުޅާކޮށްފިއެވެ.

ހޮނިހިރު ދުވަހުގެރޭ ޔުވެންޓަސް ވަނީ ޓޮރީނޯ އަތުން 4-1 ން މޮޅުވެފައެވެ.

ތާވަލުގެ އެއްވަނައިގައި ޔުވެންޓަސް ލީޑު ފުޅާކުރީ ދެވަނައިގައި އޮތް ލާޒިއޯ ހޮނިހިރު ދުވަހުގެރޭ އޭސީ މިލާން އަތުން ބަލިވުމުންނެވެ. ތާވަލުގެ އެއްވަނައިގައި ޔުވެންޓަސް އޮތީ ހަތް ޕޮއިންޓުގެ ލީޑަކާއެކުއެވެ، ޔުވެންޓަސްއަށް 30 މެޗުން 75 ޕޮއިންޓު ލިބިފައިވާއިރު، ދެވަނައިގައި އޮތް ލާޒިއޯއަށް ލިބިފައިވަނީ 30 މެޗުން 68 ޕޮއިންޓެވެ.

ޓޮރީނޯއާ ދެކޮޅަށް އަމިއްލަ ދަނޑުގައި ޔުވެންޓަސް ކުޅުނު މެޗުގައި ބުފޮން ވަނީ އިޓާލިއަން ލީގުގައި އެންމެ ގިނަ މެޗު ކުޅުމުގެ ރިކޯޑު މުގުރާލާފައެވެ. ހޮނިހިރު ދުވަހުގެރޭގެ މެޗަކީ ލީގުގައި ބުފޮން ކުޅުނު 648 މެޗެވެ. ބުފޮންގެ ކުރިން މި ރިކޯޑު އޮތީ 647 މެޗު ކުޅެފައިވާ މިލާނުގެ ކުރީގެ ކެޕްޓަން ޕައޮލޯ މަލްޑިނީގެ އަތުގައެވެ.

މި މެޗު ފަށައިގެން ތިންވަނަ މިނެޓުގައި ޔުވެންޓަސްއިން ވަނީ ލަނޑު ޖަހާ ލީޑު ނަގައިފައެވެ. މި ލަނޑު އެޓީމަށް ކާމިޔާބުކޮށްދިނީ ހުއާން ކުއަޑްރާޑޯގެ އެހީތެރިކަމާއިއެކު ޕައުލޯ ޑިބާލާއެވެ. އަދި މެޗުގެ 29 ވަނަ މިނެޓުގައި ޔުވެންޓަސްއިން ވަނީ އިތުރު ލަނޑެއް ޖަހާ ލީޑު ފުޅާކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ އިތުބާރު ފޯވާޑް ރޮނާލްޑޯގެ އެހީތެރިކަމާއިއެކު ކުއަޑްރާޑޯއެވެ.

މެޗުގެ ފުރަތަމަ ހާފު ނިމުމުގެ ކުރިން ޓޮރީނޯއިން ވަނީ ފަރަގު ކުޑަކޮށްފައެވެ. ލިބުނު ޕެނަލްޓީއަކުން މި ލަނޑު އެޓީމަށް ކާމިޔާބުކޮށްދިނީ އެންޑިރިއާ ބެލޯޓީއެވެ.

ޔުވެންޓަސްގެ ތިންވަނަ ލަނޑު މެޗުގެ 61 ވަނަ މިނެޓުގައި އެޓީމަށް ކާމިޔާބުކޮށްދިނީ ލިބުނު ހިލޭ ޖެހުމަކުން ރޮނާލްޑޯއެވެ. މިއީ ޔުވެންޓަސްއަށް ބަދަލުވެ ރޮނާލްޑޯ ކާމިޔާބުކުރި ފުރަތަމަ ހިލޭ ޖެހުމެވެ. އަދި މި ލަނޑާއެކު ރޮނާލްޑޯ ވެގެން ގޮސްފައިވަނީ 1961 އަހަރުގެ ފަހުން ޔުވެންޓަސްގެ ކުޅުންތެރިއަކު އިޓާލިއަން ލީގުގައި 25 ލަނޑަށްވުރެ އިތުރަށް ލަނޑު ކާމިޔާބުކޮށްދިން ކުޅުންތެރިޔާއަށެވެ.

ޔުވެންޓަސްއިން މި މެޗުގައި ކާމިޔާބުކުރި ފަހު ލަނޑަކީ ޓޮރީނޯ ކުޅުންތެރިން އަތުން ބައިކޮޅަށް ވަން ލަނޑެކެވެ.

މީގެ އިތުރުން ލީގުގައި ހޮނިހިރު ދުވަހުގެރޭ މިލާން އަތުން ލާޒިއޯ ބަލިވީ 3-0 ންނެވެ.

ލާޒިއޯގެ ދަނޑުގައި ކުޅުނު މި މެޗުގެ 23 ވަނަ މިނެޓުގައި މިލާނުން ވަނީ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ ހަކާން ޗަނައޮގްލޫއެވެ. އަދި ފުރަތަމަ ހާފު ނިމުމުގެ ކުރިން ލިބުނު ޕެނަލްޓީއަކުން ޒަލަޓާން އިބްރަހިމޮވިޗް ވަނީ މިލާނަށް ލީޑު ފުޅާކޮށްދީފައެވެ.

މި މެޗުގައި މިލާނުން ކާމިޔާބުކުރި ތިންވަނަ ލަނޑު މެޗުގެ 59 ވަނަ މިނެޓުގައި ކާމިޔާބުކޮށްދިނީ އަންޓެ ރެބިޗެވެ.

މި މޮޅާއެކު މިލާން އޮތީ 30 މެޗުން 46 ޕޮއިންޓް ހޯދައިގެން ތާވަލުގެ ހަވަނައިގައެވެ.