15 އަހަރުގެ ކުއްޖަކު ރޭޕްކޮށް، ބަލިވެއިން މައްސަލައިގައި ހައްޔަރުކުރި މީހާ ޝަރީޢަތް ނިމެންދެން ބަންދު!
4 ޖުލައި 2020 | ހޮނިހިރު 07:19ކޯޓު އަމުރެއްގެ ދަށުން އޭނާ ހައްޔަރުކުރީ 2020 ޖުލައި 2 ވަނަ ދުވަހު
މި މައްސަލައާ ގުޅިގެން ހައްޔަރު ކޮށްފައިވާ ފ. ފީއަލީ/ފީރޯޒްގެ، އިބްރާހިމް ޝާފިއު (37އ)
ނުކުޅެދުންތެރިކަން ހުރި 15 އަހަރުގެ ކުއްޖަކު ރޭޕްކޮށް، އެ ކުއްޖާ ބަލިވެއިން މައްސަލައިގައި ހައްޔަރުކުރި މީހާ ޝަރީޢަތް ނިމެންދެން ބަންދުގައި ބެހެއްޓުމަށް އަމުރުކޮށްފިއެވެ.
އެކަމާ ގުޅޭގޮތުން ފުލުހުން ބުނީ، މި މައްސަލައިގައި ކޯޓު އަމުރެއްގެ ދަށުން 2020 ޖުލައި 2 ވަނަ ދުވަހު ހައްޔަރު ކޮށްފައިވާ ފ. ފީއަލީ/ފީރޯޒްގެ، އިބްރާހިމް ޝާފިއު (37އ) ޝަރީއަތުން ގޮތެއް ނިމެންދެން ބަންދުގައި ބެހެއްޓުމަށް ފ. ނިލަންދޫ މެޖިސްޓްރޭޓް ކޯޓުން އަމުރުކޮށްފައިވާ ކަމަށެވެ.
ނިލަންދޫ މެޖިސްޓްރޭޓް ކޯޓުގެ ޢަމުރުގައި ބުނެފައިވަނީ، މި މައްސަލައަކީ ކުޑަކުއްޖަކަށް ޖިންސީ ގޯނާކޮށް، ރޭޕްކުރި މައްސަލައަކަށްވަތީ، އޭނާ ދޫކޮށްލައިފިނަމަ މި މައްސަލައިގައި ހިމެނޭ ފަރާތްތަކަށް ނުފޫޒުފޯރުވައި ހެކި ނައްތާލުމަށް މަސައްކަތް ކޮށްފާނެތީ އާއި، އޭނާގެ ފަރާތުން މުޖުތަމަޢުއަށް ނުރައްކަލެއް ކުރިމަތި ވެދާނެކަމަށް ފެންނާތީ ތަހުގީގު ނިމެންދެން ކަސްޓޯޑިއަލް ޖަލެއްގައި ބެހެއްޓުމަށް އަމުރު ކުރާ ކަމަށެވެ.
އެގޮތުން މައްސަލައިގެ ޝަރީއަތުން ހުކުމެއް ނުވަތަ ޝަރީއަތުން ވަކިގޮތެއް ކަނޑައެޅެންދެން ރިމާންޑް ޖަލެއްގައި ބަންދުގައި ބެހެއްޓުމަށް އަމުރުކޮށްފައިވެއެވެ.
އޭގެ އިތުރުން، މިމައްސަލައިގެ ތަހުގީގު ފުރިހަމަކޮށް، ދައުވާ ކޮށްދިނުމަށް އެދި ޕްރޮސިކިއުޓަރ ޖެނެރަލްގެ އޮފީހަށް ފޮނުވުމުގެ މަސައްކަތް މިހާރު ކުރަމުންދާ ކަމަށް ފުލުހުން ބުނެފައިވެއެވެ.
ނުކުޅެދުންތެރިކަން ހުންނަ ކުދިންވެސް ހިމެނޭގޮތަށް ޗައިލްޑް އެބިއުސް އަދި އެކްސްޕްލޮއިޓޭޝަންގެ މައްސަލަތައް އިތުރުވަމުންދާކަން ފާހަގަކޮށް ފުލުހުން ބުނީ، މައިންބަފައިންނާއި ބެލެނިވެރިން މިހާރަށްވުރެ ބޮޑަށް ސަމާލުވުމަށް އިލްތިމާސް ކުރާ ކަމަށެވެ. އަދި ކުޑަކުދިންނާ ގުޅޭ މައްސަލަތައް މީޑިއާތަކުގައި ޝާއިއު ކުރާއިރު ކުޑަކުދިންގެ ކަރާމާތަށް އުނިކަން ނާންނަގޮތަށް އަމަލު ކުރުމަށްވެސް ފުލުހުން ވަނީ އިލްތިމާސްކޮށްފައެވެ.
މިފަހަކަށް އައިސް ޖިންސީ ގޯނާގެ މައްސަލަތައް ރިޕޯޓް ކުރެވޭ މިންވަރު ވަނީ އިތުރުވެފައެވެ. އެގޮތުން މިއަހަރުގެ ކުރީ ކޮޅު، ގއ ކަނޑުހުޅުދޫގައި ތުއްތު ކުއްޖަކު ރޭޕް ކުރި މައްސަލައެއް ފެންމަތިވުމާއެކު، ރޭޕާ ދެކޮޅަށް ފާޅުގައި އަޑުއުފުލާ މީހުންގެ އަދަދުވެސް ވަނީ އިތުރުވެފައެވެ. އަދި ފާއިތުވި ދުވަސްތަކުގައި ވެސް އެފަދަ ބޮޑެތި މައްސަލަތަކެއް ފެންމަތިވެފައިވާއިރު، ރޭޕްއާއި، ޖިންސީ އެކިއެކި ގޯނާތަކާއި ދެކޮޅަށް ސިލްސިލާ މުޒާހަރާތަކެއް ވަނީ ކޮށްފައެވެ.
